34
Sosiyɑsɩ kɑwulɑɣɑ nɑ Ɩsɔ sɛɛʋ tɑɣɑnʋɣʋ
(Awulɑɑ II 22:1-2; 23:4-20)
Sosiyɑsɩ lʋlʋɣʋ pɩɩsɩ pǝlefɛɩ nɑɑnʋwɑ nyǝŋkɑ tɑɑ kɛ́, ɩ pǝsɑ Yutɑ wulɑʋ. Yosɑlɛm tɑɑ kɛ́ ɩ cɑɣɑ pɩɩsɩ hiu nɑ nɑɑnʋwɑ nɑ kʋlʋmɑɣɑ. Ḿpʋ́ɣʋ́ ɩ lɑpɑ mpi pǝ mɑɣɑ Tɑcɑɑ tɔ. Ɩ tɔmɑ teitei kɛ́ ɩsɩɩ ɩ lɔŋcɛ Tɑfiiti, ɩ tɑ lɩɩ ɩ ɩkpɑtɛ tɑɑ.
Ɩ kɑwulɑɣɑ pǝnɑɣɑ pǝlefɛɩ nɑɑnʋwɑ nyǝŋkɑ tɑɑ tɔ, nɑ ɩ́ tɔŋɑ ɩfepu kɛ́. Wɑɑtʋ ɩnɩ ɩ tɑɑ kɛ́ ɩ cɑɑlɑ ɩ lɔŋcɛ Tɑfiiti Ɩsɔ luɣu nyǝntʋ kɛ pɛɛkʋɣʋ. Pɩɩsɩ liɣiti tɛɛwɑ, ɩlɛnɑ ɩ́ sʋʋ cefelinɑɑ tǝkɔtǝlɛnɑɑ nɑ pǝ tɩɩŋ nɑ pǝ tesikɑsɩ kɛ kpiisuɣu kɛ Yosɑlɛm nɑ Yutɑ pǝ tɑɑ. Pɑ yɔkɑ tʋɣʋ Pɑɑlɩ tǝkɔtǝlɛnɑɑ kɛ ɩ ɩsɛntɑɑ nɑ pǝ tulɑɑlʋ tǝwɔtɛ nte tǝ wɛ pǝ tɔɔ tɔ. Nɑ pɑ́ sɛtɩ tesikɑsɩ nɑ pɑ́ wɑkǝlɩ tɩɩŋ wɑɑnɩ wɑɑnɩ tǝnɑŋnɑŋ. Nɑ pǝ́ pǝsɩ mʋlʋm nɑ pɑ́ pǝlɩ ɩ lɑɑlɑɑ pǝlɑɑŋ tɔɔ. Nɑ pɑ́ wɔ tɩɩŋ kɔtǝlɑɑ mʋwɑ kɛ pɑ kɔtɑsɩ tǝlɑtɛnɑɑ tɔɔ. Ɩsǝnɑ Sosiyɑsɩ tɑɣɑnɑ Yutɑ nɑ Yosɑlɛm tɔɣɔlɛ.
Pǝlɛ pǝ wɑɑlɩ kɛ́ Sosiyɑsɩ cɔɔwɑ Mɑnɑsee, nɑ Ɩfǝlɑyim, nɑ Simiyɔŋ, nɑ Nɛfǝtɑli pǝ kpekɑ tɑɑ, nɑ pǝ cɔlɔ hɔɣɔlǝŋ tɑɑ. Nɑ ɩ́ yɔkɩ tǝlɑɑlɛnɑɑ nɑ tulɑɑlʋnɑɑ tǝwɔtɛ kɛ Ɩsɛɣɛlɩ kpekɑ tǝnɑ tɑɑ. Nɑ ɩ́ fɑɣɑ tesikɑsɩ nɑ tɩɩŋ kɛ hɔɣɔlɑsɩ. Ɩlɛnɑ ɩ́ mǝlɩ Yosɑlɛm.
