19
Pǝlɛ pǝ wɑɑlɩ kɛ́ mɑ nɩɩ pǝ yɔɣɔtǝnɑ nɔɔsɩ sɔsɔɔnsɩ nɑ ɩsɔtɑɑ, nɑ pǝ́ wɛ ɩsɩɩ sɑmɑɑ tuutuumɑ yɔɣɔtʋɣʋ tɔ sɩ: Ɩ́ sɑ Ɩsɔ. Tɑ Ɩsɔ yɑkǝnɑ, nɑ ɩnǝɣǝlɛ teeli nɑ tomɑ pǝ tʋ. Tɑmpɑnɑ nɑ siɣisuɣu kɛ ɩ tǝŋǝɣɩ nɑ ɩ́ hʋʋkǝnɑ. Pǝ tɑɣɑ pʋlʋ, wɑsɑŋkɑlɩ sɔsɔ wei ɩ wɑkǝlɑɣɑ tɛtʋ nɑ ɩ ɑsilimɑ tɔ, ɩ kʋ ɩ tɔm. Nɑ ɩsǝnɑ mpi ɩnɩ ɩ kɑ kʋ Ɩsɔ yǝlɑɑ tɔ, Ɩsɔ nɑ́ tʋ-ɩ pǝ sɑlǝkɑ. Nɑ pɑ tɑsɑ yɔɣɔtʋɣʋ tɔtɔ sɩ: Ɩ́ sɑ Ɩsɔ. Ɩcɑtɛ sɔsɔɔlɛ ńtɛ́ tǝ kɔkɔ nyɔɔsɩ tɔŋnɑ kʋlʋɣʋ kɛ tɑm kɛ́. Ḿpʋ́ɣʋ́ sɔsɑɑ hiu nɑ liɣiti ɩnɩ nɑ weesiŋ nyǝ́mɑ liɣiti ɩnɩ pɑ luŋɑ ɑkulɑ nɑ pɑ́ sɛɛ Ɩsɔ wei ɩ cɑɣɑ kumte tɔɔ tɔ, ɩlɛnɑ pɑ́ tɔ sɩ: Ami. Ɩ́ sɑ Ɩsɔ.
Ɩwǝyɑɣɑ ɑkpɑɣɑlɛ kʋtɔɣɔʋ
Ḿpʋ́ɣʋ́ pǝ yɔɣɔtɑ kumte kiŋ sɩ: Sɔsɑɑ nɑ piyɑ mpɑ mɛ ɩ́ kɛ́ Ɩsɔ pǝyɑlɑɑ nɑ ɩ́ see-ɩ tɔ, ɩ́ sɑ tɑ Ɩsɔ. Mɑ nɩɩ pǝ tɑsɑ yɔɣɔtʋɣʋ nɑ pǝ́ nǝɣǝsǝnɑ ɩsɩɩ sɑmɑɑ tuutuumɑ yɔɣɔtʋɣʋ tɔ, nɑ pǝ́ wɛ yuŋ ɩsɩɩ lʋm kpeŋuɣu nɑ pǝ́ fɑlǝɣɩ cooo tɔ, ɩsɩɩ tɛʋ holuɣuu sɔsɔm tɔ tɑkɑ. Mɑ nɩɩ pǝ yɔɣɔtɑɑ kɛ́ sɩ: Ɩ́ sɑ Ɩsɔ, pǝ tɑɣɑ pʋlʋ Tɑcɑɑ Ɩsɔ kɑwulɑɣɑ tʋ ɩnɩ ɩ tɔkǝnɑ kɑwulɑɣɑ. Ɩwǝyɑɣɑ pɛɛlɔ kpɑʋ tɑlɑɑ, nɑ kɑ pɛɛlɔ mɑɣɑmɑɣɑ nɑ́ tɩɩ tɑɣɑnɑ ɩ tɩ. Pǝ tɔɔ ɩlɛ tǝ pɑɑ nɑ tɑ́ lɑŋɑ hʋlʋmɩ, nɑ tǝ́ tʋ-ɩ teeli. Pǝ hɑ ɩ pɛɛlɔ kɛ mpɑɑ sɩ ɩ́ suu kpoŋkpontu toŋ nyǝntʋ pʋʋɣʋ kʋpɑŋkʋ ŋku kʋ mʋɣɩ kɔkɔ kɛ nyǝnǝnyǝnɩ nɑ kʋ fɛɩ ɑsilimɑ tɔ. Pʋʋɣʋ ŋkʋ kʋ wɛɛ kɛ́ ɩsɩɩ Ɩsɔ yǝlɑɑ tǝmɑ kʋpɑnɑ.
