22
1 Ɩsɔtɑɑ tillu hʋlɑ-m tɔtɔɣɔ weesuɣu lʋm pɔɣɔ sɔsɔɣɑ, nɑ kɑ lʋm wɛ tǝkɑɩkɑɩ ɩsɩɩ tiŋ, nɑ kɑ́ lɩɩnɑ Ɩsɔ nɑ Ɩwǝyɑɣɑ pɑ kumte tɛɛ.
2 Nɑ kɑ́ kpeŋ ɩcɑtɛ sɔsɔɔlɛ ńtɛ́ tǝ hɑpǝlɛ hɛkʋ tɑɑ. Nɑ weesuɣu tʋɣʋ sǝŋɑ pɔɣɔ sɔsɔɣɑ ŋkɛ kɑ kʋtentemiŋ nɑɑlɛ tɔɔ, kʋnɛ nɑ cǝnɛ nɑ kʋnɛ nɑ cǝnɛ, nɑ kʋ lʋlǝɣɩ tɔm nɑɑnʋwɑ nɑ nɑɑlɛɣɛ pǝnɑɣɑ tɑɑ. Pɑɑ ɩsɔtʋ wei kɛ́ kʋ lʋlǝɣɩ. Kʋ hɑtʋ hɑɑkɩ piitim yǝlɑɑ kɛ ɑlɑɑfǝyɑ.
3 Mpi Ɩsɔ tǝŋsɑ mpusi tɔ pǝ tɑɑ pʋlʋ kɑɑ wɛɛ ɩcɑtɛ ńtɛ́ tǝ tɑɑ.
Ɩsɔ nɑ Ɩwǝyɑɣɑ pɑ kumte kɑ́ wɛɛ tǝ tɑɑ, nɑ Ɩsɔ pǝyɑlɑɑ kɑ́ sɛɛkɩ-ɩ.
4 Pɑɑ nɑ́ ɩ ɩsɛntɑɑ, nɑ pɑɑ ŋmɑɑ ɩ hǝtɛ kɛ pɑ tokuŋ tɑɑ.
5 Ahoo fɛɩ sɩ ɑ tɑsǝɣɩ yuɣu tɔtɔ. Pɑ kɑɑ nyɩɩlɩ sɩ fǝtǝlɑ yɑɑ ilim ɩ́ nɑɑ-wɛ. Pǝ tɑɣɑ pʋlʋ, Tɑcɑɑ Ɩsɔ kɑ́ tʋ-wɛɣɛ kɔkɔsɩ. Nɑ pɑɑ tɔɣɔ kɑwulɑsɩ kɛ tɑm tɔɔ.
Yesu kɔntɛ
6 Ḿpʋ́ɣʋ́ ɩsɔtɑɑ tillu heelɑ-m sɩ: Tɔmnɑɑ pɑnɛ pɑ kɛ́ tɑmpɑnɑ kɛ́, nɑ pɑ nǝɣǝsǝnɑ pɑ́ tɛ-wɛ nɑ tɑɑ. Nɑ Tɑcɑɑ Ɩsɔ wei ɩ hɑɑ Ɩsɔ kʋyɔɣɔtʋtʋ tɛlǝsǝlɑɑ kɛ ɩ Feesuɣu tɔ, ɩnɩ ɩ kɑ tilinɑ ɩ ɩsɔtɑɑ tillu sɩ ɩ́ hʋ́lɩ́ ɩ pǝyɑlɑɑ kɛ mpi pǝ wɛɛ pǝ kɔŋ nɔɔnɔɔ tɔ.
7 Ḿpʋ́ɣʋ́ Yesu yɔɣɔtɑɑ sɩ: N nɩɩwɑɑ, mɑɑ kɔɔ nɔɔnɔɔ. Leleŋ nɩɩlʋ ntɛ́ wei ɩ tǝŋǝɣɩ cele tɔmnɑɑ mpɑ pɑ ŋmɑɑ tɑkǝlɑɣɑ kɑnɛ kɑ tɑɑ tɔ.
