5
Tɑcɑɑ mǝŋnɑ-tʋɣʋ nyɑ́ kiŋ
1 Tɑcɑɑ, tɑɑ sɔɔ mpi pǝ mɑɣɑnɑ-tʋ tɔ.
Nyǝnɩ, nɑ ń pɑɑsǝnɑ ɩsǝnɑ pɑ tʋʋkɩ-tʋ tɔ.
2 Kpɑɩ nyǝ́mɑ lɛɛkɑ tɑ́ tɛtʋ.
Mpɑ tǝ tɑ nyɩ tɔ pɑ cɑɣɑ tɑ́ tɛɛsɩ tɑɑ.
3 Tɑ́ cɑɑnɑɑ fɛɩ, nɑ pǝ́ yele tɑ́ toonɑɑ
kɛ leelɑɑ, nɑ tɑɣɑ suluwɑɑ.
4 Tǝ yɑkɩ tɑ́ mɑɣɑmɑɣɑ tɑ́ lʋm.
Tǝ fɛlǝɣɩ tɑ́ tɑɑsɩ.
5 Tɑ kʋnyɔntʋlɑɑ wɛ tɑ́ wɑɑlǝɣɩ tɑm kɛ́.
Tǝ kɑwɑ tǝtɔɣɔtɔɣɔ,
pɑɑ yeki-tʋ sɩ tǝ́ hɛɛsɩ.
6 Tǝ tiɣisiɣi Icipiti
nɑ Asilii pǝ nyǝ́mɑ kɛ niŋ kɛ́,
nɑ pǝ́cɔ́ tǝ́ tɔɣɔ nɑ tǝ́ hɑɣɑ.
7 Tɑ́ cɑɑnɑɑ lɑpǝnɑ ɩsɑɣɑtʋ.
Amɑ pɛlɛ pɑ sǝpɑ.
Ɩlɛnɑ tɑɑ tɔkɩ tǝ nyɑŋ.
8 Yomɑɑ pǝsǝnɑ ntɛɣɛ tɑ́ cɑɑnɑɑ.
Pǝ́cɔ́ nɔɣɔlʋ kɑɑ yɑ-tʋɣʋ pɑ niŋ tɑɑ.
9 Tǝ lɑkɩ tɑ́ weesiŋ kɛ ɑwusɑ kɛ
wʋlɑɣɑ tɛtʋ tɑɑ ŋmɩɩlɑɑ niŋ tɑɑ kɛ́,
nɑ pǝ́cɔ́ tǝ́ hiki nɑ tǝ́ tɔɣɔ.
10 Nyɔɣɔsɩ hɑŋɑ tɑ́ tɔnǝŋ kɛ́ ɩsɩɩ
tǝ wɛ mǝsɑsɩ tɑɑ.
11 Pɑ kpipɑ Siyɔŋ nɑ Yutɑ ɑcɑlɛɛ tɑɑ ɑlɑɑ,
nɑ pɛɛlɑɑ, nɑ pɑ́ wɑkǝlǝɣɩ-wɛ.
12 Pɑ pusɑ wulɑʋ wɑɑlɩ nyǝ́mɑ nɑ tɩɩŋ.
Pɑ tɑ tʋnɑ ɑkpɑtǝlɑɑ kɛ pɑɑ pǝcɔ.
13 Nɑmlɛ nɑŋʋɣʋ nɩɩ ɩfepiyɑ.
Piyɑ nɑ́ sǝɣǝlɑ tɑɑsɩ nɑ sɩ́ seliɣi.
14 Ɩcɑtɛ sɔsɑɑ nɑɑ tɑsǝɣɩ hʋʋlɛ tɑɑ kɛ́ cɑɣɑlɛ.
Pǝyele ɩfepiyɑ nɑ́ hɛɛsɑ sɑŋkʋnɑɑ.
15 Tɑ́ lɑŋhʋlʋmlɛ yɑwɑ.
Lǝyɑɣɑ lɛɛtɑ tɑ́ pɑɑlɛ lonte.
16 Tɑ́ teeli sǝpɑ.
Tǝ pǝsɑ mpusi nyǝ́mɑ kɛ́.
Mpi tɔ, tǝ lɑpɑ ɩsɑɣɑtʋ.
17 Tɑ́ lɑŋɑ wɑkǝlɑ sɔsɔm.
Ɩsǝlʋm yʋlǝsǝɣɩ tɑ́ ɩsɛ.
18 Mpi tɔ, Siyɔŋ pʋɣʋ pǝsɑ wʋlɑɣɑ tɛtʋ
nɑ tɑɑlɛ hɑsɩ cɔɔkɩ.
19 Amɑ Tɑcɑɑ nyɑɣɑlɛ wulɑʋ kɛ tɑm tɔɔ.
Nyɑ́ kɑwulɑɣɑ fɛɩ tǝnɑɣɑ.
20 Pepe tɔɔ kɛ́ n lɔ-tʋɣʋ tɑm tɔɔ?
Pepe tɔɔ kɛ́ n sɔɔ tɑ́ tɔɔ kɛ́ tɑ́ weesuɣu tǝnɑ?
21 Mǝlǝnɑ-tʋɣʋ nyɑ́ kiŋ nɑ tǝ́ pǝsɩ
nyɑ́ nyǝ́mɑ tǝkpɑtɑɑ.
Lɑɣɑsɩ tɑ́ weesiŋ ɩsɩɩ hɑtoo ɩlɛ.
22 Nyɑ́ tɑɑ wɛɛ sɩ n kɑ́ lɔ-tʋ tǝkpɑtɑɑ nɑ?
N kɑ́ mʋ-tʋ nɑ pɑ́ɑ́nɑ́ nɑ pǝ́ tɛɛ mpǝle nɑ?