Ḿpʋ́ɣʋ́ ɩsɔtɑɑ tillu tɔmɑ-m sɩ: Nmɑɑ tɑkǝlɑɣɑ tɑɑ sɩ Ɩwǝyɑɣɑ kpɑ kɑ pɛɛlɔ nɑ pɑ́ yɑɑ mpɑɣɑ tɔɣɔʋ tɔɣɔlɛ leleŋ nɩɩlɑɑ. Nɑ ɩ tɑsɑɑ sɩ: Tɔm tǝnɛ tǝ kɛ́ Ɩsɔ kʋyɔɣɔtʋtʋ tɑmpɑnɑ nyǝntʋ kɛ́.
10 Tǝnɑɣɑ mɑ hǝntɑ ɩ tɛɛ sɩ mɑ sɛɛ-ɩ. Amɑ ɩ tɔmɑ-m sɩ: Tɑɑ lɑ mpʋ, tɑ tǝnɑɣɑ tǝmlɛ nyǝ́mɑ kɛ́. Tɑɣɑlɛ mpʋ nɑ nyɑ́ tɑɑpɑlɑɑ mpɑ Yesu kulɑ tɑmpɑnɑ tɔɔ nɑ pɑ́ nyɩ-yɛ tɔ. Ye sɛɛtʋ ɩlɛ, Ɩsɔ kɛ́ n kɑ́ sɛɛ.
Yesu kulɑ tɑmpɑnɑ nnɑ ɑ tɔɔ tɔ, ɑnɩ ɑ tʋnɑ Ɩsɔ kʋyɔɣɔtʋtʋ tɛlǝsǝlɑɑ kɛ yɔɣɔtʋɣʋ.
Kpɑɣɑnʋhʋlʋmɑɣɑ cɑɣɑlʋ
11 Ḿpʋ́ɣʋ́ mɑ nɑ́ ɩsɔtɔnʋɣʋ tʋlɑɑ, ɩlɛnɑ kpɑɣɑnʋhʋlʋmɑɣɑ lɩɩ. Pɑ yɑɑ kɑ tɔɔ cɑɣɑlʋ sɩ Kʋpɑŋ nɑ Tɑmpɑnɑ tʋ. Siɣisuɣu kɛ ɩ tǝŋǝɣɩ nɑ ɩ́ hʋʋkǝnɑ ɩ tɔm nɑ ɩ́ yookinɑ ɩ yoou tɔtɔ. 12 Ɩ ɩsɛ wɛ kɛ́ ɩsɩɩ kɔkɔ mʋkʋɣʋ tɔ, nɑ ɩ nyʋɣʋ tɑɑ kɑ wɛ teeli nteniŋ pɑɣɑlɛ. Pɑ ŋmɑɑ hǝtɛ nɑtǝlǝɣɩ ɩ tɔɔ, nɑ nɔɣɔlʋ tɑ nyɩ-tɛ ye pǝ tɑɣɑ ɩ tike. 13 Ɩ cɑpɑ wei ɩ suuwɑ tɔ ɩ tǝnɑ nɑ cɑlǝm kɛ́. Ɩ hǝtɛ ntɛ́ sɩ: Ɩsɔ Tɔm. 14 Ḿpʋ́ɣʋ́ ɩsɔtɔnʋɣʋ tɑɑ yoolɑɑ hu ɩ wɑɑlɩ nɑ pɑ kpɑɣɑnʋhʋlʋmɑsɩ, nɑ pɑ́ suu kpoŋkpontu toŋ nyǝntʋ pʋʋɣʋ kʋpɑŋkʋ ŋku kʋ hʋlʋmɑɑ tǝlɑɩlɑɩ nɑ kʋ fɛɩ ɑsilimɑ tɔ. 15 Lɑɣɑtɛ kʋsɛŋtǝlɛ nte ɩ kɑ kʋnɑ kɑteŋɑsɩ tɔɔ yǝlɑɑ tɔ ɩ nɔɣɔ tɑɑ kɛ́ tǝ lɩɩkɑɣɑnɑ. Nɑ nyǝɣǝlʋɣʋ kpɑ́tʋ́ɣʋ́ kɛ ɩ kɑ́ tiikiɣinɑ-wɛ. Nɑ ɩ kɑ́ yɔtɩ lɛsɛŋ kɛ tǝnyɑɑsǝlɛ nte tǝ kɛ́ Ɩsɔ kɑwulɑɣɑ tʋ pɑ́ɑ́nɑ́ sɔsɔɔnɑ sʋlʋm tǝnyɑɑsǝlɛ tɔ tǝ tɑɑ. 16 Pɑ ŋmɑɑwɑ ɩ nɔɔhɛɛ nɑ ɩ cɑpɑ pǝ tɔɔ kɛ́ sɩ: Awulɑɑ Wulɑʋ, sɔsɑɑ Sɔsɔ.