Kɔtʋlʋ sɔsɔ kulusɑ kiiu tɑkǝlɑɣɑ tɔɔ
(Awulɑɑ II 22:3-10)
Ḿpʋ́ɣʋ́ Sosiyɑsɩ kɑwulɑɣɑ pǝnɑɣɑ pǝlefɛɩ hiu nyǝŋkɑ, kʋyɑkʋ nɑkʋlɩ, Sosiyɑsɩ tɔŋnɑ Yutɑ tɛtʋ Ɩsɔ sɛɛʋ nɑ Ɩsɔ tǝsɛɛlɛ kɛ tɑɣɑnʋɣʋ. Ɩlɛnɑ ɩ́ tɔ́ Asɑliyɑ pǝyɑlʋ Sɑfɑŋ, nɑ ɩcɑtɛ pɑɑsǝnlʋ Mɑɑseyɑ, nɑ wulɑʋ tɔm yɔɣɔtʋlʋ Yowɑkɑsɩ pǝyɑlʋ Yowɑ sɩ: Ɩ́ polo ɩ́ tɑɣɑnɩ mɑ Ɩsɔ Tɑcɑɑ tǝsɛɛlɛ ŋmɑʋ. Ḿpʋ́ɣʋ́ ɑpɑlɑɑ mpɛ pɑ ponɑ kɔtʋlʋ sɔsɔ Hilikiyɑ kɛ Ɩsɔ tǝsɛɛlɛ liɣitee nnɑ Lefii nyǝ́mɑ tɑŋlɑɑ kɑ mʋwɑ Mɑnɑsee, nɑ Ɩfǝlɑyim, nɑ Ɩsɛɣɛlɩ kpekɑ lɛnnɑ, nɑ Yutɑ nɑ Yosɑlɛm nyǝ́mɑ pɑ kiŋ tɔ. 10-11 Ɩlɛnɑ pɛlɛ pɑ cɛlɛ-yɛɣɛ tǝmɑ nyʋɣʋ nyǝ́mɑ mpɑ pɑ pɑɑsɑɣɑnɑ Ɩsɔ tǝsɛɛlɛ tɑɣɑnʋɣʋ tɔ sɩ: Ɩ́ yɑnɑ pɛɛ, nɑ lɔtɑsɩ. Nɑ ɩ́ fɛlɩ ŋmɑlɑɑ, nɑ kɑntɑɑ, nɑ tǝmɑ lɑtɑɑ. Nɑ pɑ́ ŋmɑnɑ kutuluŋ lɛlǝŋ wei Yutɑ ɑwulɑɑ kɑ yelɑɑ nɑ ɩ́ hoti tɔ. 12 Lefii tʋ Melɑli lʋlʋɣʋ nyǝ́mɑ Yɑhɑtɩ, nɑ Opɑtiyɑ, nɑ Kehɑtɩ lʋlʋɣʋ nyǝ́mɑ Sɑkɑlɩ, nɑ Mesulɑm, pɑ pɑɑsɑɣɑnɑnɑ tǝmɑ nyǝ́mɑ, nɑ pɑ́ lɑkɩ pɑ tǝmɑ kɛ teu. Lefii nyǝ́mɑ lɛlɑɑ mpɑ pɑɑ nyǝ́mɑ cǝmǝŋ mɑpʋ tɔ, 13 pɛlɛ pɑ mɑkɑɣɑnɑ mpɑɑʋ wontu nɑ sǝɣǝllɑɑ tɔŋnɑ. Nɑ pɑ tɑɑ lɛlɑɑ nɑ́ɑ́ pɑɑsǝɣǝnɑ pɑ tǝmɑ wɑɑnɩ wɑɑnɩ lɑtɑɑ. Nɑ tɑkǝlɑsɩ ŋmɑɑʋ nɑ tǝmɑ tɑɣɑnʋɣʋ nɑ nɔnɔɔsɩ tɑŋʋɣʋ.
14 Wɑɑtʋ wei pɑ kpɑkɑɣɑɑ liɣitee nnɑ pɑɑ sɩɩwɑ ɑtɑkɑɑ tɑɑ kɛ́ Ɩsɔ tǝsɛɛlɛ tɑɑ tɔ. Ɩlɛnɑ kɔtʋlʋ Hilikiyɑ mɑɣɑnɑ Tɑcɑɑ kiiu ŋku ɩ kɑ heelɑ Moisi nɑ ɩ́ ŋmɑɑ tɔ kʋ tɑkǝlɑsɩ. 15 Ḿpʋ́ɣʋ́ ɩ heelɑ tɑkǝlɑsɩ ŋmɑɑlʋ Sɑfɑŋ kɛ kɑ tɔm nɑ ɩ́ cɛlɛ-ɩ kɛ́. 16 Sɑfɑŋ nɑ́ ponɑ-kɛɣɛ wulɑʋ, ɩlɛnɑ ɩ́ kɛɛsǝnɑ ɩ́ tǝmɑ tɔm sɩ: Nyɑ́ tǝmlɛ nyǝ́mɑ tɛmɑ tǝmɑ wenɑ n kɑ hʋlɑ-wɛ tɔɣɔ lɑpʋ. 17 Nɑ kɔtǝlɑɑ nɑ́ koosɑ Ɩsɔ tǝsɛɛlɛ ɑtɑkɑɑ liɣitee nɑ pɑ́ cɛlɑ tǝmɑ nyʋɣʋ nyǝ́mɑ nɑ tǝmɑ lɑtɑɑ.
