5
Sɑkɑlɩ toosee tɑkɑ nɑɑtoso nyənɑ
1 Ḿpʋɣʋ pə lɑpɑ-m ɩsɩɩ toosee tɑkɑ. Ɩlɛ mɑ nɑwɑ tɑkəlɑɣɑ nɑ kɑ́ kʋləɣɩ hʋntʋ ntɛ.
2 Ɩlɛnɑ ɩsɔtɑɑ tillu pɔɔsɩ-m sɩ: Pepeɣe n nɑɑkɩ? Mɑ sɩ: Tɑkəlɑɣɑ hɛtənɑ nɑ kɑ́ kʋləɣɩ hʋntʋ. Kɑ tɑɣɑləŋ wɛ mɛɛtələnɑɑ nɑɑnʋwɑ. Kɑ wɑŋ kɛ mɛɛtələnɑɑ kɑkpɑsɩ.
3 Ḿpʋɣʋ ɩ tɔmɑ-m sɩ: Mpusi kɑ́ mɑɣɑnɑ tɛtʋ tɑɑ ŋmɩɩlɑɑ, nɑ mpɑ pɑ tuukinɑ yem yem tɔ, pɑɑ ləsɩ-wɛɣɛ tɛtʋ. Mpɛɣɛ pɑ ŋmɑɑ kɑ tɑɑ nɑ kɑ wɑɑlɩ.
4 Pə tənɑ pə tʋ Tɑcɑɑ sɩ: Mɑ mɑɣɑmɑɣɑ mɑɑ kɔnnɑ mpusi ɩnɩ. Mpusi ɩnɩ ɩ kɑ́ sʋʋ pɑɑ ŋmɩɩlʋ wei, nɑ mpɑ pɑ tuukinɑ mɑ hətɛ kɛ yem yem tɔ, pɑ tɛɛsɩ tɑɑ. Ɩ kɑ́ cɑɣɑ tənɑ nɑ ɩ́ wɑkəlɩ kutuluɣu nɑ kʋ pɛɛ nɑ kʋ kpɑtəŋ.
Sɑkɑlɩ toosee tɑkɑ nɑɑtosompɔɣɔlɑɣɑ nyənɑ
5 Ḿpʋɣʋ ɩsɔtɑɑ tillu wei ɩ yɔɣɔtənɑ-m tɔ ɩ kɔmɑ nɑ ɩ́ tɔ-m sɩ: Kʋsɩ ɩsɛ. Pepe nɑ pepeɣe n nɑɑkɩ tənɑ?
6 Ɩlɛnɑ mɑ́ pɔɔsɩ-ɩ sɩ: Pepeɣelɛ? Mpʋɣʋlɛ sɩ: Tɔkʋ ŋku kʋ tɑɑ wɛ ɩsɑɣɑtʋ tənɑ tɔɣɔlɛ.
7 Wɑɑtʋ ɩnəɣɩ tɔkʋ ŋkʋ kʋ pəle nyəɣəlʋɣʋ nyəntɛ kulɑɑ nɑ mɑ́ nɑ́ ɑlʋ nɔɣɔlʋ nɑ ɩ́ cɑɣɑ kʋ tɑɑ.
8 Ntɛnɑ ɩsɔtɑɑ tillu sɩ: Alʋ ɩnɛ ɩ kɛnɑ ɩsɑɣɑtʋ. Ɩlɛnɑ ɩ́ tusi-ɩ nɑ ɩ́ məŋnɑ kʋ tɑɑ tənɑ nɑ ɩ́ pɑ́ pəle.
9 Mɑ kʋsɑ ɩsɛ, ɩlɛ heelim kpɑɣɑ ɑlɑɑ nɑpələɣəlɛ nɑɑlɛ nɑ pə́ kɔnɑ. Pɑ keŋ nəɣəsənɑ kɛ́ ɩsɩɩ kʋlɑɑləŋ. Ḿpʋɣʋ pɑ kpɑɣɑ tɔkʋ ŋkʋ nɑ pɑ́ tɛɛnɑ.
10 Ḿpʋɣʋ mɑ pɔɔsɑ ɩsɔtɑɑ tillu sɩ: Leɣe pɑ pukinɑ-kʋ?
11 Ntɛnɑ ɩ́ cɔ-m sɩ: Pɑpiloni kɛ pɑ puki sɩ pɑ ŋmɑ kutuluɣu nɑ pɑ́ sɩɩ-ɩ nɑ pɑ́ lɑɑkɩ.