21
1 Wɑɑtʋ wei Sosɑfɑtɩ sǝpɑ, ɩlɛnɑ pɑ́ pimi-ɩ pɑ tǝyɑɣɑ pǝlɑɑʋ tɑɑ kɛ́ Tɑfiiti tɛ. Nɑ ɩ pǝyɑlʋ Solɑm lɛɛtɩ ɩ lonte.
Solɑm kɑwulɑɣɑ
(Awulɑɑ II 8:16-24)
2 Solɑm kɑ wɛnɑ newɑɑ mpɑ ɩ́ nɑ-wɛ pɑ kɑɑ cɑɑ kʋlʋm tɔɣɔ. Pɑ hǝlɑ ntɛ́ Asɑliyɑ, nɑ Yehiyɛlɩ, nɑ Sɑkɑlɩ, nɑ Asɑliyɑhu, nɑ Mikɑyɛɛlɩ, nɑ Sefɑtiyɑ.
3 Pɑ cɑɑ kɑ hɑ-wɛɣɛ wɛnɑʋ kɛ sɔsɔm kɛ́. Pɑɑ liɣitee, pɑɑ wʋlɑ, nɑ liɣitee wontunɑɑ. Ɩlɛnɑ ɩ́ tʋ-wɛɣɛ Yutɑ ɑcɑlɛɛ feŋuɣu. Nɑ ɩ́ kpɑ pɑ tɑɑlʋ Solɑm sɩ ɩ́ lɛɛtɩ ɩ lonte kɛ kɑwulɑɣɑ tɔɣɔʋ tɑɑ.
4 Pǝ kɔmɑ nɑ kɑwulɑɣɑ sʋʋ Solɑm niŋ tɑɑ kɛ́ teu nɑ ɩ́ kɑ́ lilɑ, ɩlɛnɑ ɩ́ kʋ́ ɩ newɑɑ tǝnɑ, nɑ ɩ wɑɑlɩ nyǝ́mɑ lɛlɑɑ kɛ kɑwulɑɣɑ tɑɑ.
5 Wɑɑtʋ wei ɩ tɔɣɑ kɑwulɑɣɑ tɔ, ɩ pɩɩsɩ wɛ hiu nɑ nɑɑnʋwɑ nɑ nɑɑlɛ. Nɑ ɩ́ cɑɣɑ kɑ tɑɑ kɛ́ pɩɩsɩ pǝlefɛɩ nɑɑnʋwɑ kɛ́ Yosɑlɛm tɑɑ.
6 Ḿpʋ́ɣʋ́ ɩ tɔmɑ ɩsɑɣɑtʋ tɑɑ kɛ́ teitei ɩsɩɩ Ɩsɛɣɛlɩ ɑwulɑɑ, Akɑpɩ nɑ ɩ lʋlʋɣʋ nyǝ́mɑ. Mpi tɔ, Akɑpɩ pɛɛlɔ kɛ ɩ kɑ tɔkɑɑ. Solɑm lɑpɑ mpi pǝ tɑ mɑɣɑ Tɑcɑɑ tɔ.
7 Pɑɑ nɑ mpʋ tɔ, Tɑcɑɑ tɑ sɔɔlɩ sɩ ɩ́ kpiisi Tɑfiiti lʋlʋɣʋ nyǝ́mɑ. Pǝ tɑɣɑ pʋlʋ, Ɩsɔ nɑ Tɑfiiti pɑɑ pɛɛlɑ nɔɔsɩ kɛ́ sɩ ɩ lʋlʋɣʋ nyǝ́mɑ kɑ́ tɔkǝnɑ kɑwulɑɣɑ kɛ́ tɑm tɔɔ kɛ́ Yosɑlɛm.
8 Yutɑ wulɑʋ Solɑm ɩnɩ ɩ wɑɑtʋ tɑɑ kɛ́ Ɩtɔm nyǝ́mɑ kʋlɑ ɩ tɔɔ, nɑ pɑ́ kpɑ pɑ tǝɣɩ pɑ wulɑʋ.
9 Ḿpʋ́ɣʋ́ Solɑm kpɑɣɑ ɩ yoolɑɑ sɔsɑɑ, nɑ ɩ yoou kɛɛkɛnɑɑ tǝnɑ nɑ pɑ́ tii Ɩtɔm nyǝ́mɑ mpɑ pɑɑ tɑmɑ-wɛɣɛ kotɑɣɑ tɔ pɑ tɔɔ, nɑ pɑ́ kǝlɩ-wɛ.
10 Pǝ kpɑɣɑʋ kʋyɑkʋ ŋkʋ tɔɣɔ Ɩtɔm nyǝ́mɑ cɛpɑ Yutɑ nyǝ́mɑ, nɑ pɑ́ cɑɣɑnɑ pɑ tɩ.
Ḿpʋ́ɣʋ́ Lipinɑ ɩcɑtɛ nɑ́ kisɑ cei tɔtɔɣɔ wɑɑtʋ ɩnɩ ɩ tɑɑ. Nɑ pɑ́ fiti Solɑm niŋ tɑɑ. Mpi tɔ, Solɑm kɑ kisɑ ɩ cɔsɔnɑɑ Ɩsɔ Tɑcɑɑ kɛ nɩɩnɑʋ tɔɣɔ pǝ lɑpɑ mpʋ.
