13
Mǝtutuunɑ tɔm
(Mɑlǝkɩ 4:1-9; Luku 8:4-8)
1 Ḿpʋ́ɣʋ́ kʋyɑkʋ ŋkʋ Yesu kʋlɑ tǝyɑɣɑ nɑ ɩ́ polo lʋm nɔɣɔ nɑ ɩ́ cɑɣɑ nɑ ɩ́ sɛɣɛsǝɣɩ.
2 Tǝnɑɣɑ yǝlɑɑ kotɑ ɩ kiŋ kɛ sɔsɔm pǝ fɛɩ kɛɛsʋɣʋ. Hɑlǝnɑ ɩ́ kʋlɩ nɑ ɩ́ kpɑ kpɩɩlʋɣʋ tɑɑ nɑ ɩ́ cɑɣɑ. Nɑ yǝlɑɑ nɑ́ɑ́ sǝŋɑ lʋm nɔɣɔ.
3 Ɩlɛnɑ ɩ́ lɑ-wɛɣɛ fɑɑci kɛ teu nɑ ɩ́ sɛɛkɩ-wɛɣɛ ɩsɔnɑɑ sɩ pɑ́ cɛkǝnɑ. Ɩlɛnɑ ɩ́ tɔ sɩ: Tuulu polǝnɑ tuutu.
4 Ɩ tuukɑɣɑ ɩ mǝtutuunɑ ɩlɛnɑ, lɛnnɑ hoti mpɑɑʋ nɔɣɔ nɔɣɔ nɑ sumɑsɩ tii nɑ sɩ tɔɔsɩ-yɛ.
5 Ḿpʋ́ɣʋ́ lɛnnɑ hotɑ kʋwɑʋ tɔɔ timpi tɛtʋ tɑ lim tɔ. Ɩlɛnɑ ɑ tǝŋnɑ nyɔʋ kɛ tɛtʋ wɛ tǝtɑɣɑsɑm tɔ pǝ tɔɔ.
6 Ilim kɔmɑ nɑ pǝ́ hɑŋ nɑ pǝ́ nyɑɣɑ mǝhoo, ɩlɛnɑ ɑ wʋlɩ, kɛ ɑ tɑ hiki tɛtʋ sɩ ɑ kɑ hoosi kʋpɑŋsɩ tɔ pǝ tɔɔ.
7 Pee lɛnnɑ nɑ́ɑ́ hoti sɔwɑ tɑɑ nɑ ɑlɛ ɑ nyɔ ɩsɩɩ ɑ kɑ kʋlɩ teu, ɩlɛnɑ sɔwɑ fɛtɛ-yɛ nɑ ɑ kpisi lʋlʋɣʋ.
8 Amɑ pee lɛnnɑ nɑ́ hotɑ tɛtʋ mʋsʋŋ nyǝntʋ tɑɑ nɑ ɑlɛ ɑ́ lɑ́ teu, lɛnnɑ nɑ́ɑ́ lʋlɩ sɔsɔm sɔsɔm, lɛnnɑ kɛ mɑɣɑnɑ, lɛnnɑ kɛ pǝcɔ.
9 Yesu tɛmɑ ḿpʋ́ɣʋ́ yɔɣɔtʋɣʋ ɩlɛnɑ ɩ́ cuɣusi sɩ: Ye ɩ́ kɛ́ tɔm nɩɩlɑɑ ɩ́ nɩɩ.
Yesu sɛɣɛsʋɣʋ nɑ ɑtuwɑ nyʋɣʋ
(Mɑlǝkɩ 4:10-12; Luku 8:9-10)
10 Tǝnɑɣɑ Yesu ɩfɑlɑɑ polɑ ɩ kiŋ nɑ pɑ́ pɔɔsɩ-ɩ sɩ: Pepe tɔɔ kɛ́ n tukiɣi-wɛɣɛ ɑtuwɑ kɛ kʋtuku?
11 Ḿpʋ́ɣʋ́ ɩ cɔ-wɛ sɩ: Mɛ pǝ hɑ-mɛɣɛ sɩ ɩ́ nyɩ ɩsɔtɑɑ Kɑwulɑɣɑ tɔm kʋŋmɛsǝtʋ. Amɑ pǝ kɑɑsɑ lɛlɑɑ tɔ, pɛlɛ pɑ tɑ hiki tǝ nyǝm.
