2
Mpi kʋnyɔntʋnɑɑ muɣullɑɑ kɑ tɛɛsǝnɑ tɔ
1 Yǝlɑɑ hǝntǝɣɩ nɑ pɑ́ mɑɣɑsǝɣɩ ɩsɑɣɑtʋ,
pǝ nyɑɑlǝɣɩ ɩlɛnɑ pɑ́ lɑkɩ-tǝɣɩ wɑɑtʋ wei
pɑ wɛnɑ pǝ mpɑɑʋ tɔ.
Pǝ yǝlɑɑ tɔm wɛ wɑɩyo kɛ́.
2 Ye tɑwɑ yɑɑ tɛɛsɩ kɛ pɑ nyɩɩlɑɑ pɑ lɛɛkɩ.
Pɑ lɑkǝnɑ mʋsʋŋ kɛ yǝlɑɑ nɑ pɑ wɛnɑʋ.
3 Pǝ tɔɔ kɛ́ Tɑcɑɑ yɔɣɔtɑɑ sɩ:
Mɑ tɑɣɑnǝɣɩ ɩsɑɣɑtʋ kɛ mǝ nyʋɣʋ tɔɔ.
Ɩ́ kɑɑ fiti-tɩ,
pǝ́cɔ́ ɩ́ kɑ́ tɔŋ kɛ́ nɑ ɩ́ kɑmɑ nyɔɔŋ.
Mpi tɔ, wɑhɑlɑ kʋyɛɛŋ kɔŋnɑ.
4 Wɑɑtʋ ɩnǝɣɩ ɩ́ kɑ́ wiiki nɑ lɛlɑɑ mɑɣɑsǝɣɩ-mɛ sɩ:
Ɩsɔ kpiisɑ-mɛ tǝnɑŋnɑŋ,
nɑ ɩ́ cɛlɑ mǝ tɛtʋ kɛ mǝ kolontunɑɑ.
Pǝ tɑ kɑɑsɩ-mɛɣɛ pʋlʋ.
5 Mǝ tɑɑ nɔɣɔlʋ kɑɑ hiki ɩ pɑɑ nyǝm
kɛ tɛtʋ nti Tɑcɑɑ yǝlɑɑ kɑ́ tɑɣɑnɩ
tɑlʋɣʋ tɔ tǝ tɑɑ.
Tɑcɑɑ tɔm kisilɑɑ
6 Lɛlɑɑ nɑ́ sɔɔ pɑ nyǝntʋ tɔɔ,
nɑ pɑ́ tɔŋ mɑ́ sɩ mɑ́ su,
sɩ mɑ kǝlǝɣɩ kɑkɑlɑɣɑ.
Sɩ fɛɛlɛ kɑɑ tɔɣɔ mpɛ.
7 Hɑlǝnɑ pɑ́ tɔŋ sɩ Ɩsɔ kɑɑ mʋ pɑ́ɑ́nɑ́
kɛ lɔŋ nɑ ɩ́ lɑ mpɛɣɛ mpʋ.
Mpɑ pɑ tɔŋ kʋsiɣisim tɑɑ tɔ,
pɑ tike kɛ mɑ heeliɣi tɔm kʋpɑntʋ.
8 Amɑ Tɑcɑɑ yɔɣɔtǝɣɩ mǝ tɔm sɩ:
Hɑtoo lɔŋ kɛ ɩ́ pǝsǝɣɩ mɑ yǝlɑɑ kolontunɑɑ.
Ɩ́ lɛɛkǝɣɩ yʋlʋpɑmɑ mpɑ pɑ lɩɩnɑ yoou nɑ ɑlɑɑfǝyɑ tɔ,
pɑ sɑɣɑtɑnɑɑ kɛ mʋsʋŋ.
9 Ɩ́ tɔɣɔnǝɣɩ pɑ ɑlɑɑ kɛ pɑ tɛ.
Ɩ́ tɔŋ sɩ ɩ́ lɛɛkǝɣɩ pɑ piyɑ kɛ kʋpɑntʋ nti Ɩsɔ hɑ-wɛ tɔ.
10 Ɩ́ polo ɩ́ tɛɛ yoo,
mǝ hɛɛsʋɣʋ tɛmɑɣɑ.
Wɑhɑlɑnɑɑ tɑŋɑ-mɛɣɛ mǝ ɩsɑɣɑtʋ tɔɔ kɛ́.
11 Ɩsɔ kʋyɔɣɔtʋtʋ tɛlǝsǝlɑɑ
tɛtɛlɑtɑɑ mpɑ pɑ cɔɔkɩ yem,
nɑ pɑ́ looliɣi-mɛ sɩ ɩ́ kɑ́ yɑ́
sʋlʋmnɑɑ tɑɑ tɔɣɔ ɩ́ cɑɑkɩ.
Ɩsɔ kpeɣeliɣi Ɩsɛɣɛlɩ kɑkɑɑsɑɣɑ
12 Ḿpʋ́ɣʋ́ Tɑcɑɑ tɔmɑ sɩ:
Mɑɑ kpeɣeli Ɩsɛɣɛlɩ kɑkɑɑsɑɣɑ mɛ
ɩsɩɩ heeŋ kɛ tǝtǝkǝlɛ,
yɑɑ tǝtɔɣɔlɛ tɑɑ nɑ ɩ́ cɑɣɑnɑ mǝ tɩ.
13 Mɑ́ɑ́ hɛɛnɑ-mɛɣɛ yomle nɔnɔɣɔ,
nɑ ɩ́ pǝsɩ nɑ ɩ́ fiti.
Mɑɣɑlɛ mǝ wulɑʋ,
mɑ́ɑ́ tiikinɑ-mɛ.