5
Ɩwǝyɑɣɑ tɑkǝlɑɣɑ
1 Ḿpʋ́ɣʋ́ mɑ nɑ́ tɑkǝlɑɣɑ kɛ wei ɩ cɑɣɑ kumte tɔɔ tɔ ɩ niŋ tɑɑ, nɑ pɑ́ kpilɑ-kɛɣɛ kekeele nɑ pɑ́ ŋmɑɑwɑ kɑ tɑɑ nɑ kɑ wɑɑlɩ, nɑ pɑ́ tɑɑlɑ kɑ tɔɔ kɛ́ tɔm nɑɑtosompɔɣɔlɑɣɑ nɑ pǝ́ tʋ niŋ.
2 Nɑ mɑ́ nɑ́ ɩsɔtɑɑ tillu toŋ tʋ nɔɣɔlʋ nɑ ɩ́lɛ́ ɩ kpɑɑlǝɣǝnɑ nɔɣɔ sɔsɑɣɑ sɩ: Awe nǝɣǝsǝnɑ ɩ́ kɔɔlɩ kʋtɑɑlǝtʋ tǝnɛ nɑ ɩ́ hɛtɩ tɑkǝlɑɣɑ?
3 Ḿpʋ́ɣʋ́ pɑ tɑ nɑ nɔɣɔlʋ wei ɩ kɑ́ pǝsɩ nɑ ɩ́ hɛtɩ tɑkǝlɑɣɑ ŋkɛ nɑ ɩ́ wiili kɑ tɑɑ tɔɣɔ ɩsɔtɑɑ nɑ tɛtʋ tɔɔ nɑ tɛtʋ pǝ tɛɛ.
4 Tǝnɑɣɑ mɑ pǝlɑ ɩsǝlʋm kɛ teu, pǝ tɑɣɑ pʋlʋ tɔɔ, pɑ tɑ nɑ nɔɣɔlʋ wei ɩ nǝɣǝsǝnɑ tɑkǝlɑɣɑ ŋkɛ kɑ hɛtʋɣʋ yɑɑ kɑ wiiluɣu tɔ.
5 Ḿpʋ́ɣʋ́ sɔsɑɑ tɑɑ nɔɣɔlʋ tɔmɑ-m sɩ: Tɑɑ wii. Nyǝnɩ, Yutɑ kpekǝle tɑɑ tɔɣɔlɑɣɑ, wulɑʋ sɔsɔ Tɑfiiti lʋlʋɣʋ tɑɑ tʋ, lɑpɑ kǝllʋ. Ɩ́ pǝsǝɣɩ nɑ ɩ́ kɔɔlɩ kʋtɑɑlǝtʋ nɑɑtosompɔɣɔlɑɣɑ ɩnɩ nɑ ɩ́ hɛtɩ tɑkǝlɑɣɑ.
6 Ḿpʋ́ɣʋ́ mɑ nɑ́ Ɩwǝyɑɣɑ nɑ kɑ́ sǝŋɑ kumte hɛkʋ tɑɑ, nɑ weesiŋ nyǝ́mɑ liɣiti nɑ sɔsɑɑ pɑ cɔɔnɑ-ɩ. Kɑ nǝɣǝsǝnɑ kɛ́ ɩsɩɩ pɑɑ kʋ-kɛ. Nɑ ɩ kɑ wɛnɑ hǝŋ nɑɑtosompɔɣɔlɑɣɑ nɑ ɩ ɩsɛ kɛ nɑɑtosompɔɣɔlɑɣɑ nnɑ ɑ kɛ́ Ɩsɔ feesiŋ nɑɑtosompɔɣɔlɑɣɑ wei ɩ tilɑ tɛtʋ tǝnɑ tɑɑ tɔ.