12 Pǝ tɑɣɑ pʋlʋ tɔɔ, wei ɩ wɛnɑ tɔ pɑɑ sɔɔsɩ-ɩ nɑ pǝ́ tɔlǝnɑ-ɩ tǝhɔ. Amɑ wei ɩ fɛɩnɑ tɔ pɑɑ lɛɛkɩ pǝciimɑɣɑ wei ɩ wɛnɑ tɔ.
13 Pǝ tɔɔ kɛ́ mɑ tukiɣi-wɛɣɛ ɑtuwɑ kɛ kʋtuku. Mpi tɔ, pɑ nyǝnǝɣɩ pɑɑ nɑɑ, pɑ keŋ ŋkpɑŋŋ pǝyele pɑɑ nɩɩkɩ, pɑɑ cɛkǝɣǝnɑ.
14 Tǝ mɑɣɑmɑɣɑ kɛ Ɩsɑyii kɑ nɑ́ lɔŋ nɑ ɩ́ yɔɣɔtɩ sɩ:
Ɩ́ kɑ nɩɩ teu yɑɑ, ɑmɑ ɩ́ kɑɑ cɛkǝnɑ.
Ɩ́ kɑ́ nyǝnɩ teu yɑɑ, ɑmɑ ɩ́ kɑɑ nɑ.
15 Pǝ tɑɣɑ pʋlʋ tɔɔ,
yǝlɑɑ pɑnɛ pɑ lǝmɑɣɑsɛɛ sǝpɑ.
Pɑ tǝkɑ pɑ ŋkpɑŋŋ,
pɑ wiisɑ pɑ ɩsɛ sɩ pɑ ɩsɛ ɩ́ tɑɑ nɑ,
pɑ ŋkpɑŋŋ ɩ́ tɑɑ nɩɩ.
Sɩ pɑ́ tɑɑ cɛkǝnɑ pǝ yɑɑsi.
Pǝ́ tɑɑ kɔɔ pɑ́ pǝsǝnɑ mɑ tɔɔ.
Nɑ mɑ́ lɑ́ nɑ pǝ́ wɑɑ-wɛ.
Ɩsɔ yɔɣɔtǝnɑ mpʋ yoo.
16 Ye mɛ ɩlɛ, mǝ nɩɩ leleŋ kɛ́. Pǝ tɑɣɑ pʋlʋ tɔɔ, mǝ ɩsɛ nɑɑkɩ nɑ mǝ ŋkpɑŋŋ nɩɩkɩ.
17 Mɑ heeliɣi-mɛɣɛ tɑmpɑnɑ tǝfoo sɩ Ɩsɔ kʋyɔɣɔtʋtʋ tɛlǝsǝlɑɑ pɑɣɑlɛ nɑ Ɩsɔ yǝlɑɑ tɑɑ pɑɣɑlɛ nyɩɩlɑ teu sɩ pɑ́ nɑ́ mpi ɩ́ nɑɑkɩ ɩsǝntɔ tɔ, pɑ tɑ nɑ. Pɑ nyɩɩlɑɑ sɩ pɑ́ nɩɩ nti ɩ́ nɩɩkɩ ɩsǝntɔ tɔ, pɑ tɑ nɩɩ.
Yesu kilisuɣu kɛ mǝtutuunɑ hʋwɛɛ
(Mɑlǝkɩ 4:13-20; Luku 8:11-15)
18 Tɔʋ, pǝnɛntɛ ɩ́ yele nɑ mɑ́ kilisi-mɛɣɛ ɩsɔ wei mɑ sɛɛ-mɛɣɛ mpʋ tɔ ɩ hʋwɛɛ ɩlɛ.
19 Mpɑ pɑ nɩɩkɩ Ɩsɔ Tɔm nɑ pɑ́ tɑ cɛkǝnɑ-tɩ tɔ pɑ wɛɛ kɛ́ ɩsɩɩ mpɑɑʋ kpeeŋɑ tɛtʋ nti tǝ tɔɔ mǝtutuunɑ hotɑɑ tɔ. Ɩsɑɣɑtʋ tʋ tǝŋǝɣɩ kpɑkpɑɑ kɛ́ nɑ ɩ́ lǝsɩ tɔm nti pɑ nɩɩ mpʋ tɔɣɔ pɑ tɑɑ.
