19
Apɑlʋ nɑ ɑlʋ pɑ yɑʋ tɔm
(Mɑlǝkɩ 10:1-12)
Wɑɑtʋ wei Yesu tɛmɑ ḿpʋ́ɣʋ́ sɛɣɛsʋɣʋ, ɩlɛnɑ ɩ́ kʋlɩ Kɑlilee tɛtʋ nɑ ɩ́ tɛɛ Yutɑ tɛtʋ nti tǝ wɛ Yɑɑtɑnɩ wɑɑlɩ tɔ tǝ tɑɑ. Tǝnɑɣɑ sɑmɑɑ kɛ sɔsɔm tǝŋɑ-ɩ nɑ ɩ́ wɑɑ pɑ kʋtɔmǝŋ.
Ḿpʋ́ɣʋ́ Fɑlisɑnɑɑ nɑpǝlɩ pɑ polɑɑ sɩ pɑ kuuki Yesu nɔɣɔ, ɩlɛnɑ pɑ́ pɔɔsɩ-ɩ sɩ: Tɑ́ mpɑɑʋ tɑɑ yʋlʋ pǝsǝɣɩ nɑ ɩ́ tɔɣɔnɩ ɩ ɑlʋ kɛ nɑtǝlɩ tǝ tɔɔ?
Tǝnɑɣɑ Yesu pɔɔsɑ-wɛ sɩ: Ɩ́ tɑ kɑlɑ nti pɑ ŋmɑɑ Ɩsɔ Tɔm tɑɑ tɔ? Pɑ ŋmɑɑwɑɣɑ sɩ: Hɑtoo kɑncɑɑlɑɣɑ, ɑntulinyɑ ɩnɛ ɩ lɑtʋ lɑpɑ-wɛɣɛ ɑpɑlʋ nɑ ɑlʋ kɛ́. Ɩlɛnɑ ɩ́ tɔ sɩ: Mpʋ pǝ tɔɔ kɛ́ ɑpɑlʋ kɑ́ yele ɩ cɑɑ nɑ ɩ too nɑ ɩ́ nɑ ɩ ɑlʋ pɑ́ cɑɣɑ nɑ pɑ nɑɑlɛ pɑ́ pǝsɩ yʋlʋ kʋlʋm. Sɑɑ ɩnɩ ɑpɑlʋ nɑ ɑlʋ pɑ tɑ kɛ yǝlɑɑ nɑɑlɛ tɔtɔ. Amɑ pɑ pǝsɑ yʋlʋ kʋlʋm kɛ́ tǝkoŋ. Ye mpʋ ɩlɛ, yʋlʋ ɩ́ tɑɑ yɑsɩ mpi Ɩsɔ kpɛntɑɑ tɔ.
Ḿpɣʋ́ɣʋ́ Fɑlisɑnɑɑ pɔɔsɑ-ɩ sɩ: Pepe tɔɔ kɛ́ Moisi nɑɑ hɑ mpɑɑ sɩ ɑpɑlʋ pǝsǝɣɩ nɑ ɩ́ lɑ ɩ ɑlʋ kɛ kisuɣu tɑkǝlɑɣɑ nɑ ɩ́ tɔɣɔnɩ-ɩ?
Tǝnɑɣɑ Yesu cɔ-wɛ sɩ: Mǝ lɑŋkpɩɩsǝŋ tɔɔ kɛ́ Moisi kɑ hɑ-mɛɣɛ mpɑɑʋ sɩ ɩ́ tɔɣɔnɩ mǝ ɑlɑɑ. Amɑ hɑtoo kɑncɑɑlɑɣɑ pǝ tɑɑ wɛɛ mpʋ. Mɑ heeliɣi-mɛ tǝfoo sɩ, ye yʋlʋ tɔɣɔnɑ ɩ ɑlʋ nɑ pǝ́ tɑ́ kɛ́ sɩ ɑlʋ ɩnɩ ɩ́ lɑpɑ wɑsɑŋkɑlǝtʋ tɔ pǝ tɔɔ, ɩlɛnɑ ɑpɑlʋ tɛɛ nɑ ɩ́ kpɑɣɑ ɑlʋ lɛlʋ, pʋntʋ lɑpɑ wɑsɑŋkɑlǝtʋ kɛ́.
