12
Nɑtɑŋ heeliɣi Tɑfiiti kɛ ɩ sɑlǝkɑ tʋɣʋ tɔm
1 Ḿpʋ́ɣʋ́ Tɑcɑɑ tilɑ Ɩsɔ kʋyɔɣɔtʋtʋ tɛlǝsʋlʋ Nɑtɑŋ kɛ Tɑfiiti kiŋ nɑ ɩ́ heeli-ɩ sɩ: Apɑlɑɑ nɑpǝlɩ pɑɑ wɛnɑ nɑɑlɛ kɛ ɩcɑtɛ kʋlʋmtǝlɛ tɑɑ, lɛlʋ kɛ toŋ tʋ nɑ lɛlʋ kɛ kʋnyɔntʋ.
2 Toŋ tʋ ɩnɩ ɩ kɑ wɛnɑ nɑɑŋ nɑ heeŋ kɛ sɔsɔm pǝ fɛɩ nyǝnʋɣʋ.
3 Hewɑɣɑ kʋlʋmɑɣɑ kɛ kʋnyɔntʋ nɑ́ɑ́ wɛnɑ nɑ ɩ́ tɔɔkɩ, nɑ kɑ́ nɑ ɩ piyɑ pɑ wɛɛ nɑ pɑ́ tɔkɩ nɑ pɑ́ nyɔɔkɩ tǝntǝmlɛ, nɑ kɑ́ hǝntǝɣɩ ɩ tɑtɛ tɑɑ nɑ ɩ́ nyǝnǝɣɩ-kɛ ɩsɩɩ ɩ pɛɛlɔ.
4 Ḿpʋ́ɣʋ́ kʋyɑkʋ nɑkʋlɩ ɩkɔm kɔmɑ toŋ tʋ ɩnɩ nɑ ɩ́ lɑ ɩ tɔlɑ pǝtɔɔtǝlɛ, nɑ ɩ́ kisi ɑ tɑɑ kɛ́ lǝsʋɣʋ sɩ ɩ lɑkǝnɑ ɩkɔm ɩnǝɣɩ mʋʋllɛ. Nɑ ɩ́ kpɑ kʋnyɔntʋ hewɑɣɑ ŋkɛ nɑ ɩ́ kʋ-ɩ.
5-6 Tǝnɑɣɑlɛ Tɑfiiti pɑ́ɑ́nɑ́ huuwɑ kpɑkpɑɑ tǝfɑɑ nɑ ɩ́ tɔ sɩ: Mɑ tuunɑ Tɑcɑɑ sɩ yʋlʋ wei ɩnɩ ɩ lɑpɑ mpʋ tɔ pǝ wɛɛ sɩ ɩ́ fɛlɩ heeŋ liɣiti kɛ yɑɑsi wei ɩ lɑpɑ mpʋ nɑ ɩ́ fɛɩnɑ pǝtɔɔtǝlɛ tɔ. Pǝyele pǝ tɩɩ mʋnɑ pɑ́ kʋ-ɩ kɛ́.
7 Ntɛnɑ Nɑtɑŋ sɩ: Nyɑɣɑlɛ yʋlʋ ɩnɩ. Ɩsɛɣɛlɩ Ɩsɔ Tɑcɑɑ yɔɣɔtɑɑ sɩ ɩnɩ ɩ kpɑnɑ-ŋ Ɩsɛɣɛlɩ nyǝ́mɑ wulɑʋ nɑ ɩ́ yɑ-ŋ Sɑyuli niŋ tɑɑ
8 nɑ ɩ́ hɑ-ŋ tǝyɑɣɑ nɑ ɑlɑɑ nɑ ɩ́ tʋ nyɑ́ niŋ tɑɑ kɛ́ Ɩsɛɣɛlɩ nyǝ́mɑ nɑ Yutɑ nyǝ́mɑ. Ye n kɑ heelɑ-ɩ sɩ pǝlɛ pǝ tɑ tɔɔ-ŋ ɩ kɑ sɔɔsɑ-ŋ.
9 Pepe tɔɔ kɛ́ n nyǝnɑ Tɑcɑɑ tɔm kɛ yem nɑ ń lɑ mpi pǝ tɑ mɑɣɑ-ɩ tɔ? N kʋ Yulii nɑ Amoni nyǝ́mɑ lɑɣɑtɛ, nɑ ń kpɑɣɑ ɩ ɑlʋ.
10 Timpi n nyǝnɑ-ɩ yem kɛ mpʋ nɑ ń kpɑɣɑ Yulii ɑlʋ tɔ, yoou kɑɑ hɑtǝlǝnɑ nyɑ́ tǝyɑɣɑ tɔtɔ.
11 Ḿpʋ́ɣʋ́ Tɑcɑɑ tɑsɑɑ sɩ: Mɑɑ yele nɑ nyɑ́ piyɑ tɑɑ nɔɣɔlʋ wɑkǝlɩ nyɑ́ lɑŋlɛ. Mɑɑ hɑ nɔɣɔlʋɣʋ nyɑ́ ɑlɑɑ kɛ nyɑ́ ɩsɛntɑɑ nɑ ɩ́lɛ́ ɩ sʋʋnɑ-wɛ nɑ ilim nɑ pǝ ɩsǝlɛ.