20 Lɛlɑɑ nɑ́ wɛ ɩsɩɩ kʋwɑʋ tɔɔ timpi pee lɛnnɑ hʋtɑɑ tɔ. Pɛlɛɣɛlɛ mpɑ pɑ nɩɩkɩ Ɩsɔ Tɔm nɑ pɑ́ mʋ-tǝɣɩ kpɑkpɑɑ nɑ lɑŋhʋlʋmlɛ.
21 Pɑɑ yeki sɩ tǝ́ sʋʋnɑ-wɛɣɛ teu. Pɑ tɔkǝɣɩ-tǝɣɩ tǝtɑntɑɑ. Sɑɑ wei wɑhɑlɑ nɔɣɔlʋ ɩ kɑ́ tɑlɑ, yɑɑ Ɩsɔ Tɔm tɔɔ kʋnyɔŋ tʋɣʋ kɑ kɔɔ, ɩlɛnɑ pɑ́ lɩɩ Ɩsɔ sɛɛʋ tɑɑ kɛ́ kpɑkpɑɑ.
22 Lɛlɑɑ nɑ́ nǝɣǝsǝnɑ wenɑ ɑ hotɑ sɔwɑ tɑɑ tɔ. Mpi tɔ, pɑ tɛŋ Ɩsɔ Tɔm nɩɩʋ ɩlɛnɑ ɑtɛ cǝnɛ kʋlɑpʋtʋ nǝɣǝsɛɛ nɑ wɛnɑʋ kʋnyɩɩlʋɣʋ puɣusi-wɛ nɑ pǝ́ kʋ tɔm ntǝɣɩ pɑ tɑɑ, nɑ tǝ́ cɑŋ tǝ́ kpisi lʋlʋɣʋ.
23 Pǝ kɑɑsɑ pee lɛnnɑ nɑ́ hotɑ tɛtʋ mʋsʋŋ nyǝntʋ tɑɑ. Aŋhɑɑ, ɑlɛ ɑ wɛnnɑ ntɛ́ ɩsɩɩ yǝlɑɑ mpɑ pɑ nɩɩkɩ Ɩsɔ Tɔm nɑ pɑ́ cɛkǝnɑ-tǝɣɩ teu nɑ pɑ́ lʋlǝɣɩ pee tɔ. Lɛlɑɑ kɛ sɔsɔm sɔsɔm, lɛlɑɑ kɛ mɑɣɑnɑ, nɑ lɛlɑɑ kɛ pǝcɔ.
Nyɩɩtʋ ɩsɑɣɑtʋ
24 Ḿpʋ́ɣʋ́ Yesu tɑsɑ-wɛɣɛ ɩsɔ sɛɛʋ tɔtɔ sɩ: Ɩsɔtɑɑ Kɑwulɑɣɑ nǝɣǝsǝnɑ ɩsǝnɑ tɔɣɔlɔ. Apɑlʋ nɔɣɔlʋ ɩ tuunɑ ɩ hɑlǝm nɑ ɩ́ tɛɛ.
25 Ḿpʋ́ɣʋ́ ɩ kolontu kɛɛsɑ ɑhoo hɛkɑ kɛ wɑɑtʋ wei yǝlɑɑ tǝnɑ tookɑɣɑ tɔ, ɩlɛnɑ ɩ́ tuu nyɩɩtʋ ɩsɑɣɑtʋ kɛ kʋtɔɣɔʋ hɛkʋ nɑ ɩ́ tɛɛ.