18 Ɩlɛnɑ Sɑfɑŋ tɑsɑ sɩ: Hɑlɩ kɔtʋlʋ sɔsɔ Hilikiyɑ cɛlɑ-m tɑkǝlɑɣɑ.
Ḿpʋ́ɣʋ́ Sɑfɑŋ nɑɑlɑ-kɛɣɛ kɑlʋɣʋ kɛ wulɑʋ.
Sosiyɑsɩ yɔɣɔtǝnɑ Ɩsɔ kʋyɔɣɔtʋtʋ tɛlǝsʋlʋ ɑlʋnyǝŋ Hulǝtɑ
(Awulɑɑ II 22:11-20)
19 Wɑɑtʋ wei wulɑʋ nɩɩ kiiu tɑkǝlɑɣɑ ŋkɛ kɑ tɔm, ɩlɛnɑ ɩ lɑŋlɛ wɑkǝlɩ nɑ ɩ́ cǝlɩ ɩ wontu. 20 Ḿpʋ́ɣʋ́ ɩ yɑɑ Hilikiyɑ, nɑ Sɑfɑŋ pǝyɑlʋ Ahikɑm, nɑ Mikɑ pǝyɑlʋ Apǝtɔŋ, nɑ tɑkǝlɑsɩ ŋmɑɑlʋ Sɑfɑŋ, nɑ ɩ wɑɑlɩ nyǝ́mɑ tɑɑ lɛlʋ Asɑyɑ nɑ ɩ́ tɔ-wɛ sɩ: 21 Ɩ́ polo ɩ́ pɔɔsɩ Tɑcɑɑ kɛ mɑ nɑ Ɩsɛɣɛlɩ kɑkɑɑsɑɣɑ nɑ Yutɑ yǝlɑɑ tɑ́ tɔm, nɑ tɑkǝlɑɣɑ ŋkɑ tǝ hikɑ ɩsǝntɔ tɔ kɛlɛ kɑ tɔm tɔtɔ. Mpi tɔ, tɑ́ cɔsɔnɑɑ tɑɑ tɔkɩ kʋsǝsɩɩtʋ nti pɑ ŋmɑɑ kɑ tɑɑ tɔ. Pǝ tɔɔ kɛ́ Tɑcɑɑ pɑ́ɑ́nɑ́ kɑ huunɑ-tʋɣʋ sɔsɔm.
22 Ḿpʋ́ɣʋ́ Hilikiyɑ nɑ ɩ tɑɑpɑlɑɑ pɑ polɑ Ɩsɔ kʋyɔɣɔtʋtʋ tɛlǝsʋlʋ ɑlʋnyǝŋ Hulǝtɑ tɛɣɛ Yosɑlɛm kpekǝle kʋfɑtɛ tɑɑ. Hulǝtɑ pɑɑlʋ kɛlɛ Tokehɑtɩ pǝyɑlʋ Sɑlum, Hɑsǝlɑ sɑɑlɩ. Sɑlum ɩnɩ ɩ́ pɑɑsɑɣɑnɑnɑ kɔtǝlɑɑ wontu kususuutu. Ḿpʋ́ɣʋ́ ɑpɑlɑɑ mpɛ pɑ kɛɛsɑ pɑ tɔm kɛ Ɩsɔ kʋyɔɣɔtʋtʋ tɛlǝsʋlʋ. 23 Ntɛnɑ Hulǝtɑ tɔ-wɛ sɩ: Ɩ́ tɛlǝsɩ wulɑʋ sɩ Ɩsɛɣɛlɩ Ɩsɔ Tɑcɑɑ tɔmɑ sɩ: 24 Mɑɑ yele nɑ mpusi kɔɔ Yosɑlɛm nɑ yǝlɑɑ pɑ tɔɔ ɩsɩɩ pɑ ŋmɑɑʋ tɑkǝlɑɣɑ kɑnɛ kɑ tɑɑ tɔ. 25 Mpi tɔ, Yosɑlɛm yǝlɑɑ lɔ-m nɑ pɑ́ lɑɑkɩ tɩɩŋ. Ɩlɛnɑ pɑ lɑkɑsɩ nsɩ sɩ kpɑ-m pɑ́ɑ́nɑ́. Pǝ tɔɔ kɛ́ mɑ pɑ́ɑ́nɑ́ huunɑ ɩcɑtɛ tǝnɛɣɛ sɔsɔm ɑ tɑ tiitɑ. 26 Ye pǝ kɑɑsɑ wulɑʋ ɩlɛ, Ɩsɛɣɛlɩ Ɩsɔ Tɑcɑɑ heeliɣi-ɩ sɩ: Ɩsɩɩ n nɩɩʋ tɑkǝlɑɣɑ ŋkɛ kɑ tɑɑ tɔm kɛ teu, nɑ 27 nti mɑ yɔɣɔtɑ Yosɑlɛm nɑ ɩ yǝlɑɑ pɑ tɔɔ tɔ. Nɑ ń nɑ́ nyɑ́ tǝwɑkǝllɛ, nɑ ń lɑɣɑsɩ nɑ ń cǝlɩ nyɑ́ wontu nɑ lɑŋwɑkǝllɛ nɑ ń pǝlɩ ɩsǝlʋm tɔ, mɑɑ mʋ nyɑ́ kʋsǝlǝmʋtʋ. 28 Mɑɑ yele nɑ ń sɩ́ sǝm kʋpɑm, nɑ pɑ́ pi-ŋ nyɑ́ pǝlɑɑʋ tɑɑ. N kɑɑ nɑ mpusi wei ɩ kɑ́ kɔɔ Yosɑlɛm ɩcɑtɛ nɑ tǝ yǝlɑɑ tɔɔ tɔ.
