22
Mpɑ pɑ yɑɑ tɔɣɔʋ nɑ pɑ́ kisi tɔ
(Luku 14:15-24)
1 Ḿpʋ́ɣʋ́ Yesu tɑsɑ ɩsɔnɑɑ sɛɛʋ kɛ mpɑ pɑ nɩɩkɑɣɑ ɩ tɔm tɔ sɩ:
2 Ɩɩ nɑɑ ɩsǝnɑ ɩsɔtɑɑ Kɑwulɑɣɑ nǝɣǝsǝnɑɑ tɔɣɔlɔ. Wulɑʋ nɔɣɔlʋ ɩ lɑpǝnɑ tɔɣɔnɑɣɑ kɛ ɩ pǝyɑlʋ ɑlʋ kpɑɣɑʋ tɔɔ.
3 Ḿpʋ́ɣʋ́ ɩ tilɑ ɩ tǝmlɛ nyǝ́mɑ sɩ: Ɩ́ polo ɩ́ yɑɑ mpɑ mɑ lɑpɑ tɔɣɔnɑɣɑ tɔ. Tǝnɑɣɑ pɛlɛ pɑ kisɑ kɔntɛ.
4 Ɩlɛnɑ ɩ́ tɑɣɑnɩ kʋfɑmɑ kɛ tiluɣu sɩ pɑ́ heeli mpɑ ɩ yɑɑ tɔɣɔʋ tɔ sɩ: Mɑ kʋ nɑɑŋ kɑtɑɑsɩ nɑ wontu nim nyǝntʋ, nɑ pǝ tǝnɑ pǝ tɛmɑ pɩɩʋ nɑ pǝ́ cɑɣɑɑ. Pɑ́ kɔɔ nɑ pɑ́ tɔɣɔ mɑ ɑkpɑɣɑlɛ tɔɣɔnɑɣɑ.
5 Amɑ mpɑ pɑ yɑɑ mpʋ tɔ pɑ tɑɑ nɔɣɔlʋ tɑ ke. Pɑɑ wei ɩ tɛɛ ɩ nyǝŋkʋ kɛ́. Ɩnɛɣɛ ɩ́lɛ́ ɩ tɑɑlɛ, ɩnɛɣɛ ɩ́lɛ́ ɩ kʋyɑkʋ.
6 Pǝ́ kɑɑsɩ lɛlɑɑ nɑ pɛlɛ pɑ́ kpɑ tillɑɑ mpɛ nɑ pɑ́ hʋ́lɩ́-wɛɣɛ kɑŋkɑŋsi nɑ pɑ́ kʋ-wɛ.
7 Tǝnɑɣɑ pǝ lɑpɑ wulɑʋ kɛ pɑ́ɑ́nɑ́ nɑ ɩ́ tili ɩ yoolɑɑ sɩ pɑ́ kʋ yʋlʋkʋlɑɑ mpɛ, nɑ ɩ́ sɔ pɑ ɩcɑtɛ.
8 Ɩ tɛmɑ mpʋ ɩlɛnɑ, ɩ́ heeli ɩ tǝmlɛ nyǝ́mɑ sɩ: Tɔʋ, ɑkpɑɣɑlɛ tɔɣɔnɑɣɑ pɩɩwɑ. Pǝyele mpɑ mɑ yɑɑwɑ tɔ pɑ lɑŋɑɑ.
9 Mpʋ tɔ ɩ́ polo nɔnɔɔsɩ sɔsɔɔnsɩ tɛɛ nɑ pɑ tǝnɑ mpɑ ɩ kɑ́ nɑ́ tɔ ɩ́ yɑɑ-wɛ sɩ pɑ́ kɔɔ nɑ pɑ́ tɔɣɔ.
10 Ḿpʋ́ɣʋ́ pɛlɛ pɑ tɛɛwɑ nɔnɔɔsɩ tɛɛ nɑ pɑ́ koti pɑ tǝnɑ mpɑ pɑ nɑwɑ tɔ, ɑsɑɣɑɑ nɑ pǝ kʋpɑmɑ kɛ mpʋ, nɑ yǝlɑɑ su ɑcimɑ kutuluɣu.
11 Ḿpʋ́ɣʋ́ wulɑʋ sʋʋwɑ sɩ ɩ nɑɑ mpɑ pɑ polɑ tɔɣɔʋ tɔ. Ɩlɛnɑ ɩ́ mɑɣɑnɑ nɔɣɔlʋ, ɩ tɑ suu ɑkpɑɣɑlɛ wontu.