26 Pǝ kɔmɑ nɑ kʋtɔɣɔʋ kʋlɩ nɑ kʋ pɩɩ, ɩlɛnɑ pɑ́ tuti nyɩɩtʋ ɩsɑɣɑtʋ tǝlɛ tɔtɔ.
27 Tǝnɑɣɑ tɑɑlɛ ńtɛ́ tǝ tʋ pǝyɑlɑɑ pɔɔsɑ-ɩ sɩ: Tɑcɑɑ pǝ tɑɣɑ kʋtɔɣɔʋ kɛ n kɑ tuu nyɑ́ tɑɑlɛ tɑɑ? Pǝ lɑpɑ ɩsǝnɑ nɑ nyɩɩtʋ ɩsɑɣɑtʋ siti pǝ hɛkʋ tɑɑ?
28 Tǝnɑɣɑ pɑ cɑɑ cɔ-wɛ sɩ: Mɑ kolontu nɔɣɔlʋ ɩ lɑpǝnɑ mpʋ. Ḿpʋ́ɣʋ́ ɑpɑlʋ ɩnɩ ɩ pǝyɑlɑɑ mpɛ pɑ pɔɔsɑ-ɩ sɩ: Tǝ́ polo nɑ tǝ́ kpɛsɩ nyɩɩtʋ ɩsɑɣɑtʋ ntɩ?
29 Ɩlɛnɑ ɑpɑlʋ ɩnɩ ɩ́ cɔ-wɛ sɩ: Aɑɩ, ɩ́ tɑɑ kpɛsɩ. Ye ɩ́ tɔmɑ sɩ ɩ́ kpɛsǝɣɩ-tɩ, ntɑnyɩ pɩɩ kpɛŋnɑ kʋtɔɣɔʋ nɑ pǝ́ kpɛsɩ.
30 Ɩ́ yele nɑ pǝ tǝnɑ pǝ́ kpɛntɩ pɩɩʋ kɛ mpʋ, hɑlǝnɑ pǝ tɑlɑ kʋm. Pǝ́ tɑlɑ kʋm ɩlɛ mɑɑ heeli kʋntɑɑ sɩ pɑ́ cɑɑlǝnɑ nyɩɩtʋ ɩsɑɣɑtʋ kɛ sɛtʋɣʋ nɑ pɑ́ hɔkɔ-tɩ tǝcɑpɩ tǝcɑpɩ, nɑ pɑ́ tʋ kɔkɔ. Ɩlɛnɑ pǝ́cɔ́ pɑɑ kpɑɣɑ kʋtɔɣɔʋ nɑ pɑ́ tʋ mɑ kpou tɑɑ.
Sɔɔɣɑ pile tɔm
(Mɑlǝkɩ 4:30-32; Luku 13:18-19)
31 Ḿpʋ́ɣʋ́ Yesu tɑsɑ-wɛɣɛ kɛɛsʋɣʋ sɩ: Ɩsɔ Kɑwulɑɣɑ wɛɛ kɛ́ ɩsɩɩ yʋlʋ tuukuɣu sɔɔɣɑ pile kɛ ɩ hɑlǝm tɑɑ tɔ.
32 Wontu pee tǝnɑ tɑɑ ńtɛ́ tǝ kǝlǝnɑ wɛɛʋ tǝminimini. Amɑ tǝ tɛŋ nyɔʋ tɔ tǝ pɩɩkɩ tʋɣʋ kɛ́ nɑ tǝ́ kǝlɩ tuusi lɛnsɩ. Hɑlǝnɑ sumɑsɩ kɔŋ nɑ sɩ́ tʋɣɩ tɑnɑ kɛ kʋ piliŋɑsɩ tɔɔ.
Potopoto tɑɑ kʋkʋsʋm tɔm
(Luku 13:20-21)
33 Ḿpʋ́ɣʋ́ Yesu tɑsɑ-wɛɣɛ heeluɣu sɩ: Ɩsɔtɑɑ Kɑwulɑɣɑ nǝɣǝsǝnɑ kɛ́ ɩsɩɩ ɑlʋ mɑɣɑsʋɣʋ mʋlʋm kɛ cɛmsɛ tǝpɑm, nɑ ɩ́ kpɑɣɑ kʋkʋsʋm kɛ pǝcɔ nɑ ɩ́ tʋ nɑ ɩ́ huɣuti, nɑ pǝ tǝnɑ pǝ́ kpɑ tǝfʋʋ tɔɣɔ.