12 Nyɑ́ ŋmɛlɑɑ kɛ́ nɑ n lɑ nɔɣɔlʋ tɑ nɑ. Amɑ ilim tɑɑ kɛ́ mɑɑ lɑ mɑ nyǝntʋ nɑ Ɩsɛɣɛlɩ nyǝ́mɑ tǝnɑ nɑ.
13 Tǝnɑɣɑ Tɑfiiti tɔmɑ sɩ: Mɑ wɑkǝlǝnɑ Tɑcɑɑ kɛ́. Ɩlɛnɑ Nɑtɑŋ nɑ́ɑ́ tɔmɩ-ɩ sɩ: Tɑcɑɑ hɩɩsɑ nyɑ́ ɩsɑɣɑtʋ, n kɑɑ tɑsɑ sǝm.
14 Amɑ timpi n yelɑɑ nɑ Tɑcɑɑ kolontunɑɑ kpɑ ɩ tɔɔ nɑ pɑ́ nɩ pʋntʋ tɔ, pǝyɑɣɑ ŋkɑ pǝ lʋlɑ-ŋ tɔ ŋkɛ kɑɑ sǝnɑ.
15 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ Nɑtɑŋ kpemɑ ɩ tɛ.
Pɑsepɑ pǝyɑɣɑ sǝm
Ḿpʋ́ɣʋ́ Tɑcɑɑ yelɑɑ nɑ kʋtɔŋ sɔsɔɔʋ nɑkʋlɩ kʋ kpɑ Yulii leelu pǝyɑɣɑ ŋkɛ.
16 Ḿpʋ́ɣʋ́ Tɑfiiti hɔkɑ nɔɣɔ nɑ ɩ́ sǝlǝmɩ Tɑcɑɑ kɛ pǝyɑɣɑ ŋkɛ kɑ tɔɔ. Atɛɣɛ ɩ hǝntɑɣɑ pɑɑ ɑhoo nnɑ, nyɑɑlʋɣʋ fɛɩ.
17 Ɩlɛnɑ ɩ tǝyɑɣɑ sɔsɑɑ kɑɑnɑ-ɩ sɩ ɩ́ kʋlɩ ɑtɛ ɩ tɑ tisi. Pǝ́cɔ́ ɩ kisɑ tɔɣɔʋ.
18 Ɩlɛnɑ pǝyɑɣɑ sɩ kʋyɑkʋ nɑɑtosompɔɣɔlɑɣɑ nyǝŋkʋ wule. Amɑ Tɑfiiti wɑɑlɩ nyǝ́mɑ nyɑmnɑ-ɩ kɑ sǝm tɔm kɛ heeluɣu. Mpi tɔ, pɑ mɑɣɑsɑɣɑ pɑ tɑɑ kɛ́ sɩ, wʋsɑsɩ tɑɑ kɛlɛ tǝ yɔɣɔtɑɣɑnɑ-ɩ ɩ tɑ cɔ, kɑ lɑɑlɑɑ nɑ kɑ́ sɩ́ ɩsǝntɔ tɔ ye tǝ heelɑ-ɩ ɩ lɑŋlɛ kɑ́ tɛɛsɩ wɑkǝlʋɣʋ tǝtɔɣɔtɔɣɔ.
19 Ɩlɛ Tɑfiiti nɩɩwɑ pɑ wɛlǝtǝɣɩ tǝmɑɣɑlɛ, ɩlɛnɑ ɩ́ cɛkǝnɑ sɩ pǝyɑɣɑ sǝpɑ. Ntɛnɑ ɩ́ pɔɔsɩ-wɛ sɩ: Kɑ sǝpɑɣɑ? Pɛlɛ sɩ: Ɛɛ.
20 Tǝnɑɣɑlɛ Tɑfiiti kʋlɑ ɑtɛ nɑ ɩ́ sɔ lʋm nɑ ɩ́ lɑɣɑsɩ wontu. Ɩlɛnɑ ɩ́ sʋʋ Tɑcɑɑ tǝyɑɣɑ tɑɑ nɑ ɩ́ hǝntɩ-ɩ ɑtɛ. Ɩ mǝlɑ tǝyɑɣɑ ɩlɛnɑ ɩ́ yɔɣɔtɩ nɑ pɑ́ kɔnɑ-ɩ tɔɣɔnɑɣɑ nɑ ɩ́ tɔɣɔ.
21 Mpʋɣʋlɛ ɩ wɑɑlɩ nyǝ́mɑ pɔɔsɑ-ɩ sɩ: Wenti n lɑpɑ mpʋ tɔ, tǝ tɑpʋɣʋ suweɣelɛ? Pǝ tɔkɑ pǝyɑɣɑ kɛ kʋtɔkʋ kɑ tɑ sǝtɑ ɩlɛnɑ ń mǝlɩ n wiiki nɑ ń kisiɣi tɔɣɔʋ. Pǝ mǝlɑɑ nɑ pǝyɑɣɑ sɩ ɩlɛnɑ ń kʋlɩ nɑ ń nɑɑlɩ tɔɣɔʋ nɑ?