12 Ɩlɛnɑ ɩ́ pɔɔsɩ-ɩ sɩ: Mɑ tɑɑpɑlʋ, ɩsǝnɑɣɑ ń sʋʋ cǝnɛ nɑ ń tɑ́ suu ɑkpɑɣɑlɛ wontu? Apɑlʋ ɩnɩ ɩ tɑ cɔ sɩ pʋlʋ.
13 Tǝnɑɣɑ wulɑʋ heelɑ ɩ tǝmlɛ nyǝ́mɑ sɩ: Ɩ́ hɔkɔ ɩ niŋ nɑ ɩ nɔɔhɛɛ nɑ ɩ́ polo ɩ́ pɛtɩ-ɩ sǝkpɛtʋɣʋ tɑɑ. Tǝnɑɣɑ ɩ kɑ́ cɑsɑ kɑpusi nɑ ɩ́ nyɑsǝɣɩ ɩ tǝɣɩ kelɑ.
14 Ɩlɛnɑ Yesu tɔ sɩ: Pɑ yɑɑ pɑɣɑlɛ, ɑmɑ pǝcɔɣɔ pɑ lǝsɑɑ.
Lom wulɑʋ sɔsɔ lɑmpuu tɔm
(Mɑlǝkɩ 12:13-17; Luku 20:20-26)
15 Ḿpʋ́ɣʋ́ Fɑlisɑnɑɑ cɑɣɑɑ nɑ pɑ́ sɛɣɛsɩ ɩsǝnɑ pɑɑ nyɩ Yesu kɛ́ kɑtɔkɑ nɑ tɔm kʋpɔɔsʋtʋ nɑ pɑ́ hiki-ɩ tɔ.
16 Ḿpʋ́ɣʋ́ pɑ tilɑ pɑ ɩfɑlɑɑ tɑɑ nɑpǝlɩ nɑ Helɔtɩ kpekǝle nyǝ́mɑ nɑpǝlɩ tɔtɔ sɩ pɑ́ polo nɑ pɑ́ tɔ Yesu sɩ: Tɑcɑɑ, tǝ nɑwɑ sɩ tɑmpɑnɑ kɛ n yɔɣɔtǝɣɩ nɑ ń sɛɣɛsǝɣɩ teu, nɑ ɩsǝnɑ mpi pǝ mɑɣɑmɑɣɑ Ɩsɔ cɑɑ sɩ yǝlɑɑ ɩ́ lɑ tɔ pǝ tɑmpɑnɑ kɛ n heeliɣi. Nn nyɑŋnɑ nti yǝlɑɑ hʋʋ tɔ, nɑ nn pɑɑsǝɣǝnɑ tɔɔ, pǝ́cɔ́ nn fɑɣɑsǝɣɩ yǝlɑɑ.
17 Pǝ wɛ mpʋ tɔ, tɑ mpɑɑʋ tɑɑ pǝ mʋnɑ pɑ́ fɛlɩ lɑmpuu kɛ Lom wulɑʋ sɔsɔ nɑ? Heeli-tʋɣʋ nti n hʋʋkɩ tɔ.
18 Amɑ Yesu nɑ́ tɛmɑ nyǝm kɛ pɑ hʋwɛɛ ɑsɑɣɛɛ. Ɩlɛnɑ ɩ́ pɔɔsɩ-wɛ sɩ: Cɛsǝlɑɑ mɛ, pepe tɔɔ kɛ́ ɩ́ nyǝkɩ-m kɑtɔkɑ.
19 Ɩ́ hʋlɩ-m liɣitee wenɑ ɩ́ fɛlǝɣɩ lɑmpuu tɔ nɑ mɑ́ nɑ́.
Ḿpʋ́ɣʋ́ pɑ lǝsɑ liɣitee nyǝɣǝlʋɣʋ nɑ pɑ́ cɛlɛ-ɩ.
20 Ɩlɛnɑ ɩ́ pɔɔsɩ-wɛ sɩ: Awe nyʋɣʋ fotoo nɑ ɩ hǝtɛ kɛ pɑ ŋmɑɑ pǝ tɔɔ cǝnɛ?
21 Ḿpʋ́ɣʋ́ pɑ cɔ-ɩ sɩ: Lom wulɑʋ sɔsɔ kɛ́.
Ḿpʋ́ɣʋ́ Yesu nɑ́ cɔ-wɛ sɩ: Ye mpʋ ɩ́ cɛlɑ Lom wulɑʋ sɔsɔ kɛ mpi ɩ tɩ tɔ, nɑ ɩ́ cɛlɑ Ɩsɔ ɩlɛɣɛ mpi ɩ́lɛ́ ɩ tɩ tɔ.
