2
Tǝpɑsǝlɑɑ yɑɑʋ
1 Ḿpʋ́ɣʋ́ Sofoni tɔmɑ sɩ:
Fɛɛlɛfɛɩ nyǝ́mɑ mɛ.
Ɩ́ kpɑ mǝ tɩ nɑ ɩ́ mɑɣɑsɩ mǝ tɑɑ.
2 Pǝ tɑɑ yɑsɩ-mɛ ɩsɩɩ nyɩɩtʋ kɛ kʋyɑkʋ kʋlʋmʋɣʋ tɑɑ,
nɑ pǝ́cɔ́ pɩɩ tɑkɩ kʋyɑkʋ ŋku Tɑcɑɑ kɑ́ mʋ-mɛ nɑ pɑ́ɑ́nɑ́
sɔsɔɔnɑ tɔ.
3 Tɛtʋ tɑɑ tǝpɑsǝlɑɑ mɛ mpɑ ɩ́ tɔkǝɣɩ Ɩsɔ kiiŋ kɛ teu tɔ.
Ɩ́ kɛɛsǝnɑ Tɑcɑɑ tɔɔ.
Ɩ́ tɔkɩ mǝ tǝpɑsʋɣʋ nɑ ɩ́ tǝŋǝɣɩ tɑmpɑnɑ.
Ntɑnyɩ pɩɩ kenti mǝ tɔɔ kɛ́ Ɩsɔ pɑ́ɑ́nɑ́ kʋyɑkʋ wule.
Ilim tǝtʋlɛ tɔɔ nyǝ́mɑ ŋkpɑŋʋɣʋ hɔm
4 Kɑsɑ ɩcɑtɛ kɑ́ pǝsɩ wʋlɑɣɑ tɛtʋ.
Asǝkɑlɔŋ nyǝntɛ kɑ́ yɔkɩ.
Pɑɑ tɔɣɔnɩ Asǝtɔtɩ yǝlɑɑ kɛ ilim tɑɑ.
Pɑɑ lǝsɩ Ɩkoloŋ nyǝ́mɑ.
5 Kǝlɛtɩ nyǝ́mɑ mɛ mpɑ ɩ́ kɔmɑ teŋku nɔɣɔ tɔ,
mpusi wɛ mǝ tɔɔ kɛ́.
Tɑcɑɑ sɩ: Mɑɑ kpiisi Filiisi nyǝ́mɑ nɑ pɑ tɛtʋ tǝnɑ.
6 Mǝ tɛtʋ kɛ teŋku nɔɣɔ tǝnɑ kɑ́ pǝsɩ tɔlɑ tǝtɔɣɔlɛ.
Tiikilɑɑ kɑ́ tɔŋ tǝ tɑɑ, nɑ pɑ́ lɑ pɑ heeŋ tǝtǝkǝlɛ.
7 Yutɑ yǝlɑɑ kʋkɑɑsɑɑ kɑ́ tɔɣɔnɑ hɔɣɔlʋɣʋ ŋkʋ.
Tǝnɑɣɑ ɩ́ kɑ́ tiikiɣi mǝ kɑlǝkǝŋ,
ɩlɛnɑ ɩ́ puki Asǝkɑlɔŋ nɑ ɩ́ sʋʋkɩ tɑɑnɑsɩ.
Mǝ Ɩsɔ Tɑcɑɑ kɑ́ yoonɑ mǝ nɔɣɔ.
Ɩ kɑ́ mǝŋnɑ mǝ yǝlɑɑ mpɑ kolontunɑɑ kɑ kpɑwɑ yomle tɔ.
Ilim tǝlɩɩlɛ nyǝ́mɑ ŋkpɑŋʋɣʋ hɔm
8 Ḿpʋ́ɣʋ́ Tɑcɑɑ tɔmɑ sɩ:
Mɑ nɩɩwɑ ɩsǝnɑ Mowɑpʋ nyǝ́mɑ
nɑ Amoŋ nyǝ́mɑ pɑ woŋɑ mɑ yǝlɑɑ mɛ,
nɑ pɑ́ footi-mɛ tɔ.
Pɑ tʋʋ-mɛ,
pɑ cusɑ mǝ tɛtʋ nɑ kɑlɑmpɑɑnɩ
nɑ pɑ́ sɔɔsɩ pɑ nyǝntʋ tɔɔ.