17 Ḿpʋ́ɣʋ́ mɑ nɑ́ ɩsɔtɑɑ tillu nɔɣɔlʋ ɩ́lɛ́ nɑ ɩ́ sǝŋɑ ilim tɔɔ. Nɑ ɩ́ mɑ́ kɑpusi nɑ ɩ́ heeli sumɑsɩ nsi sɩ kʋlǝɣɩ ɩsɔ tɔ sɩ tǝnɑ sɩ: Ɩ́ timsi nɑ ɩ́ kɔɔ Ɩsɔ ɑcimɑ sɔsɔɔnɑ tɑɑ. 18 Ɩ́ kɔɔ nɑ ɩ́ tɔɣɔ ɑwulɑɑ nɑ yoolɑɑ nɑ pɑ sɔsɑɑ pɑ nɑntʋ, nɑ kpɑɣɑnǝŋ nɑ ɩ tɔɔ cɑɣɑlɑɑ pɑ nɑntʋ, nɑ ɩ́ tɔɣɔ yǝlɑɑ tǝnɑ, yomɑɑ nɑ kɑsɑɣɑmpiyɑ nɑ sɔsɑɑ nɑ piyɑ, pɑ nɑntʋ.
19 Ḿpʋ́ɣʋ́ mɑ nɑ́ wontuɣu ŋkʋ nɑ ɑtɛ ɑwulɑɑ nɑ pɑ yoolɑɑ pɑ kotɑɑ sɩ pɑ yookinɑ kpɑɣɑnʋ tɔɔ cɑɣɑlʋ ɩnɩ nɑ ɩ́lɛ́ ɩ nyǝ́mɑ. 20 Tǝnɑɣɑ pɑ kpɑ wontuɣu ŋkʋ nɑ Ɩsɔ kʋyɔɣɔtʋtʋ tɛlǝsʋlʋ pɔpɔtʋ wei ɩ kɑ lɑpɑ piti tǝmɑ kɛ kʋ ɩsɛntɑɑ tɔ nɑ pɑ́ tǝkɩ. Piti tǝmɑ nnɑ ɩ lɑkɑɣɑ mpʋ tɔɣɔ ɩ puɣusɑɣɑnɑ mpɑ pɑ yʋsǝnɑ wontuɣu kʋyʋsʋm pǝyele pɑ sɛɛkɑɣɑ kʋ lɛɛsʋɣʋ tɔ. Ḿpʋ́ɣʋ́ pɑ kpɑɣɑ wontuɣu ŋkʋ nɑ Ɩsɔ kʋyɔɣɔtʋtʋ tɛlǝsʋlʋ pɔpɔtʋ ɩnɩ nɑ pɑ́ pɛtɩ-wɛɣɛ kɔkɔ teŋku wei ɩ tɔŋnɑ mʋɣʋ tɔ ɩ tɑɑ nɑ pɑ ɩsɛ. 21 Pǝ kɑɑsɑ mpɑ tɔ, pɑ kʋ pɛlɛ nɑ lɑɣɑtɛ nte tǝ lɩɩkǝnɑ wei ɩ cɑɣɑ kpɑɣɑnʋ tɔɔ tɔ ɩ nɔɣɔ tɑɑ tɔ. Ɩlɛnɑ sumɑsɩ tɔɣɔ pɑ nɑntʋ nɑ pǝ́ tɑlɑ-sɩ.