10 Tǝnɑɣɑ Yesu ɩfɑlɑɑ tɔmɑ sɩ: Ye ḿpʋ́ɣʋ́ pǝ wɛ ɑpɑlʋ nɑ ɑlʋ pɑ hɛkʋ, ɩlɛ pǝ kǝlɑ teu sɩ yʋlʋ ɩ́ cɑɣɑ ɩtɑntɛ ɩlɛ.
11 Ḿpʋ́ɣʋ́ Yesu cɔ-wɛ sɩ: Yǝlɑɑ tǝnɑ ɩɩ pǝsǝɣɩ nɑ pɑ́ mʋ sɛɣɛsʋɣʋ kʋnɛ. Amɑ mpɑ Ɩsɔ nɑ́ hɑ pǝ tomɑ tɔ pɛlɛ pɑ pǝsǝɣɩ. 12 Mpi pǝ kɑɣɑtǝɣɩ yǝlɑɑ kɛ ɑlɑɑ kpɑɣɑʋ tɔ pǝ wɛ ŋkɑŋkɑ kɛ́. Lɛlɑɑ kiŋ ɩlɛ, pɑ lʋlǝɣɩ-wɛɣɛ mpʋ nɑ pɑ́ fɛɩnɑ pɑ tɩ. Lɛlɑɑ ɩlɛ, yǝlɑɑ lɑpǝnɑ-wɛɣɛ kɑtɑɑsɩ. Pǝ kɑɑsɩ lɛlɑɑ nɑ́ kisɑ ɑlɑɑ kpɑɣɑʋ kɛ kʋkisu kɛ ɩsɔtɑɑ Kɑwulɑɣɑ tɔɔ. Ye wei ɩ kɑ́ pǝsɩ nɑ ɩ́ mʋ sɛɣɛsʋɣʋ kʋnɛ, ɩ́ mʋ-kʋ.
Piyɑ sǝkpesi kʋpɑntʋ kooluɣu tɔm
(Mɑlǝkɩ 10:13-16; Luku 18:15-17)
13 Yǝlɑɑ pukɑɣɑnɑ piyɑ kɛ́ sɩ Yesu ɩ́ tǝnɩ sɩ tɔɔ kɛ́ niŋ nɑ ɩ́ sǝlǝmǝnɑ-sǝɣɩ Ɩsɔ. Tǝnɑɣɑ ɩ ɩfɑlɑɑ kɑlǝnɑ sɩ kɔntɑɑ. 14 Ɩlɛnɑ Yesu tɔ ɩ ɩfɑlɑɑ sɩ: Ɩ́ yele nɑ piyɑ kɔɔ mɑ kiŋ, ɩ́ tɑɑ kɑɣɑtɩ-sɩ. Pǝ tɑɣɑ pʋlʋ tɔɔ, mpɑ pɑ wɛ ɩsɩɩ piyɑ tɔ mpɛ pɑ tǝnnɑ ɩsɔtɑɑ Kɑwulɑɣɑ.
15 Ḿpʋ́ɣʋ́ ɩ tǝnɑ niŋ kɛ sɩ tɔɔ. Ɩlɛnɑ ɩ́ kʋlɩ tǝnɑ nɑ ɩ́ tɛɛ.
Yʋlʋ toŋ tʋ tɔm
(Mɑlǝkɩ 10:17-31; Luku 18:18-30)
16 Ḿpʋ́ɣʋ́ ɑpɑlʋ nɔɣɔlʋ polɑ Yesu kiŋ nɑ ɩ́ pɔɔsɩ-ɩ sɩ: Tɑcɑɑ, kʋpɑntʋ ntiɣi pǝ wɛɛ sɩ mɑɑ lɑ nɑ mɑ́ hiki weesuɣu ŋku kɩɩ tɛŋ tɔ?
17 Ḿpʋ́ɣʋ́ Yesu cɔ-ɩ sɩ: Pepe tɔɔ kɛ́ n pɔɔsǝɣɩ-m kʋpɑntʋ tɔɔ? Yʋlʋ kʋlʋm tǝkoŋ kɛnɑ kʋpɑŋ. Ye n cɑɑ sɩ ń hiki weesuɣu, tǝŋ mpi pɑ kɛɛsɑ kʋsǝsɩɩtʋ tɑɑ tɔ. 18 Tǝnɑɣɑlɛ ɑpɑlʋ ɩnɩ ɩ pɔɔsɑ Yesu sɩ: Kɑsɩ ntiɣi pɑ kɛɛsɑɑ ye?
Ɩlɛnɑ Yesu cɔ ɑpɑlʋ ɩnɩ sɩ: Tɑɑ kʋ yʋlʋ, tɑɑ lɑ wɑsɑŋkɑlǝtʋ, tɑɑ ŋmɩɩlɩ, tɑɑ suu lɛlʋ kɛ tɔm. 19 Se nyɑ́ cɑɑ nɑ nyɑ́ too. Sɔɔlɩ nyɑ́ tɔɣɔntǝlɛ ɩsɩɩ nyɑ́ tɩ.