11 Solɑm kɑ ŋmɑwɑ tɩɩŋ tǝkɔtǝlɛnɑɑ kɛ Yutɑ pɔɔŋ tɑɑ kɛ́. Mpʋ pǝ tusinɑ Yutɑ nɑ Yosɑlɛm pǝ yǝlɑɑ nɑ pɑ́ lɔ Ɩsɔ nɑ pɑ́ lɑɑkɩ pɑɑ tʋɣʋ ŋku.
12 Ḿpʋ́ɣʋ́ Kʋyɑkʋ nɑkʋlɩ Ɩsɔ kʋyɔɣɔtʋtʋ tɛlǝsʋlʋ Ɩlii ŋmɑɑ Solɑm kɛ tɑkǝlɑɣɑ sɩ: Nyɑ́ cɔsɔ Tɑfiiti Ɩsɔ Tɑcɑɑ yɔɣɔtɑɑ sɩ, n tɑ tǝŋ nyɑ́ cɑɑ Sosɑfɑtɩ nɑ ɩ cɑɑ Asɑ mpɑ pɑ kɛ́ Yutɑ ɑwulɑɑ tɔ pɑ ɩkpɑtɛ.
13 Hɑlɩ n mǝlɑɑ kɛ́ nɑ ń kpɑɣɑ Ɩsɛɣɛlɩ ɑwulɑɑ yɑɑsi. Nɑ ń kʋsɩ Yutɑ nɑ Yosɑlɛm pǝ yǝlɑɑ kʋnyɩɩlʋɣʋ, nɑ pɑ́ kɛɛsǝnɑ tɩɩŋ tɔɔ, ɩsɩɩ Akɑpɩ lʋlʋɣʋ nyǝ́mɑ. Hɑlǝnɑ ń kʋ́ nyɑ́ newɑɑ. Pǝ́cɔ́ pɛlɛ pɑ́ kǝlɑ-ŋ teu.
14 Pǝ tɔɔ kɛ́ Tɑcɑɑ kɑ́ tʋ nyɑ́ yǝlɑɑ nɑ nyɑ́ pǝyɑlɑɑ nɑ nyɑ́ ɑlɑɑ nɑ nyɑ́ nyǝm tǝnɑɣɑ wɑhɑlɑ sɔsɔ.
15 Lotu kʋtɔŋ ɩsɑɣɑʋ nɑkʋlǝɣɩ ɩ kɑ́ tʋ́ nyɑ́ mɑɣɑmɑɣɑ. Nɑ kʋ́ sɔɔsǝɣɩ pɑɑ kʋyɑkʋ ŋku. Hɑlǝnɑ nyɑ́ tɑɑ lotu lɩɩ.
16 Ḿpʋ́ɣʋ́ Tɑcɑɑ tulɑ Filiisi nyǝ́mɑ nɑ Lɑɑlupunɑɑ mpɑ pɑ cɔɔnɑ Ɩtiyopii nyǝ́mɑ tɔ, nɑ pɑ́ yoonɑ Solɑm.
17 Nɑ pɑ́ sʋʋ Yutɑ, nɑ pɑ́ kuu pǝ tǝnɑ mpi pɩɩ wɛ kɑwulɑɣɑ tǝyɑɣɑ tɑɑ tɔ. Nɑ pɑ́ kpɑ wulɑʋ piyɑ nɑ ɩ ɑlɑɑ kɛ yomɑɑ. Ɩ pǝyɑɣɑ sǝkpelɑɣɑ Ahɑsiyɑ tike kɛ pǝ sɔɔwɑ.
18 Pǝlɛ pǝ wɑɑlɩ kɛ́ Tɑcɑɑ tʋ́ Solɑm kɛ lotu kʋtɔŋ ŋku kʋ fɛɩ wɑɑʋ tɔ.
19 Pɩɩsɩ sikɑ ɩsɩɩ nɑɑlɛ kɛ mpʋ, ɩlɛnɑ ɩ kʋtɔŋ ŋkʋ kʋ́ yɑsɩ ɩ lotu nɑ tǝ́ lɩɩ, nɑ ɩ́ sǝnɑ wʋsɑsɩ sɔsɔɔnsɩ. Amɑ ɩ yǝlɑɑ tɑ wɔ ɩ lǝyɑɣɑ wule kɛ tulɑɑlʋnɑɑ, ɩsɩɩ pɑ lɑpʋ ɩ cɔsɔnɑɑ tɔ.
20 Solɑm lʋlʋɣʋ pɩɩsɩ hiu nɑ nɑɑnʋwɑ nɑ nɑɑlɛ nyǝŋkɑ kɛ ɩ tɔɣɔnɑ kɑwulɑɣɑ. Yosɑlɛm tɑɑ kɛ́ ɩ tɔɣɑ ɩ kɑwulɑɣɑ kɛ pɩɩsɩ pǝlefɛi nɑɑnʋwɑ. Wɑɑtʋ wei Solɑm sǝpɑ tɔ nɔɣɔlʋ tɑ wii-ɩ. Tɑfiiti tɛɣɛ pɑ pimɑ-ɩ. Ɩlɛ pǝ tɑɣɑ kɑwulɑɣɑ pǝlɑɑʋ tɑɑ.