109
Tɑfiiti təŋsəɣɩ mpusi kɛ́ ɩ kolontunɑɑ
1 Tɑfiiti yontu nti tə wɛ yonyoolɑɑ nyʋɣʋ tʋ
yontunɑɑ tɑɑ tɔɣɔlɔ.
Ɩsɔ nyɑɣɑ mɑ sɑŋ, tɑɑ su.
2 Pə tɑɣɑ pʋlʋ, yəlɑɑ ɑsɑɣɑɑ nɑ tʋsəlɑɑ
hɑ́ɑ́ nɔɔsɩ nɑ mɑ tɔɔ kɛ́,
nɑ pɑ́ yɔɣɔtəɣənɑ-m pɔpɔtʋ tɔm.
3 Pɑ́ɑ́nɑ́ tɔm kɛ pɑ yɔɣɔtəɣənɑ-m pɑɑ le,
nɑ pɑ́ yookinɑ-m mʋsʋŋ.
4 Pɑɑ nɑ mɑ sɔɔlɑ-wɛ tɔ,
pɑ nyənəɣɩ-m pɑ kolontu kɛ́.
Amɑ mɑ sələməɣɩ Ɩsɔ kɛ́.
5 Mɑ lɑkɩ-wɛɣɛ kʋpɑntʋ nɑ mpɛ pɑ́ lɑkɩ-m ɩsɑɣɑtʋ.
Mɑ sɔɔlɑ-wɛ nɑ mpɛ pɑ tɑɑ kpɑɑkənɑ-m.
6 Ləsɩ tɔm hʋʋlʋ ɩsɑɣɑʋ nɔɣɔlʋ
nɑ ɩ́ kɔɔ ɩ́ hʋʋnɑ mɑ kolontu.
Ɩ kolontunɑɑ tɑɑ nɔɣɔlʋ ɩ́ kɔɔ ɩ́ suu-ɩ tɔm.
7 Pɑ́ kʋ ɩ tɔm kɛ təhʋʋlɛ tɑɑ,
Ɩsɔ nyənɩ ɩ sələmʋɣʋ kɛ ɩsɑɣɑtʋ sɔsɔɔntʋ.
8 Ɩ́ sɩ lɔŋ
nɑ nɔɣɔlʋ mʋ ɩ təmlɛ,
9 nɑ ɩ piyɑ pəsɩ suluwɑɑ
nɑ ɩ ɑlʋ kɛ leelu.
10 Ɩlɛnɑ ɩ piyɑ pəsɩ təkpɑɑləŋ nɑ pɑ́ sələməɣɩ nɑ pɑ́ tɔkɩ.
Pɑ́ tɔɣɔnɩ-wɛɣɛ pɑ ncɑɑ tɑɑ.
11 Ɩ kəmlɛ tʋ ɩ́ kuu ɩ nyəm tənɑ,
nɑ kpɑɩ nyə́mɑ nɑ́ɑ́ wɑkəlɩ ɩ təmlɛ kʋlʋlʋm.
12 Nɔɣɔlʋ luɣu ɩ́ tɑɑ lɑpɩ-ɩ.
Pə́cɔ ɩ suluwɑɑ tɔm ɩ́ tɑɑ lɑ nɔɣɔlʋɣʋ ɩsəkilim.
13 Pə́ kpiisi ɩ lʋlʋɣʋ nyə́mɑ nɑ pɑ həlɑ sɑɑlɩ yem
kɛ́ mpɑ pɑɑ kʋlɩ tɔ pɑ nɔɔsɩ tɑɑ.
14 Tɑcɑɑ, tɑɑ sɔɔ ɩ cɑɑnɑɑ ɩsɑɣɑtʋ tɔɔ.
Pə́cɔ tɑɑ hɩɩsɩ ɩ too kɑwɑlɑɣɑ.
15 Tɑcɑɑ, tɑɑ sɔɔ ɩ cɑɑnɑɑ ɩsɑɣɑtʋ nɑ ɩ too kɑwɑlɑɣɑ tɔɔ.
Tɑcɑɑ kpiisi yəlɑɑ mpɛ pɑ hətɛ kɛ tɛtʋ tɑɑ.
16 Pə tɑɣɑ pʋlʋ, yʋlʋ ɩnɩ ɩ tɑ hʋlɩ nɔɣɔlʋɣʋ suulu.
Pə́cɔ ɩ tʋ wɑhɑlɑ tʋ nɑ kʋnyɔntʋ kɛ wɑhɑlɑ.