Yesu tukuɣu kɛ ɑtuwɑ
(Mɑlǝkɩ 4:33-34)
34 Tɔmnɑɑ pɑnɛ, Yesu yɔɣɔtɑɣɑ-wɛɣɛ sɑmɑɑ tɑɑ tɔ nɑ ɑtuwɑ kɛ́. Ɩ tɑ sɛɣɛsɩ-wɛɣɛ nɑtǝlǝɣɩ yem nɑ ɩ́ tɑ kɛɛsǝnɑ pʋlʋ.
35 Ɩ lɑkɑɣɑ ḿpʋ́ɣʋ́ sɩ pǝ́ lɑ nti Ɩsɔ kʋyɔɣɔtʋtʋ tɛlǝsʋlʋ kɑ yɔɣɔtɑɑ tɔ sɩ:
Atuwɑ kɛ mɑɑ yɔɣɔtǝnɑ-wɛ.
Mɑɑ heeli-wɛɣɛ tɔmnɑɑ mpɑ pɑɑ wɛ
ɩŋmɛsɑʋ kɛ hɑtoo ɑntulinyɑ lɑpʋ wɑɑtʋ tɔ.
Yesu kilisuɣu kɛ nyɩɩtʋ ɩsɑɣɑtʋ tɔm hʋwɛɛ
36 Ḿpʋ́ɣʋ́ Yesu yelɑ sɑmɑɑ nɑ ɩnɩ ɩ́ polo tǝyɑɣɑ. Ɩlɛnɑ ɩ ɩfɑlɑɑ polo ɩ kiŋ nɑ pɑ́ tɔmɩ-ɩ sɩ: Kilisi-tʋɣʋ hɑlǝm tɑɑ nyɩɩtʋ ɩsɑɣɑtʋ ntɩ tǝ tɔm nɑ tǝ́ nɩɩ.
37 Tǝnɑɣɑ Yesu cɔ-wɛ sɩ: Kʋtɔɣɔʋ tuulu ntɛ́ Yʋlʋ Pǝyɑɣɑ mɑ.
38 Nɑ ɑntulinyɑ ɩnɛɣɛlɛ tɑɑlɛ ńtɛ́. Nɑ mpi pɑ tuuwɑ tɔɣɔlɛ mpɑ pɑ kɛ́ Ɩsɔ Kɑwulɑɣɑ nyǝ́mɑ tɔ. Nyɩɩtʋ ɩsɑɣɑtʋ ntɛ́ mpɑ pɑ kɛ́ Ɩsɑɣɑtʋ tʋ nyǝ́mɑ tɔ.
39 Kolontu wei ɩ tuu nyɩɩtʋ ntɩ tɔɣɔlɛ Ɩlɔɣɔʋ. Nɑ kʋmtʋ wɑɑtʋ kɛlɛ ɑntulinyɑ tɛm. Ɩsɔtɑɑ tillɑɑ ntɛ́ kʋntɑɑ.
40 Ɩsɩɩ pɑ tɔɔsʋɣʋ nyɩɩtʋ nɑ pɑ́ tʋ kɔkɔ tɔ, ḿpʋ́ɣʋ́ pɩɩ lɑ ɑntulinyɑ tɛm wɑɑtʋ.
41 Yʋlʋ Pǝyɑɣɑ mɑ́ mɑɑ tili mɑ ɩsɔtɑɑ tillɑɑ, nɑ pɑɑ lǝsɩ mɑ Kɑwulɑɣɑ tɑɑ kɛ́ mpɑ pɑ tusiɣi lɛlɑɑ kɛ ɩsɑɣɑtʋ lɑpʋ tɑɑ nɑ mpɛ pɑ mɑɣɑmɑɣɑ pɑ lɑkɩ mpi pǝ fɛɩ teu tɔ.
