111
Tɑcɑɑ təmɑ sɔsɔɔnɑ tɔm tɔɔsʋɣʋ
1 Ɩ́ sɑ Tɑcɑɑ.
Mɑɑ sɛɛ Tɑcɑɑ nɑ mɑ lotu tənɑ
kɛ tɑmpɑnɑ təŋlɑɑ kpekəle tɑɑ kɛ́ təkotile.
2 Tɑcɑɑ təmɑ nɑ́ kɛ́ sɔsɔɔnɑ kɛ́,
nɑ ɑ sɔɔllɑɑ pɛɛkəɣɩ-yɛ.
3 Nyɑ́ kʋlɑpəm tənɑ tɑɑ wɛ teeli nɑ teu sɔsɔɔm kɛ́.
Nyɑ́ siɣisuɣu wɛ tɑm tɔɔ.
4 Tɑcɑɑ n yelɑɑ sɩ tə́ tɔɔsəɣɩ nyɑ́ kɔkɔlɔ təmɑ tɔɔ.
N kɛ́ pɛɛlɛɛ tʋ kɛ́ nɑ pətɔɔtəlɛ tʋ.
5 N hɑɑkɩ tɔɣɔnɑɣɑ kɛ mpɑ pɑ nyɑŋnɑ-ŋ tɔ.
Nn sɔɔkɩ nyɑ́ nɔɣɔ pɛɛlʋɣʋ tɔɔ kɛ́ pɑɑ pəcɔ.
6 N hʋlɑ nyɑ́ yəlɑɑ kɛ nyɑ́ təmɑ toŋ
kɛ timpi n cɛlɑ-wɛɣɛ piitimnɑɑ lɛlɑɑ tɛtʋ tɔ.
7 Nyɑ́ kʋlɑpəm siɣisɑɑ nɑ pə təŋɑɑ.
Nyɑ́ kʋsəsɩɩtʋ wɛ nɑɑni.
8 Ɩsɔ kʋsəsɩɩtʋ wɛ tɑm tɔɔ kɛ́.
Tə siɣisɑɑ kɛ́ nɑ tə́ təŋɑɑ.
9 N hɛtɑ nyɑ́ yəlɑɑ
nɑ nyɑ́ nɑ-wɛ ɩ́ pɛɛlɩ nɔɣɔ kɛ tɑm tɔɔ.
Nyɑ́ hətɛ kɛ sɔsɔɔlɛ kɛ́, nɑ kɑtɛ nyəntɛ.
10 Ɩsɔ nyɑmnɑʋ ntɛ́ nyəm kite,
mpɑ pɑ tɔkɑ yɑɑsi ɩnɛ tɔ
pɑ wɛnɑ ləmɑɣɑsɛɛ kʋpɑnɑ kɛ́.
Tɑcɑɑ teeli wɛ tɑm tɔɔ kɛ́.