Hɑlənɑ ɩ́ kʋ lɑŋwɑkəllɛ tʋ.
17 Mpusi kɛ́ ɩ kɑ sɔɔlɑɑ,
mpusi ɩnɩ ɩ́ kɔɔ ɩ nyʋɣʋ tɑɑ.
Ɩ́ tɑɑ sɔɔlɩ nɔɣɔ kʋpɑŋkɑ,
kɛlɛ kɑ́ hɑtələnɑ-ɩ.
18 Mpusi ɩ́ wɛɛ ɩ tɔɔ ɩsɩɩ toko.
Mpusi ɩ́ sʋʋ ɩ tɑɑ ɩsɩɩ lʋm.
Mpusi ɩ́ pəsɩ ɩsɩɩ nim kɛ ɩ mʋwɑ tɑɑ.
19 Mpusi ɩ́ tɑkɩ-ɩ ɩsɩɩ toko.
Mpusi ɩ́ cɔɔ-ɩ nɑ ɩ́ tɑ́ tɑm ɩsɩɩ tɑmpɑlɑ.
20 Ḿpʋɣʋ Tɑcɑɑ kɑ lɑ mɑ kolontunɑɑ.
Pɑ kʋfɛlʋɣʋ ntɛ́.
Nɑ mpɑ pɑ yɔɣɔtəɣɩ ɩsɑɣɑtʋ kɛ mɑ tɔɔ tɔ.
21 Tɑcɑɑ Ɩsɔ lɑ-m mpi pə wɛ teu tɔɣɔ nyɑ́ hətɛ tɔɔ.
Mpi tɔ, nyɑ́ kʋpɑntʋ tɔɔwɑɣɑ, wɑɑsɩ-m.
22 Mɑ kɛ́ kʋnyɔntʋ kɛ́ nɑ wɑhɑlɑ tʋ,
mɑ wɑkəlɑ hɑtoo mɑ tɑɑ.
23 Mɑ tɔŋnɑ sɑɑlʋɣʋ kɛ yem kɛ́ ɩsɩɩ ɩsotom
nɑ pɑ́ tɔɣɔnəɣɩ-m ɩsɩɩ filifili wei ɩ wɑkələɣɩ tɔ.
24 Nɔhɔkətʋ pɩɩ-m mɑɑ pəsəɣɩ nɑ mɑ́ səŋ.
Mɑ tɛmɑ tɑɑsɩ təkɔŋɔkɔŋɔ.
25 Mɑ pəsɑ-wɛɣɛ mpi pə fɛɩ teu tɔɣɔ.
Pɑ nyənəɣɩ-m nɑ pɑ́ kpɛɛtəɣɩ nyɔɔŋ.
26 Wɑɑsɩ-m, Tɑcɑɑ mɑ Ɩsɔ.
Yɑ-m nyɑ́ kʋpɑntʋ tɔɔ.
27 Yəlɑɑ mpɛ pɑ́ nyɩ sɩ nyɑ́ niŋ kɛ́.
Tɑcɑɑ nyɑ́, nyɑ́ lɑpənɑ mpʋ.
28 Mpɛ pɑ təŋsəɣɩ mpusi kɛ́.
Amɑ nyɑ́ kooliɣi kʋpɑntʋ.
Ye pɑ kʋlɑɑ fɛɛlɛ kɑ́ kpɑ-wɛ.
Amɑ nyɑ́ təmlɛ tʋ mɑ́ mɑ lɑŋlɛ kɑ́ hʋlʋmɩ.
29 Pə́ liɣiti mɑ kolontunɑɑ mpɑ pɑ suu-m tɔm tɔ.
Fɛɛlɛ ɩ́ wɑɑsɩ pɑ tɔɔ ɩsɩɩ toko.
30 Mɑɑ pʋɣʋlɩ Tɑcɑɑ nyɑɣɑ nɑ kɑwilitɑɣɑ.
Mɑɑ sɑ-ŋ sɑmɑɑ hɛkʋ.
31 Mpi tɔ, n wɛ kʋnyɔntʋ kɔŋkɔŋ tɑɑ kɛ́.
Sɩ n wɑɑsəɣɩ-ɩ mpɑ pɑ kʋɣɩ ɩ tɔm tɔ pɑ niŋ tɑɑ.