42 Nɑ pɑ́ tʋ-wɛɣɛ kɔkɔ sɔsɔɔŋkɑ tɑɑ timpi pɑɑ cɑsǝɣɩ kɑpusi nɑ pɑ́ nyɑsǝɣɩ pɑ tǝɣɩ kelɑ tɔ.
43 Nɑ sɑɑ ɩnɩ mpɑ pɑ nɩɩkǝnɑ Ɩsɔ tɔ, pɛlɛ pɑɑ tee kɔkɔ kɛ pɑ Cɑɑ Kɑwulɑɣɑ tɑɑ ɩsɩɩ ilim. Ye ɩ́ kɛ́ nɩɩlɑɑ ɩ́ nɩɩ.
Kʋpɑm mpi pǝ ŋmɛlɑɑ tɔ
44 Ɩsɔtɑɑ Kɑwulɑɣɑ wɛɛ kɛ́ ɩsɩɩ pɑ ŋmɛsʋɣʋʋ liɣitihutɑɣɑ pʋlʋɣʋ tɛtʋ tɛɛ, nɑ nɔɣɔlʋ kɔɔ nɑ ɩ́ hii-wɩ, nɑ ɩ́ tɑɣɑnɩ-wǝɣɩ ŋmɛsʋɣʋ kɛ teu. Ɩlɛnɑ ɩ́ tɛɛnɑ lɑŋhʋlʋmlɛ nɑ ɩ́ polo ɩ́ pɛɛtɩ pǝ tǝnɑ mpi ɩ wɛnɑ tɔ nɑ ɩ́ kɔɔ ɩ́ yɑnɑ tɛtʋ ntɩ tɔ.
Lɩɩlʋɣʋ kʋpɑŋkʋ tɔm
45 Ɩsɔtɑɑ Kɑwulɑɣɑ wɛɛ kɛ́ ɩsɩɩ pɑɣɑtʋlʋ wei ɩ pɛɛkǝɣɩ lɩɩtʋ kʋpɑntʋ tɔ.
46 Wɑɑtʋ wei ɩ suliɣinɑ nɑkʋlɩ ɩlɛnɑ ɩ́ pɛɛtɩ pǝ tǝnɑ mpi ɩ wɛnɑ tɔ nɑ ɩ́ yɑnɑ-kʋ.
Kʋpɑmɑ nɑ ɑsɑɣɑɑ pɑ fɑɣɑʋ
47 Ɩsɔtɑɑ Kɑwulɑɣɑ wɛɛ kɛ́ ɩsɩɩ pɑ pɛtʋɣʋ tiinɑ puluɣu kɛ lɩɩlɛ tɑɑ nɑ pǝ́ kpɑ tiinɑ kɛ yem yem tɔ.
48 Puluɣu suɣi ɩlɛnɑ tiinɑ kpɑlɑɑ hɔ-kʋ nɑ pɑ́ lɩɩnɑ kpeeŋɑ, nɑ pɑ́ cɑɣɑ nɑ pɑ́ tɔɔsɩ mpi mpi pǝ wɛ teu tɔ nɑ pɑ́ tʋ tɔkʋ tɑɑ. Pǝ kɑɑsǝɣɩ mpi pǝ fɛɩ teu tɔ, ɩlɛnɑ pɑ́ mǝlǝnɑ nɑ pɑ́ pɛtɩ lʋm tɑɑ.
49 Mpʋ tɔtɔɣɔ pɩɩ lɑ ɑntulinyɑ tɛm wule. Ɩsɔtɑɑ tillɑɑ kɑ kɔɔ nɑ pɑ́ tɔɔsɩ kʋpɑmɑ.
50 Pǝ kɑɑsǝɣɩ ɑsɑɣɑɑ ɩlɛnɑ pɑ́ tʋ kɔkɔ sɔsɔɔŋkɑ tɑɑ. Tǝnɑɣɑ pɑɑ cɑsǝɣɩ kɑpusi nɑ pɑ́ nyɑsǝɣɩ pɑ tǝɣɩ kelɑ.
Kʋpɑntʋ kʋpǝntʋ nɑ kʋfɑtʋ
51 Ḿpʋ́ɣʋ́ Yesu pɔɔsɑ-wɛ sɩ: Ɩ́ cɛkǝnɑ tɔm ntɩ tǝ tǝnɑ nɑ? Ɩlɛnɑ pɛlɛ pɑ cɔ sɩ: Ɛɛ, tǝ cɛkǝnɑɑ.
