16
Ɩsɔ pɑ́ɑ́nɑ́ mʋɣʋ tɔm
1 Ḿpʋ́ɣʋ́ mɑ nɩɩ pǝ yɔɣɔtǝnɑ ɩsɔtɑɑ tillɑɑ nɑɑtosompɔɣɔlɑɣɑ nɑ nɔɣɔ sɔsɔɣɑ kɛ Ɩsɔ tǝsɛɛlɛ sɔsɔɔlɛ tɑɑ sɩ: Ɩ́ polo nɑ ɩ́ pǝlɩ Ɩsɔ pɑ́ɑ́nɑ́ kɔpʋnɑɑ nɑɑtosompɔɣɔlɑɣɑ ɩnǝɣɩ ɑtɛ.
2 Tǝnɑɣɑ kɑncɑɑlɑɣɑ nyǝŋ tɛɛwɑ nɑ ɩ́ pǝlɩ ɩ kɔpʋ kɛ ɑtɛ. Ɩlɛnɑ sǝmolɑ ɑsɑɣɛɛ nɑ kʋwǝwɩɩnɑ kpɑ yǝlɑɑ mpɑ pɑɑ yʋsɑ wontuɣu kʋyʋsʋm kɛ pɑ tɔɔ nɑ pɑ sɛɛkɑɣɑ kʋ lɛɛsʋɣʋ tɔ.
3 Ɩsɔtɑɑ tillu nɑɑlɛ nyǝŋ nɑ́ pǝlɑ ɩ kɔpʋ kɛ teŋku tɑɑ, ɩlɛnɑ lʋm pǝsɩ ɩsɩɩ yʋlʋ sǝtʋ cɑlǝm, nɑ weesuɣu nyǝm mpi pɩɩ wɛ teŋku tɑɑ tɔ pǝ sɩ pǝ́ tǝnɑ tǝpɑɩpɑɩ.
4 Ɩsɔtɑɑ tillu tooso nyǝŋ nɑ́ pǝlɑ ɩ kɔpʋ kɛ pusi sɔsɔɔŋsɩ nɑ sɛɛlɑɑ tǝnɑ tɑɑ, ɩlɛnɑ pǝ lʋm pǝsɩ cɑlǝm.
5 Ḿpʋ́ɣʋ́ mɑ nɩɩ ɩsɔtɑɑ tillu wei ɩ nyǝnǝɣǝnɑ lʋmnɑɑ tɔɔ tɔ ɩ tɔmɑ sɩ: Nyɑ́ wei n wɛ tǝnɑŋŋ tɔ, nyɑ́ wɛnnɑ, nɑ nyɑɑ wɛnnɑ. N tǝŋɑ siɣisuɣu kɛ nyɑ́ hʋʋlɛ tǝnɛ tǝ tɑɑ kɛ́.
6 Ɩsɩɩ pɑɑ lɛntɑ Ɩsɔ yǝlɑɑ nɑ Ɩsɔ kʋyɔɣɔtʋtʋ tɛlǝsǝlɑɑ tɔɣɔ n cɛlǝɣɩ-wɛɣɛ cɑlǝm kɛ pǝnɛntɑɑ sɩ pɑ́ nyɔɔ. Mpi pɑɑ lɑpɑ tɔ mpɩ pǝ fɛlǝɣǝnɑ-wɛ.
7 Ḿpʋ́ɣʋ́ mɑ nɩɩ pǝ yɔɣɔtɑ kɔtɑɣɑ tǝlɑtɛ sɩ: Ḿpʋ́ɣʋ́ mɛɛ, Tɑcɑɑ Ɩsɔ kɑwulɑɣɑ tʋ, tɑmpɑnɑ nɑ siɣisuɣu kɛ n tǝŋǝɣɩ nɑ ń hʋʋkǝnɑ.
8 Ɩsɔtɑɑ tillu liɣiti nyǝŋ nɑ́ pǝlɑ ɩ kɔpʋ kɛ ilim tɔɔ, ɩlɛnɑ pǝ́ kpɑɑsɩ-wǝɣɩ toŋ sɩ pǝ kɔkɔ ɩ́ nyɑɣɑ yǝlɑɑ.
9 Ḿpʋ́ɣʋ́ hɑŋɑɣɑ pɑɑsɑɑ nɑ kɑ́ hɑŋ yǝlɑɑ, hɑlǝnɑ pɑ́ yɑɑ Ɩsɔ wei ɩ tɔkɑ kʋnɑɑsǝnɑm pǝnɛ pǝ tɑkɑnɑɑ nɑ ɩ pǝsʋɣʋ tɔ ɩ hǝtɛ nɑ pɑ́ tʋʋ-ɩ. Amɑ pɑ tɑ yele pɑ ɩsɑɣɑtʋ nɑ pɑ́ tʋ Ɩsɔ kɛ́ teeli.
10 Ɩsɔtɑɑ tillu kɑkpɑsɩ nyǝŋ nɑ́ pǝlɑ ɩ kɔpʋ kɛ wontuɣu ŋkʋ kʋ kɑwulɑɣɑ kumte tɔɔ, ɩlɛnɑ sǝkpɛtʋɣʋ nyɑlɑ kʋ kɑwulɑɣɑ tɑɑ, nɑ yǝlɑɑ pɑɑsɩ nɑ pɑ́ sʋʋlǝɣǝnɑ wʋsɑsɩ pǝ tɩɩ fɛɩ.