8 Yohɑɑnɩ mɑ́, mɑ nɩɩnɑ nɑ mɑ́ nɑnɑ mɑ ɩsǝlɛ kɛ pǝnɛ ɩnɩ pǝ tǝnɑ. Mɑ kɔmɑ nɑ mɑ́ tɛ pǝ tǝnɑɣɑ ḿpʋ́ɣʋ́ nɩɩʋ nɑ nɑʋ, ɩlɛnɑ mɑ́ hǝntɩ ɩsɔtɑɑ tillu wei ɩ hʋlɑ-m-wɩ tɔ ɩ nɔɔhɛɛ tɛɛ sɩ mɑ sɛɛkɩ-ɩ.
9 Tǝnɑɣɑ ɩ tɔmɑ-m sɩ: Tɑɑ lɑ mpʋ, tɑ tǝnɑɣɑ tǝmlɛ nyǝ́mɑ kɛ́. Tɑɣɑlɛ mpʋ nɑ nyɑ́ tɑɑpɑlɑɑ Ɩsɔ kʋyɔɣɔtʋtʋ tɛlǝsǝlɑɑ nɑ mpɑ pɑ tǝŋǝɣɩ tɑkǝlɑɣɑ kɑnɛ kɑ tɑɑ tɔmnɑɑ tɔ. Ye sɛɛtʋ ɩlɛ, Ɩsɔ kɛ́ n kɑ́ sɛɛ.
10 Ḿpʋ́ɣʋ́ ɩ tɔmɑ-m sɩ: Tɑɑ ŋmɛsɩ tɑkǝlɑɣɑ kɑnɛ kɑ cele tɔmnɑɑ pɑnɛ yoo. Pǝ tɑɣɑ pʋlʋ, pɑɑ sɩɩwɑ wɑɑtʋ wei sɩ kɔkɔlɔnɑɑ pɑnɛ pɑɑ lɑ tɔ wɑɑtʋ ɩnɩ ɩ wʋsɑɑ.
11 Wei ɩ lɑkɩ ɩsɑɣɑtʋ tɔ pʋntʋ ɩ́ wɛɛ ɩ ɩsɑɣɑtʋ tɑɑ nɑ ɩ́ tɔŋnɑ lɑpʋ. Nɑ wei ɩ́lɛ́ ɩ kɛ́ ɑsilimɑ tʋ tɔ pʋntʋ ɩ́ wɛɛ ɩ ɑsilimɑ tɑɑ nɑ ɩ́ tɔŋnɑ ɩ tǝɣɩ pilisuɣu. Nɑ wei ɩ́lɛ́ ɩ kɛ́ kʋpɑŋ tɔ pʋntʋ ɩ́ wɛɛ ɩ kʋpɑntʋ tɑɑ nɑ ɩ́ tɔŋnɑ tǝ lɑpʋ. Nɑ wei ɩ́lɛ́ ɩ wɛ tǝnɑŋŋ tɔ pʋntʋ ɩ́ wɛɛ ɩ tǝnɑŋŋ tɑɑ kɛ́ mpʋ.
12 Ḿpʋ́ɣʋ́ Yesu yɔɣɔtɑɑ sɩ: N nɩɩwɑɑ, mɑɑ kɔɔ nɔɔnɔɔ. Mɑɑ kpɛnnɑ mɑ kʋfɛlǝŋ nɑ mɑ́ kɔɔ nɑ mɑ́ fɛlɩ pɑɑ wei kɛ́ mpi ɩ lɑpɑ tɔ.
13 Mɑɣɑ Alǝfɑ nɑ Omɛkɑ, mɑɣɑ kɑncɑɑlɑɣɑ tʋ nɑ kɑntǝkɑɣɑ tʋ. Mɑɣɑlɛ cɑɑllʋ nɑ tɛɛsǝlʋ.
14 Leleŋ nɩɩlɑɑ ntɛ́ mpɑ pɑ cɔtǝɣɩ pɑ cɑpɑnɑɑ nɑ pǝ hɑ-wɛɣɛ mpɑɑʋ sɩ pɑ́ tɔɣɔ weesuɣu tʋɣʋ pee, nɑ pɑ́ tǝŋnɑ ɩcɑtɛ nɔnɔɔsɩ nɑ pɑ́ sʋʋ ɩcɑtɛ tɑɑ tɔ.