52 Tǝnɑɣɑ ɩ tɔmɑ-wɛ sɩ: Ye Ɩsɔ Tɔm sɛɣɛsǝlʋ nɔɣɔlʋ ɩ pǝsɑ ɩsɔtɑɑ Kɑwulɑɣɑ tɑɑ ɩfɑlʋ, ɩ wɛɛ kɛ́ ɩsɩɩ tǝyɑɣɑ tʋ kʋpɑŋ wei ɩ lǝsǝɣɩ ɩ wontu tǝsɩɩlɛ kɛ kʋfɑtʋ nɑ nti tǝ tɑɑŋɑɑ tɔɣɔ wɑɑtʋ wɑɑtʋ tɔɣɔ.
Nɑsɑlɛtɩ nyǝ́mɑ kisuɣu kɛ Yesu
(Mɑlǝkɩ 6:1-6; Luku 4:16-30)
53 Yesu tɛmɑ-wɛɣɛ ɩsɔnɑɑ pɑnɛɣɛ sɛɛʋ, ɩlɛnɑ ɩ́ kʋlɩ tǝnɑ
54 nɑ ɩ́ polo ɩcɑtɛ nte tǝ tɑɑ ɩ kɑ pɩɩwɑ tɔ, nɑ ɩ́ sʋʋ tǝnɑ Yutɑ nyǝ́mɑ tǝkotile tɑɑ nɑ ɩ́ sɛɣɛsǝɣɩ. Tǝnɑɣɑ ɩ nyǝm lɑpɑ mpɑ pɑɑ wɛ tǝnɑ tɔɣɔ piti, nɑ pɑ́ tɔŋ sɩ: Leɣe ɩnɛ ɩ hikɑ nyǝm pǝnɛ ɩnɩ pǝ tɑkɑ? Leɣe ɩ hikinɑ piti tǝmɑ lɑpʋ tomɑ?
55 Pǝ tɑɣɑ kɑɑfǝntɑ pǝyɑlʋ ɩ́lɛ́ tɑɑ? Pǝ tɑɣɑ Mɑlɩ lʋlǝnɑ-ɩ? Pǝ tɑɣɑ ɩ newɑɑ ntɛ́ Sɑɑkɩ nɑ Yosɛɛfʋ nɑ Simɔŋ nɑ Yuti?
56 Pǝyele tɑ nɑ ɩ newɑɑ ɑlɑɑ nyǝ́mɑ tǝ wɛnnɑ. Leɣe ɩ hikinɑ tomɑ ɑnɛ ɩnɩ?
57 Pǝ tǝnɑɣɑ mpʋ pǝ lɑpɑ pɑ lɑŋɑ kɛ kpɩɩsǝŋ, nɑ pɑ́ kpisi Yesu tɔm mʋɣʋ. Tǝnɑɣɑ Yesu tɔmɑ-wɛ sɩ: Ɩsɔ kʋyɔɣɔtʋtʋ tɛlǝsʋlʋ tɑ lɑŋ sɑm kɛ tiili ye pǝ tɑɣɑ ɩ mɑɣɑmɑɣɑ ɩ ɩcɑtɛ tɑɑ, nɑ ɩ tǝyɑɣɑ nyǝ́mɑ hɛkʋ.
58 Yesu tɑ́ pǝsɩ nɑ ɩ́ lɑ́ piti tǝmɑ kɛ mɑwɑɑ nɔɣɔlʋɣʋ tǝnɑɣɑ pɑ tɑ tʋ Ɩsɔ kɛ́ nɑɑni tɔ pǝ tɔɔ.