11 Nɑ pɑ́ tʋʋ ɩsɔtɑɑ Ɩsɔ kɛ́ pɑ wɑhɑlɑ nɑ pɑ sǝmolɑ pǝ tɔɔ. Pɑɑ nɑ mpʋ tɔ, pɑ tɑ yele pɑ lɑkɑsɩ ɩsɑɣɑsɩ.
12 Ɩsɔtɑɑ tillu nɑɑtoso nyǝŋ nɑ́ pǝlɑ ɩ kɔpʋ kɛ Ɩfǝlɑtɩ pɔɣɔ sɔsɔɣɑ tɑɑ, ɩlɛnɑ kɑ lʋm nyɔɔ nɑ pǝ́ hɑ mpɑɑʋ kɛ ɑwulɑɑ sɔsɑɑ mpɑ pɑ lɩɩkǝnɑ tɛʋ kite tɔɔ tɔ.
13 Ḿpʋ́ɣʋ́ mɑ nɑ́ ɑlɔɣɑɑ tooso nɑ pɑ́ nǝɣǝsǝnɑ sɑlɛɛ, nɑ pɑ lɩɩnɑ tʋm sɔsɔ nɑ wontuɣu nɑ Ɩsɔ kʋyɔɣɔtʋtʋ tɛlǝsʋlʋ pɔpɔtʋ pɑ nɔɔsɩ tɑɑ.
14 Alɔɣɑɑ mpɛɣɛlɛ mpɑ pɑ lɑkɩ piti tǝmɑ tɔ. Tǝnɑɣɑ ɑlɔɣɑɑ mpɛ pɑ tooso pɑ kʋlɑɑ nɑ pɑ́ cɔɔkɩ tɛtʋ tǝnɑ ɑwulɑɑ sɔsɑɑ tɔɔ sɩ pɑ kotiɣi-wɛɣɛ Ɩsɔ kɑwulɑɣɑ tʋ kʋyɑkʋ sɔsɔɔʋ wule yoonɑʋ tɔɔ.
15 Nyǝnɩ, mɑ kɔŋ kɔntɛ kɛ́ ɩsɩɩ ŋmɩɩlʋ. Ɩlɛ ye wei ɩ tɔkɑ ɩ wontu sɩ ye pǝ tɑlɑɑ ɩ́ tɑɑ tɛɛ tɑpɑkpɛtɛ, ɩlɛ pʋntʋ ntɛ́ leleŋ nɩɩlʋ. Mpi tɔ, ye pɑ nɑ-ɩ ḿpʋ́ɣʋ́ tɑpɑkpɛtɛ fɛɛlɛ kɑ́ lɑpɩ-ɩ.
16 Ḿpʋ́ɣʋ́ ɑlɔɣɑɑ mpɛ pɑ kotɑ ɑwulɑɑ mpɛɣɛ timpi pɑ yɑɑkǝnɑ Hepǝlɑ tɑɑ sɩ Hɑɑmɑketɔŋ tɔ.
17 Ɩsɔtɑɑ tillu nɑɑtosompɔɣɔlɑɣɑ nyǝŋ nɑ́ pǝlɑ ɩ kɔpʋ kɛ heelim tɔɔ, ɩlɛnɑ pǝ́ yɔɣɔtǝnɑ Ɩsɔ tǝsɛɛlɛ sɔsɔɔlɛ tɑɑ nɑ kumte kiŋ nɑ nɔɣɔ sɔsɔɣɑ sɩ: Pǝ lɑpɑɣɑlɛ.
18 Ḿpʋ́ɣʋ́ tɛʋ nyǝɣǝsɑɑ, nɑ pǝ́ yɔɣɔtɩ, nɑ tɛʋ holi, nɑ tɛtʋ sele sɔsɔm. Hɑtuu pǝ ŋmɑʋ yʋlʋ tɔ tɛtʋ tɑ selitɑ seluɣu pǝnɛ pǝ tɑkɑ. Pǝnɛ ɩnɩ pǝ kǝlɑ kpɑkpɑɑ.
19 Tǝnɑɣɑ pǝ fɑɣɑ ɩcɑtɛ sɔsɔɔlɛ kɛ hɔɣɔlǝŋ tooso nɑ pǝ yɔkɩ. Nɑ ɑcɑlɛɛ sɔsɔɔnɑ hoti tɛtʋ tǝnɑ tɑɑ. Ɩsɔ tɔɔsɑ Pɑpiloni sɔsɔ tɔɔ, ɩlɛnɑ ɩ́ nyɔɔsɩ-ɩ ɩ kɔpʋ tɑɑ pɑ́ɑ́nɑ́ sɔsɔɔnɑ sʋlʋm.
20 Nɑ tɛtʋnɑɑ mpɑ lʋm kɑ cɔɔnɑɑ tɔ pɑ́ mʋkɩ yem, pɑ tɑ tɑsɑ pɑ́ keesi pɔ́ɔ́ŋ tɔtɔ.
21 Tɛʋ tɔmpɩɩŋ hotɑɣɑnɑ ɩsɔtɑɑ kɛ́ nɑ ɩ́ nyǝkǝɣɩ yǝlɑɑ. Tɔmpǝlɛ kʋlʋmtǝlɛ yuŋ kɑ wɛ ɩsɩɩ kiloonɑɑ nɩɩlɛ. Ḿpʋ́ɣʋ́ yǝlɑɑ tʋʋ Ɩsɔ kɛ́ nɑɑsʋɣʋ mpi tɔmpɛɛ ɑnɩ ɑ nɑɑsɑɣɑ-wɛ tɔ pǝ tɔɔ. Pǝ tɑɣɑ pʋlʋ, nɑɑsʋɣʋ mpɩ pǝlɛ pɩɩ kǝlɑ kpɑkpɑɑ kɛ́.