20 Tǝnɑɣɑ ɩfepu ɩnɩ ɩ tɔmɑ sɩ: Mɑ tɔkɑ kʋsǝsɩɩtʋ ntɩ tǝ tǝnɑɣɑ. Ɩlɛ pepeɣe pǝ kɑɑsɑ mɑ́ lɑ tɔtɔ? 21 Tǝnɑɣɑ Yesu tɔmɑ-ɩ sɩ: Ye n cɑɑ n te tǝkpɑtɑɑ, polo nɑ ń pɛɛtɩ pǝ tǝnɑ mpi n wɛnɑ tɔ nɑ ń tɑlɑ kʋnyɔntʋnɑɑ kɛ pǝ liɣitee, nɑ cele ń sʋʋ toŋ kɛ ɩsɔtɑɑ. Ń tɛmɑ mpʋ pǝ lɑpʋ ɩlɛ n kɔɔ nɑ ń tǝŋɩ-m.
22 Amɑ ɩfepu ɩnɩ ɩ nɩɩ mpʋ, ɩlɛnɑ ɩ lɑŋlɛ wɑkǝlɩ tǝtɔɣɔtɔɣɔ. Pǝ tɑɣɑ pʋlʋ tɔɔ, ɩ kɑ wɛnɑ kɛ́ pǝ tɩɩ fɛɩ.
23 Tǝnɑɣɑ Yesu tɔmɑ ɩ ɩfɑlɑɑ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsɩɣɩ, liɣitee tʋ ɩsɔtɑɑ Kɑwulɑɣɑ sʋʋʋ wɛ kɑtɛ kɛ́ pǝ tɩɩ fɛɩ. 24 Mɑ tɑsǝɣɩ-mɛɣɛ heeluɣu sɩ: Ɩsǝnɑ mpi pǝ wɛ yooyoo kɛ́ kɑtɛ sɩ ɩ́ sʋʋnɑ pǝnyɑlɑɣɑ pʋ́ʋ́ɣʋ́ nɑ ɩ́ lɩɩ tɔ, mpʋ tɔtɔɣɔ pǝ wɛ liɣitee tʋ kɛ kɑtɛ sɩ ɩ́ sʋʋ Ɩsɔ Kɑwulɑɣɑ tɑɑ, hɑlɩ pǝ tɩɩ tɛɛ mpʋ.
25 Ɩ ɩfɑlɑɑ nɩɩ tɔm ntɩ ɩlɛnɑ pǝ́ lɑ-wɛɣɛ piti nɑ pɑ́ tɔ sɩ: Ɩlɛ ɑwe kɑ tʋlǝnɑ ntɛɣɛ-tɩ ɩlɛ?
26 Tǝnɑɣɑ Yesu nyǝnɑ-wɛ, ɩlɛnɑ ɩ́ tɔ sɩ: Yǝlɑɑ kiŋ kɛ pǝ fɛɩ pǝsʋɣʋ. Amɑ Ɩsɔ ɩ́lɛ́, pǝ tǝnɑ tǝlɛʋ kɛ́.
27 Ḿpʋ́ɣʋ́ Piyɛɛ nɔɣɔ tǝkpɑʋ sɩ: Pepeɣe tɑɑ hiki ɩlɛ?
28 Ḿpʋ́ɣʋ́ Yesu cɔ-wɛ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, wɑɑtʋ wei Yʋlʋ Pǝyɑɣɑ mɑ mɑɑ cɑɣɑ mɑ teeli kumte tɔɔ kɛ́ ɑlǝsɑnnɑ tɑɑ tɔ, mɛ mpɑ ɩ́ tǝŋɑ-m mǝ nɑɑnʋwɑ nɑ nɑɑlɛ tɔ, ɩ́ kɑ́ cɑɣɑ mǝ kumlee tɔɔ tɔtɔ, nɑ ɩ́ hʋʋnɑ Ɩsɛɣɛlɩ kpekɑ nɑɑnʋwɑ nɑ nɑɑlɛɣɛ tɔm. 29 Nɑ pɑ tǝnɑ mpɑ pɑɑ yele pɑ tɛɛsɩ, yɑɑ pɑ tɑɑlʋnɑɑ, nɑ pɑ kɔɣɔnɑɑ, nɑ pɑ newɑɑ, yɑɑ pɑ cɑɑnɑɑ, yɑɑ pɑ toonɑɑ, yɑɑ pɑ piyɑ, yɑɑ pɑ tɑwɑ kɛ mɑ tɔɔ tɔ, pɑɑ hiki mpi mpi pɑ yelɑ mpʋ tɔ pǝ tɔm nɩɩnʋwɑ (100). Pǝyele pɑɑ hiki pɑ pɑɑ nyǝm kɛ weesuɣu ŋku kɩɩ tɛŋ tɔ kʋ tɑɑ. 30 Mpɑ pɑ wɛ lɔlɔ kɛ́ kɑɣɑnɑ tɔ pɑ tɑɑ pɑɣɑlɛ kɑ́ mǝlɩ wɑɑlɩ. Nɑ wɑɑlɩ nyǝ́mɑ tɑɑ pɑɣɑlɛ nɑ́ɑ́ mǝlɩ lɔlɔ.