22 Pɑ nɩɩ tɔm tǝnɛ ɩlɛnɑ pǝ lɑ-wɛɣɛ piti kɛ sɔsɔm. Nɑ pɑ́ yele-ɩ nɑ pɑ́ tɛɛ.
Tɩɩ sɩ nɑ tǝ fe nɑ tǝ wɛɛ ɩsǝnɑ tɔ
(Mɑlǝkɩ 12:18-27; Luku 20:27-40)
23 Ḿpʋ́ɣʋ́ kʋyɑkʋ ŋkʋ kʋ mɑɣɑmɑɣɑ Sɑtusee nyǝ́mɑ nɑpǝlɩ pɑ kɔmɑ Yesu kiŋ. Sɑtusee nyǝ́mɑ mpɛ pɑ tɔŋɑɣɑnɑ sɩ pɑɑ pǝ lɑ ɩsǝnɑ sǝtɑɑ kɑɑ tɛ nɑ pɑ́ fe. Ḿpʋ́ɣʋ́ pɑ pɔɔsɑ Yesu
24 sɩ: Tɑcɑɑ, Moisi kɑ tɔmɑ sɩ ye yʋlʋ ɩ́ sǝpɑ nɑ ɩ́ fɛɩnɑ pǝyɑɣɑ, ɩ neu hɔŋ ɩ ɑlʋ kɛ leelu nɑ ɩ́ hikinɑ ɩ tɑɑlʋ sɔlʋ kɛ piyɑ.
25 Tɔʋ, yǝlɑɑ nɑɑtosompɔɣɔlɑɣɑ kɑ wɛ tɑ́ hɛkʋ, yʋlʋ nɑ ɩ newɑɑ. Ḿpʋ́ɣʋ́ tɑɑlʋ kpɑɣɑ ɑlʋ ɩlɛnɑ ɩ́ sɩ, ɩ fɛɩnɑ pǝyɑɣɑ. Ɩlɛnɑ ɩ́lɛ́ ɩ neu hɔ leelu.
26 Ḿpʋ́ɣʋ́ nɑɑlɛ nyǝŋ sǝpɑ, pǝyɑɣɑ fɛɩ, nɑ tooso nyǝŋ tɔtɔɣɔ mpʋ. Hɑlǝnɑ pǝ́ polo pǝ siɣili pɑ nɑɑtosompɔɣɔlɑɣɑ ŋkɛ kɑ tǝnɑɣɑ mpʋ tǝpɑɩ, nɔɣɔlʋ tɑ hikinɑ-ɩ pǝyɑɣɑ.
27 Pǝ wɑɑlɩ kɛ́ ɑlʋ ɩnɩ ɩ́lɛ́ ɩ tɛɛsɑ sǝpʋ.
28 Tɔʋ, sǝtɑɑ fem wule pɑ tɑɑ ɑweɣelɛ ɑlʋ tʋ? Mpi tɔ, pɑ nɑɑtosompɔɣɔlɑɣɑ ɩnɩ pɑ tǝnɑ pɑ kpɑɣɑnɑ-ɩ ɑlʋ.
29 Ḿpʋ́ɣʋ́ Yesu cɔ Sɑtusee nyǝ́mɑ mpɛ sɩ: Ɩ́ tɑ nyɩ Ɩsɔ Tɔm nɑ ɩ toŋ tɔɣɔ pǝ liɣitiɣi-mɛ.