15 Amɑ ɑcɑɑlǝtʋ nyǝ́mɑ nɑ mpɑ pɑ lɑkɩ topotopo tǝmɑ tɔ nɑ ɑsilimɑ lɑtɑɑ nɑ yʋlʋkʋlɑɑ nɑ tɩɩŋ lɑɑlɑɑ nɑ mpɑ pɑ kɛ́ pɔpɔtʋnɑɑ kɛ pɑ yɔɣɔtɑɣɑ tɑɑ yɑɑ pɑ kʋlɑpʋtʋ tɑɑ tɔ, ɩcɑtɛ wɑɑlɩ kɛ́ pɩɩ kɑɑ-wɛ.
16 Yesu mɑ́ mɑ́ tilinɑ mɑ ɩsɔtɑɑ tillu sɩ ɩ́ kpɑɑlɩ-mɛɣɛ tǝ tǝnɑɣɑ Yesu sɛɛlɑɑ kpekɑ tɑɑ. Tɑfiiti lʋlǝnɑ nɑ pǝ́ lʋlɩ nɑ pǝ́ lʋlɩ-m. Mɑɣɑlɛ tʋlʋmɑlʋɣʋ.
17 Feesuɣu nɑ ɑsɑɑlʋ kʋfɑlʋ sɩ: Kɔɔ.
Ye wei ɩ nɩɩ mpʋ pʋntʋ ɩ́ tɔ tɔtɔ sɩ: Kɔɔ.
Lʋkɔtʋ ɩ́ kpɑ wei pʋntʋ ɩ́ kɔɔ. Ye wei ɩ cɑɑ weesuɣu lʋm, ɩ kɑ hiki-wǝɣɩ fɑɑlɑɑ.
Nti pɑ tɛɛsǝnɑ tɑkǝlɑɣɑ kɑnɛ tɔ
18 Yohɑɑnɩ mɑ́ mɑ kpɑɑlǝɣǝnɑ nɑ ɩsǝlɛ kʋsɛɛmlɛ kɛ mpɑ pɑ tǝnɑ pɑ nɩɩ cele tɔmnɑɑ mpɑ pɑ ŋmɑɑ tɑkǝlɑɣɑ kɑnɛ kɑ tɑɑ tɔ sɩ: Ye pǝ cǝpɑ wei nɑ ɩ́ sɔɔsɑ pʋlʋɣʋ tǝ tɔɔ, Ɩsɔ kɑ́ sɔɔsɩ kʋnɑɑsǝnɑm mpi pǝ tɔm pɑ kɛɛsɑ tɑkǝlɑɣɑ kɑnɛ kɑ tɑɑ tɔɣɔ pʋntʋ sɑlǝkɑ tɔɔ.
19 Nɑ ye pǝ cǝpɑ nɔɣɔlʋ nɑ ɩ́ pɑsɑ cele tɔmnɑɑ mpɑ pɑ wɛ tɑkǝlɑɣɑ kɑnɛ kɑ tɑɑ tɔ, Ɩsɔ kɑ́ pɛ pʋntʋ kɛ ɩ pɑɑ nyǝm kɛ weesuɣu tʋɣʋ pee tɑɑ, nɑ Ɩsɔ ɩcɑtɛ nɑŋŋ nyǝntɛ nte tǝ tɔm pɑ kɛɛsɑ tɑkǝlɑɣɑ kɑnɛ kɑ tɑɑ tɔ tǝ tɑɑ.
20 Wei ɩ tɔɔ pǝ tǝnɑ ɩsǝntɔ pǝ wɛnɑ tɑmpɑnɑ tɔ ɩ tɔmɑ sɩ: Kʋpɑm mɑɑ kɔɔ nɔɔnɔɔ. Ɛɛ, pǝ́ lɑ mpʋ. Tɑcɑɑ Yesu, kɔɔ mpʋ.
21 Tɑcɑɑ Yesu ɩ́ hʋ́lɩ́ mǝ tǝnɑɣɑ pɛɛlɛɛ.