6
Tɑcɑɑ kɑlǝnɑʋ kɛ ɩ yǝlɑɑ
1 Ḿpʋ́ɣʋ́ Misee tɔmɑ sɩ:
Ɩ́ ke ŋkpɑŋŋ nɑ ɩ́ nɩɩ Tɑcɑɑ tɔm.
Ɩ́ kʋlɩ nɑ ɩ́ wiinɑ pɔ́ɔ́ŋ
nɑ pulɑsɩ nɑ sɩ́ nɩɩ mǝ nɔɣɔ.
2 Pɔ́ɔ́ŋ, nɑ tɛtʋ kite nyɑ́ wei nn ciɣitiɣi tɔ.
Ɩ́ nɩɩ sɩ Tɑcɑɑ kɑlǝɣǝnɑ ɩ yǝlɑɑ
nɑ ɩ́ pɔɔsǝɣɩ-wɛɣɛ pɑ kʋlɑpʋtʋ sɩ:
3 Mɑ yǝlɑɑ mɛ,
ɩsɑɣɑtʋ ntiɣi mɑ lɑpɑ mɛ?
Wenteɣe mɑ tʋ-mɛ nɑ tǝ́ tɛɛ-mɛ?
Ɩ́ cɔ-m.
4 Anɩ mɑ cɛpɑ-mɛɣɛ mǝ yomle tɑɑ kɛ́ Icipiti.
Mɑ lǝsɑ-mɛ nɑ mɑ́ kpɑ Moisi nɑ Alɔŋ nɑ Mɑlǝyɑm,
nɑ pɑ́ pɑɑsǝnɑ-mɛ.
5 Ɩ́ tɔɔsɩ ɩsɑɣɑtʋ nti Mowɑpʋ wulɑʋ
Pɑlɑkɩ cɑɑkɑɣɑ-mɛɣɛ lɑpʋ tɔ,
nɑ nti Peyɔɔ pǝyɑlʋ Pɑlɑɑm cɔ-ɩ tɔ.
Ɩ́ tɔɔsɩ ɩsǝnɑ mɑ tɛsǝnɑ-mɛɣɛ Yɑɑtɑnɩ pɔɣɔ tɔ.
Sitim nɑ Kilikɑɑ pɑ hɛkʋ kɛ mɑ lɑpɑ-mɛɣɛ kʋpɑntʋ.
Mpi Tɑcɑɑ cɑɑnɑ yǝlɑɑ tɔ
6 Ɩ́ pɔɔsǝɣɩ mǝ tɩ sɩ
ye ɩ́ kɔŋ Tɑcɑɑ Tomɑ tǝnɑ tʋ sɛɛʋ,
pǝnɑɣɑ kʋlʋmɑɣɑ kʋlʋmɑɣɑ nɑɑŋ kɛ
ɩ́ kɑ́ lɑpɩ-ɩ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ,
7 yɑɑ ɩwɑɑŋ tuutuumɑ, nɑ nim kɛ sɔsɔm,
yɑɑ mǝ kɑncɑɑlɑɣɑ piyɑ kɛ mɑ tɑŋɑɑ sɩ
ɩ́ lɑ-m kɔtɑɣɑ nɑ pǝ́cɔ́ mɑ́ tɑɣɑnɩ mǝ ɩsɑɣɑtʋ nɑ?
8 Pɑ sɛɣɛsɑ-mɛɣɛ ɩsǝnɑ mɑ cɑɑkɩ sɩ
ɩ́ tǝŋ tɑmpɑnɑ tɔ.
Ɩlɛnɑ ɩ́ lɑkɩ tǝmɑɣɑ kʋpɑntʋ nɑ ɩ́ pɑsɑ
mǝ tɩ nɑ mɑnɑ-mɛ tǝ́ tɔŋ.
Ɩsɔ kɑ́ hʋʋnɑ ŋmɩɩlɑɑ nɑ mʋsʋŋtʋnɑɑ
9 Yutɑ yǝlɑɑ mɛ mpɑ mǝ tǝnɑ
ɩ́ kotɑ ɩcɑtɛ tɑɑ tɔ ɩ́ nɩɩ.
Mɛɣɛ mɑ yɔɣɔtǝɣǝnɑ
nɑ mɑ wɑɑsǝɣɩ mpɑ pɑ wɛnɑ mɑ sɔɣɔntʋ tɔ.
10 Pǝ fɛɩ-m teu sɩ
ɑsɑɣɑɑ ɩ́ kɑɑ pɑ tɛɛsɩ tɑɑ kɛ́
pɑ ŋmɩɩlǝm wɛnɑʋ, nɑ pɑ́ lɑkǝnɑ.
Mɑɑ cɑɑkɩ mǝ mpusi mɑɣɑsǝlɑɣɑ kʋtʋsɑɣɑ.
11 Mɑ kɑɑ hʋlɩ suulu kɛ yǝlɑɑ mpɑ
pɑ lɑkǝnɑ sɑnǝyɑnɑɑ mpɑ pɑ tɑ tǝŋ tɔ.
12 Mʋsʋŋ ɑkpɑɑ kɛ ɩcɑtɛ tǝnɛ tǝ toŋtʋnɑɑ tǝŋǝɣɩ.
Mǝ tǝnɑ ɩ́ kɛ́ tʋsʋlɑɑ.
13 Tɔʋ, mɑ nɑɑlɑ-mɛɣɛ lɑpʋ ntɛ́ mpi
pɩɩ wɑkǝlɩ-mɛ tɔɣɔ mǝ ɩsɑɣɑtʋ tɔɔ.
14 Ɩ́ kɑ́ tɔɣɔ ɩ́ kɑɑ hɑɣɑ,
pɑɑ wiliɣi nyɔɣɔsɩ kɛ mǝ tɛɣɛ tɑm.
Pɑɑ mpiɣi ɩ́ kɑ́ ŋmɛsɩ ɩsɩɩ mɑ kɔnɑ
yoou nɑ kʋ wɑkǝlɩ-wɩ.
15 Ɩ́ kɑ́ tuu ɩ́ kɑɑ kʋ,
Ɩ́ kɑ́ mʋlɩ nim, ɩ́ kɑɑ lɑnɑ-wɩ.
Ɩ́ kɑ́ puu sʋlʋm ɩ́ kɑɑ nyɔɔ-wɩ.
16 Wulɑʋ Omili nɑ ɩ pǝyɑlʋ Akɑpɩ,
nɑ ɩ piitim pɑ ɩkpɑtɛ ɩsɑɣɑlɛ kɛ
ɩ́ tɔkɑɑ tǝkem nɑ ɩ́ tǝŋǝɣɩ.
Pǝ tɔɔ kɛ́ mɑɑ yele nɑ mǝ ɩcɑtɛ
pǝsɩ ncɑɑlɛ nɑ pɑ́ woŋiɣi-mɛ.
Ɩ́ kɑ́ tɔɣɔ mɑ yǝlɑɑ tǝnɑ fɛɛlɛ.