22 Ntɛnɑ Tɑfiiti cɔ-wɛ sɩ: Mɑ wiikɑɣɑ nɑ mɑ́ hɔkǝɣɩ nɔɣɔ kɛ mpʋ tɔ nɑ mɑ́ tɛɛlǝɣɩ kɛ́ sɩ ntɑnyɩ Tɑcɑɑ kɑ́ nɑ́ mɑ pǝtɔɔtǝlɛ nɑ ɩ́ wɑɑ-kɛ.
23 Tɔʋ, nɔɔnɔɔ kɑ sǝpɑ tɔ, pepe tɔɔ kɛ́ mɑɑ tɑsɑ nɔɣɔ hɔkʋɣʋ? Anɩ mɑ kɑɑ pǝsɩ nɑ mɑ́ tɑɣɑnɩ-kɛɣɛ kʋsʋɣʋ. Amɑ mɑ́ɑ́ tɛnɑ nɑ mɑ́ polo kɑ kiŋ. Tɔfɔ kɑ fɛɩ sɩ kɑ tɑsǝɣɩ mǝlʋɣʋ kɛ mɑ kiŋ tɔtɔ.
Sɑlʋmɔŋ lʋlʋɣʋ
24 Ḿpʋ́ɣʋ́ Tɑfiiti hɛɛsɑ ɩ ɑlʋ Pɑsepɑ lɑŋlɛ nɑ ɩ́ kpǝtǝnɑ-ɩ nɑ ɩ́ lʋlɩ ɑpɑlʋpǝyɑɣɑ nɑ ɩ́ hɑ-kɛɣɛ hǝtɛ sɩ Sɑlʋmɔŋ, nɑ Tɑcɑɑ luɣu sʋʋ-kɛɣɛ teu.
25 Ɩlɛnɑ Tɑfiiti cɛlɛ-kɛɣɛ Ɩsɔ kʋyɔɣɔtʋtʋ tɛlǝsʋlʋ Nɑtɑŋ nɑ ɩ́lɛ́ ɩ hɑ-kɛɣɛ hǝtɛ sɩ Tɑcɑɑ sɔɔlɑ-ɩ.
Lɑpɑ ɩcɑtɛ lɛɛkʋɣʋ
(Kʋtɔɔsʋtʋ I 20:1-3)
26 Tɑfiiti yoolɑɑ wulɑʋ Sowɑpɩ kɑ tɑmɑ Amoni nyǝ́mɑ ɩcɑtɛ sɔsɔɔlɛ Lɑpɑ. Wɑɑtʋ wei ɩ lɛɛkɑ-tɛ
27 ɩlɛnɑ ɩ́ tili nɑ pɑ́ heeli Tɑfiiti sɩ: Mɑ tɛɛsɑ lʋm hɔɣɔlʋɣʋ ɩcɑtɛ kɛ lɛɛkʋɣʋ.
28 Mpʋ tɔ, kpeɣeli yoolɑɑ mpɑ pǝ kɑɑsɑɑ tɔ nɑ ŋ́ kɔɔ nɑ ŋ́ mʋ-tɛ. Pǝ tɑɑ kɔɔ nɑ mɑ́ sʋʋ tǝ tɑɑ nɑ pɑ́ mǝlɩ-m sɑm.
29 Ḿpʋ́ɣʋ́ Tɑfiiti kpeɣelɑ yoolɑɑ nɑ pɑ́ kpɑ Lɑpɑ tɔɔ nɑ pɑ́ lɛɛkɩ-tɛ.
30 Ɩlɛnɑ Tɑfiiti kuli tǝ wulɑʋ kɑwulɑɣɑ ntenuɣu. Wʋlɑ kɛ pɑ lupɑ-kʋ, kʋ yuŋ wɛ ɩsɩɩ kiloonɑɑ hiu nɑ nɑɑnʋwɑ nɑ liɣiti kɛ mpʋ, nɑ pɑ́ tʋ kʋ tɔɔ kɛ́ liɣitee pɛɛ. Ḿpʋ́ɣʋ́ pɑ temɑ-kʋɣʋ Tɑfiiti nyʋɣʋ nɑ ɩ́ kuu ɩcɑtɛ tɑɑ kɛ́ wontu tuutuumɑ tɔtɔ.
31 Pǝ kɑɑsɑ ɩcɑtɛ yǝlɑɑ ɩlɛnɑ ɩ́ tʋ lɛlɑɑ kɛ kɑɑfǝntɑnɑɑ tǝmlɛ nɑ lɛlɑɑ kɛ nyǝɣǝtʋ hɑlǝnɑʋ nɑ lɛlɑɑ kɛ tɑwɑ tǝmɑ nɑ lɛlɑɑ kɛ pilikinɑɑ wɔpʋ. Ḿpʋ́ɣʋ́ Tɑfiiti lɑpǝnɑ Amoni ɩcɑtɛ tǝnɑ. Ɩlɛnɑ ɩ́ nɑ ɩ yǝlɑɑ pɑ́ mǝlɩ Yosɑlɛm.