Sosiyɑsɩ nɑ Ɩsɔ pɑ nɔɣɔ pɛɛlʋɣʋ kʋfɑm
(Awulɑɑ II 22:20–23:3)
Ḿpʋ́ɣʋ́ kɔtʋlʋ sɔsɔ Hilikiyɑ nɑ ɩ tɑɑpɑlɑɑ pɑ polɑɑ nɑ pɑ́ heeli ḿpʋ́ɣʋ́ wulɑʋ. 29 Ḿpʋ́ɣʋ́ wulɑʋ kotɑ Yutɑ nɑ Yosɑlɛm pǝ nyʋɣʋ nyǝ́mɑ tǝnɑɣɑ ɩ kiŋ kɛ kpɑkpɑɑ. 30 Nɑ pɑ́ nɑ pɑ sɑmɑɑ pɑ́ polo Ɩsɔ tǝsɛɛlɛ, nɑ kɔtǝlɑɑ, nɑ Lefii nyǝ́mɑ, nɑ pɑɑ yǝlɑɑ mpɑ. Ɩlɛnɑ wulɑʋ kɑlɑ-wɛɣɛ kiiu tɑkǝlɑɣɑ ŋkɑ pɑ hiiwɑ Ɩsɔ tǝsɛɛlɛ tɔ. 31 Pǝlɛ pǝ wɑɑlɩ kɛ́ ɩ sǝŋɑ ɩ kumte tɔɔ kɛ́ Ɩsɔ tǝsɛɛlɛ tɑɑ, nɑ ɩ́ nɑ Tɑcɑɑ pɑ́ pɛɛlɩ nɔɣɔ. Nɑ sɑmɑɑ tisi sɩ mpɛ pɑɑ tɔkɩ ɩ kiiŋ nɑ ɩ kʋsɛɣɛsǝtʋ, nɑ ɩ kʋtʋtʋtʋ, nɑ luɣu kʋlʋmʋɣʋ, nɑ lotu kʋlʋmtʋ. Nɑ pɑ́ lɑkɩ pǝ tǝnɑ mpi pɑ ŋmɑɑ tɑkǝlɑɣɑ ŋkɛ kɑ tɑɑ tɔ. 32 Ḿpʋ́ɣʋ́ wulɑʋ yelɑɑ nɑ pɑ tǝnɑ mpɑ pɑ wɛ Yosɑlɛm tɔ pɑ́ tɔkɩ nɔɣɔ ŋkɛ, nɑ Pɛncɑmɛɛ kpekǝle nyǝ́mɑ. Pǝ kpɑɣɑʋ wɑɑtʋ ɩnɩ tɔɣɔ Yosɑlɛm yǝlɑɑ tǝŋɑ nɔɣɔ ŋkɑ pɑ́ nɑ pɑ cɔsɔnɑɑ Ɩsɔ pɑ pɛɛlɑɑ tɔ. 33 Ɩlɛnɑ Sosiyɑsɩ kʋ ɑcɑɑlǝtʋ nti yǝlɑɑ lɑkɑɣɑ Ɩsɛɣɛlɩ tɛtʋ tǝnɑ tɑɑ tɔ, nɑ ɩ́ cɑ́ɑ́lɩ́-wɛ sɩ pɑ́ sɛɛ pɑ Ɩsɔ Tɑcɑɑ. Mpʋ pǝ tɔɔ kɛ́ pɑ tɑɑ nɔɣɔlʋ tɑ yele Tɑcɑɑ tǝŋʋɣʋ, hɑlǝnɑ Sosiyɑsɩ sǝm.