7 Tǝnɑɣɑ Ɩwǝyɑɣɑ polɑɑ nɑ kɑ́ mʋ wei ɩ cɑɣɑ kumte tɔɔ tɔ ɩ niŋ ntɔɣɔŋ tɑɑ kɛ́ tɑkǝlɑɣɑ.
8 Ɩwǝyɑɣɑ mʋ tɑkǝlɑɣɑ ŋkɛɣɛ mpʋ, ɩlɛnɑ feesiŋ nyǝ́mɑ liɣiti ɩnɩ nɑ sɔsɑɑ hiu nɑ liɣiti ɩnɩ pɑ́ hǝntɩ-ɩ ɑtɛ. Pɑ tǝnɑ pɑɑ wɛnɑ sɑŋkʋnɑɑ kɛ́ nɑ wʋlɑ poosiisi nɑ sɩ́ sunɑ tulɑɑlʋnɑɑ kʋwɔpɑɑ mpɑ pɑ kɛ́ Ɩsɔ yǝlɑɑ sǝlǝmǝŋ tɔ.
9 Nɑ pɑ́ yoo yontu kʋfɑtʋ sɩ:
Nyɑ́ nǝɣǝsǝnɑnɑ tɑkǝlɑɣɑ ŋkɛ kɑ mʋɣʋ
nɑ kɑ tɔɔ kʋtɑɑlǝtʋ kɔɔlʋɣʋ.
Pǝ tɑɣɑ pʋlʋ tɔɔ, nyɑɣɑ pɑ kʋwɑ,
nɑ n yɑpɑ Ɩsɔ kɛ́ yǝlɑɑ kɛ nyɑ́ sǝm tɑɑ,
kɛ́ kpekɑ tǝnɑ tɑɑ, nɑ nsǝmɑ tǝnɑ tɑɑ,
nɑ piitim tǝnɑ tɑɑ, nɑ kɑteŋɑsɩ tǝnɑ tɑɑ.
10 Nɑ n lɑpɑ-wɛɣɛ ɑwulumpiyɑ sɩ pɑ́ lɑ tɑ́
Ɩsɔ kɛ́ tǝmlɛ ɩsɩɩ kɔtǝlɑɑ,
nɑ pɑɑ tɔɣɔ kɑwulɑɣɑ kɛ ɑtɛ.
11 Mɑ tɔŋnɑ ḿpʋ́ɣʋ́ nyǝnʋɣʋ ɩlɛ mɑ nɩɩ ɩsɔtɑɑ tillɑɑ tuutuumɑ tɑŋ ntɛ́, pɑɑ wɛ yǝlɑɑ iyisi iyisi. Nɑ pɑ́ sǝŋɑɑ nɑ pɑ́ cɔɔnɑ kumte nɑ weesiŋ nyǝ́mɑ nɑ sɔsɑɑ.
12 Nɑ pɑ́ yoo yontu nɑ nɔɣɔ sɔsɑɣɑ sɩ:
Ɩwǝyɑɣɑ ŋkɑ pɑɑ kʋwɑ tɔ,
ŋkɛɣɛ pǝ nǝɣǝsǝnɑ pɑ́ hɑ pǝsʋɣʋ nɑ toŋ
nɑ lǝmɑɣɑsɛɛ nɑ tomɑ nɑ sɑmtʋ nɑ teeli nɑ tɑlǝtʋ.
13 Nɑ mɑ́ nɩɩ tɔtɔɣɔ ɩsɔtɑɑ nɑ tɛtʋ tɔɔ nɑ tɛtʋ tɛɛ nɑ teŋku tɑɑ nyǝ́mɑ, nɑ ɑntulinyɑ ɩnɛ ɩ tɑɑ nyǝm tǝnɑ tǝpɑɩ yooki yontu sɩ:
Yǝlɑɑ tǝnɑ ɩ́ tɑlɑ nɑ pɑ́ sɑ
wei ɩ cɑɣɑ kumte tɔɔ tɔ nɑ ɩwǝyɑɣɑ.
Pɑ teeli nɑ pɑ pǝsʋɣʋ ɩ́ wɛɛ tɑm.
14 Tǝnɑɣɑ weesiŋ nyǝ́mɑ liɣiti cɔwɑ sɩ: Ami. Ɩlɛnɑ sɔsɑɑ nɑ́ɑ́ hǝntɩ ɑtɛ nɑ pɑ́ sɛɛ.