1 Mɑ pəyɑlʋ, tɔ́kɩ mɑ kʋyɔɣɔtʋtʋ, nɑ ń sɩɩnɑ nyɑ́ təɣɩ mɑ kʋsəsɩɩtʋ. 2 Tɔ́kɩ mɑ kʋsəsɩɩtʋ nɑ ń hiki weesuɣu, nɑ ń feŋ mɑ kʋsɛɣɛsətʋ tɔɔ ɩsɩɩ nyɑ́ ɩsəpəle. 3 Tɑɑ yele nɑ tə́ fiti nyɑ́ niŋ tɑɑ. Tɔ́kɩ-təɣɩ hɑtoo nyɑ́ lotu tɑɑ. 4 Nyənɩ ləmɑɣɑsɛɛ ɩsɩɩ nyɑ́ newɑɣɑ nɑ lɑɣɑtʋ ɩsɩɩ nyɑ́ ceu. 5 Pɩɩ hɑtələnɑ-ŋ ɑlʋ kpɑɩ tʋ wei ɩ tʋsəɣɩ yəlɑɑ nɑ ɩ nɔɔleleŋ tɔ ɩ niŋ tɑɑ.

6 Kʋyɑkʋ nɑkʋlɩ mɑ səŋɑ mɑ kutuluɣu tɑɑ, nɑ mɑ́ nyənəɣənɑ pətote pɔ́ɔ́ŋ nɑ ɑwɑlɩ tɔɔ. 7 Ḿpʋ́ɣʋ́ mɑ́ nɑ́ ɩfepiyɑ mpɑ pɑ tɑ nyəntɑ pʋlʋ tɔ, nɑ pɑ tɑɑ kɛ́ ɩfepu wei ɩ fɛɩnɑ nyʋɣʋ tɔ. 8 Ḿpʋ́ɣʋ́ ɩ təŋɑ hɑpəlɛ nɑ ɩ́ tɑlɑ tə kpeeŋɑ tɔɔ timpi ɑlʋ wɑsɑŋkɑlɩ nɔɣɔlʋ ɩ kɑ səŋɑɑ tɔ. Ɩlɛnɑ ɩ́ təŋəɣənɑ ɑlʋ tɛ́ tɔɔ təpɑmm. 9 Pɩɩ kɛ́ tɑɑnɑɣɑ kɛ́, nɑ pə́ tɛmɑ yulutuɣu nɑ səkpɛtʋɣʋ tɛmɑ wɛɛʋ. 10 Ɩlɛ ɑlʋ nɔɣɔlʋ ɩ səŋəɣɩ-ɩ kɛlɛ, nɑ ɩ́ suuwɑ ɩsɩɩ ɑpɑlɑɑ tənɑ ɑlʋ, nɑ ɑcilɑɣɑtʋ suwɑ ɩ lotu tɑɑ. 11 Pə kʋlɑ ɩ nyʋɣʋ tɑɑ nɑ ɩ́ kpisi ɩ tɛɣɛ cɑɣɑlɛ. 12 Pɑɑ hɑpəlɛ tɔɔ, yɑɑ nɔnɔɣɔ tɛɛ, yɑɑ pɑɑ lé té, ɩ tɑŋɑɑ kɛ́. 13 Ḿpʋ́ɣʋ́ ɩ kpətənɑ ɩfepu nɑ ɩ́ kpipi-ɩ nɑ ɩ́ wɑɣɑlɩ-ɩ. Ɩlɛnɑ ɩ́ nyənɩ ɩ ɩsɛntɑɑ təpiŋŋ nɑ fɛɛlɛ fɛɩ, nɑ ɩ́ heeli-ɩ sɩ: 14 Sɑŋɑ mɑ lɑpɑ Ɩsɔ kɛ́ nɔɣɔ kʋlʋmɑɣɑ kpɛntʋɣʋ kɔtɑɣɑ ŋkɑ too mɑɑ sɩɩwɑ sɩ mɑɑ lɑ tɔ. 15 Pə tɔɔ kɛ́ mɑ lɩɩwɑ sɩ mɑ səŋəɣɩ-ŋ nɑ mɑ́ pɛɛkɩ-ŋ. Tɔʋ, mɑ nɑ-ŋ kɛlɛ. 16 Mɑ pɔwɑ mɑ kɑto tɔɔ kɛ́ Icipiti kpoŋkpontu toŋ nyəntʋ pɔɔŋ kʋcɔɔcɔləŋ kʋpɑŋ. 17 Nɑ mɑ́ yɔɣɔlɩ tulɑɑlʋnɑɑ kʋpɑmɑ mpɑ pɑ yɑɑkɩ sɩ Miili nɑ Alʋwɛɛ nɑ Kɑnɛɛlɩ tɔ. 18 Kɔɔ nɑ tə cɛpələnɑ sɔɔlʋɣʋ hɑlənɑ pə́ nyɑɑlɩ. Tə́ yɔɔlɩ nɑ tə́ nɩɩ pə leleŋ kɛ teu. 19 Mɑ pɑɑlʋ polɑ mpɑɑʋ pooluŋ nyəŋkʋ, ɩ fɛɩ təyɑɣɑ. 20 Ɩ kpɑɣɑ liɣitee nɑ húlúɣú kɛ́. Ye ɩsɔtʋ tɑ məŋnɑ kite ɩɩ kɔŋ. 21 Ɩlɛnɑ ɑlʋ ɩnɩ ɩ́ pəsɩ ɩfepu ɩnəɣɩ ɩ yɔɣɔtɑɣɑ kɑtɑtəlɑɣɑ tɔɔ, nɑ ɩ́ hɔmɩ-ɩ ɩ nɔɔleleŋ tɔɔ. 22 Nɑ ɩ́fepu sʋʋ-ɩ təŋʋɣʋ kɛ kpɑkpɑɑ ɩsɩɩ nɑʋ wei pɑ pukinɑ təkʋlɛ tɔ. Yɑɑ ɩsɩɩ pɑ hɔkʋɣʋ kpɑŋtʋ kɛ ŋmənɑɣɑ sɩ pɑ hɔŋ ɩ ŋkpɑŋʋɣʋ tɔ. 23 Hɑlənɑ nyəmlɛ sɔ ɩ hɔɔlɛ, ɩsɩɩ sumɑɣɑ huluɣuunɑ tiiu kɛ ɑpɑɩ tɑɑ nɑ kɑ́ tɑ́ nyɩ́ sɩ kɑ weesuɣu kɛ pɩɩ tɛnɑ tɔ.

24 Pənɛntɛ mɑ pəyɑlɑɑ mɛ, ɩ́ nɩɩnɑ-m, nɑ ɩ́ ké ŋkpɑŋŋ nɑ mɑ nɔɣɔ tɑɑ tɔm. 25 Tɑɑ nyɩɩlɩ ɑlʋ ɩsɩɩ mpʋ nɑ ń təŋɩ-ɩ, nɑ pə́ kɔɔ nɑ ń lé ɩ mpɑɑŋ tɑɑ. 26 Mpi tɔ, ɑlʋ ɩnɩ ɩ huwɑ yəlɑɑ pɑɣɑlɛ kɛ́. Mpɑ ɩ kɑ huwɑ mpʋ tɔ pɑɑ kɛ́ toŋtʋnɑɑ kɛ́. 27 Ɩ təyɑɣɑ ntɛ́ ɑtɛtəlɛ mpɑɑʋ nɑ kʋ́ tiiki səm tɛ́.