9 Pǝ tǝnɑ pǝ tʋ Ɩsɔ Tɑcɑɑ mɑ́,
mɑ tuuki sɩ ɩsɩɩ mɑ kpiisɑ Mowɑpʋ
nɑ Amoŋ pǝ nyǝ́mɑ ɩsɩɩ Sɔtɔm nɑ Kɔmɔɔ.
Pɑ tɛtʋ kɑ́ pǝsɩ tɔm tǝhulle nɑ wʋlɑɣɑ tɛtʋ
nɑ sɔwɑ tike nyɑlɑ.
Mɑ yǝlɑɑ kɑkɑɑsɑɣɑ kɑ́ kɔnnɑ nɑ pɑ́ kuu pɑ wɛnɑʋ,
nɑ pɑ́ tɔɣɔ pɑ tɛtʋ.
10 Ɩsǝnɑ mɑɑ hɔ pɑ ŋkpɑŋʋɣʋ tɔɣɔlɛ.
Mpi tɔ, pɑ kǝlɑ kɑlɑmpɑɑnɩ kɛ́
nɑ pɑ́ tʋʋ Pǝ tǝnɑ pǝ tʋ mɑ́,
mɑ yǝlɑɑ.
11 Tɑcɑɑ mɑ́, mɑɑ nyǝŋsɩ pɑ ɩsɛ kɛ teu kɛ tǝnɑɣɑ.
Mɑɑ wɑkǝlɩ ɑntulinyɑ tǝnɑ tɑɑ tɩɩŋ.
Ɩlɛ piitimnɑɑ tǝnɑ kɑ́ sɛɛ-m pɑ tɛtʋ tɑɑ.
Hɑlǝnɑ pǝ kpɛnnɑ hɑtǝlɑɣɑ nyǝ́mɑ tǝnɑ.
Ilim ntɔɣɔŋ nɑ pǝ mpǝtǝŋ nyǝ́mɑ ŋkpɑŋʋɣʋ hɔm
12 Ḿpʋ́ɣʋ́ Tɑcɑɑ tɔmɑ sɩ:
Mɑɑ kʋ Ɩtiyopii nyǝ́mɑ mɛ mǝ tǝnɑɣɑ yoou tɑɑ.
13 Mɑɑ tʋ ilim ntɔɣɔŋ tɔɔ hɔɣɔlʋɣʋ Asilii nyǝ́mɑ kɛ niŋ.
Mɑɑ wɑkǝlɩ-kʋ nɑ Ninifi ɩcɑtɛ sɔsɔɔlɛ pǝsɩ ncɑɑlɛ
nɑ wʋlɑɣɑ tɛtʋ.
14 Kɑlǝkǝŋ kɑ́ hǝntǝɣǝnɑ ɩcɑtɛ lonte tɑɑ,
nɑ tɑɑlɛ wontu kɛ wɑɑnɩ wɑɑnɩ.
Kpiisiŋ nɑ ɑluɣucɑnɑ kɑ́ cɑɣɑ ɑkelenɑɑ ncɑɑ tɑɑ.
Pɑɑ pɛlɩ kutuluŋ tɑɑ kpeŋkpelɑsɩ kʋpɑŋsɩ,
nɑ sɩ sɔɣɔtɩ nɔnɔɣɔ.
Kɑtǝkɑtǝŋ kɑ́ wiiki ncɑɑ pǝtolee tɔɔ.
15 Ɩsǝnɑ ɩcɑtɛ ńtɛ́ tɩɩ tɛnɑ tɔɣɔlɛ.
Pɑɑ nɑ tǝ yǝlɑɑ nyǝnɑɣɑ-tɛɣɛ sɔsɔɔlɛ,
nte tǝ fɛɩnɑ sɑɑlɑ tɔ.
Tɩɩ pǝsɩ ncɑɑlɛ nɑ pǝ́ yelinɑ tɑɑlɛ wontu.
Ɩlɛnɑ tɛɛlɑɑ tǝnɑ kpɛɛtǝɣɩ nyɔɔŋ nɑ pɑ́ sɔ́ɔ́lǝ́ɣɩ́-tɛ.