30 Mpi tɔ, wɑɑtʋ wei sǝtɑɑ kɑ́ fe tɔ, ɑkpɑɣɑlɛ tɔm kɑɑ wɛɛ. Amɑ ɑpɑlɑɑ nɑ ɑlɑɑ pɑɑ wɛɛ kɛ́ ɩsɩɩ ɩsɔtɑɑ tillɑɑ wɛʋ tɔ.
31 Ye sǝtɑɑ fem tɔm ɩlɛ, ɩ́ tɑ kɑlɑ nti Ɩsɔ heelɑ-mɛ tɔ yɛɛ? Ɩ tɔmɑɣɑ sɩ:
32 Mɑ kɛ́ Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ kɛ́. Ɩsɔ kɛ́ weesuɣu nyǝ́mɑ nyǝŋ kɛ́, ɩ tɑ kɛ sǝtɑɑ Ɩsɔ.
33 Yǝlɑɑ sɑmɑɑ wei ɩ nɩɩ Yesu sɛɣɛsʋɣʋ ŋkʋ tɔ, pǝ lɑpɑ-wɛɣɛ piti.
Ɩsɔ kʋsǝsɩɩtʋ tɑɑ sɔsɔɔntʋ
(Mɑlǝkɩ 12:28-34; Luku 10:25-28)
34 Wɑɑtʋ wei Fɑlisɑnɑɑ nɩɩwɑ sɩ Yesu lɑpɑ nɑ Sɑtusee nyǝ́mɑ tɑ hiki kʋcɔcɔtʋ ɩlɛnɑ pɑ́ koti.
35 Ɩlɛnɑ pɑ tɑɑ Ɩsɔ Tɔm sɛɣɛsǝlʋ nɔɣɔlʋ ɩ́ kɔɔ sɩ ɩ́ kuuki Yesu nɔɣɔ. Ɩlɛnɑ ɩ́ pɔɔsɩ Yesu sɩ:
36 Tɑcɑɑ, Ɩsɔ kʋsǝsɩɩtʋ tɑɑ tɔm ntiɣilɛ sɔsɔɔntʋ?
37 Tǝnɑɣɑ Yesu cɔ-ɩ sɩ: N kɑ́ sɔɔlɩ Tɑcɑɑ nyɑ́ Ɩsɔ nɑ luɣu kʋlʋmʋɣʋ nɑ nyɑ́ lǝsɑɣɑ sʋʋ-ɩ tǝmɑmmɑm.
38 Kʋsǝsɩɩtʋ tɑɑ sɔsɔɔntʋ ntɛ́, nɑ ntɩ tǝ kǝlǝnɑ tǝ tǝnɑ.
39 Nɑ kʋkǝlǝtʋ lɛntɩ tɔtɔɣɔlɛ, sɩ n kɑ́ sɔɔlɩ nyɑ́ tɔɣɔntǝlɛ kɛ ɩsɩɩ nyɑ́ tɩ.
40 Tɔm nɑɑlɛ ɩnɛ ɩ tɔɔ kɛ́ Moisi kʋsǝsɩɩtʋ tǝnɑ nɑ Ɩsɔ kʋyɔɣɔtʋtʋ tɛlǝsǝlɑɑ tɔm tǝnɑ sǝŋɑɑ.
Tɑfiiti pǝyɑɣɑ ntɛ́ Mesii
(Mɑlǝkɩ 12:35-37; Luku 20:41-44)
41 Fɑlisɑnɑɑ kotɑ mpʋ, ɩlɛnɑ Yesu pɔɔsɩ-wɛ sɩ:
42 Ɩ́ hʋʋ suweɣe Mesii tɔɔ? Awe lʋlʋɣʋ tʋ kɛ-ɩ? Ḿpʋ́ɣʋ́ pɛlɛ pɑ cɔ-ɩ sɩ: Tɑfiiti lʋlʋɣʋ tʋ kɛ́.
43 Tǝnɑɣɑ Yesu pɔɔsɑ-wɛ sɩ: Ye pǝ wɛ mpʋ, ɩlɛ ɩsǝnɑɣɑ pǝ lɑpɑ nɑ Feesuɣu Nɑŋŋtʋ nɑ́ɑ́ lɑ́ nɑ Tɑfiiti yɑɑ-ɩ sɩ Tɑcɑɑ? Pǝ tɑɣɑ pʋlʋ tɔɔ, Tɑfiiti yɔɣɔtɑɑ sɩ:
44 Tɑcɑɑ Ɩsɔ heelɑ mɑ Sɔsɔ sɩ,
cɑɣɑ mɑ kɔŋkɔŋ tɑɑ,
hɑlǝnɑ mɑ́ kɔnɑ nyɑ́ kolontunɑɑ kɛ nyɑ́ nɔɔhɛɛ tɛɛ.
45 Ye Tɑfiiti nɑ́ yɑɑ-ɩ ɩ Sɔsɔ, ɩlɛ ɩsǝnɑɣɑ Mesii nɑ́ mǝlɑɑ nɑ ɩ́ kɛ́ Tɑfiiti lʋlʋɣʋ tʋ tɔtɔ?
46 Pɑ tɑɑ nɔɣɔlʋ tɑ pǝsɩ nɑ ɩ́ cɔ. Pǝ kpɑɣɑʋ kʋyɑkʋ ŋkʋ tɔ nɔɣɔlʋ ɩɩ nyɩɩlǝɣɩ sɩ ɩ pɔɔsɩɣɩ-ɩ tɔm.