Bo̱r u̱r-kwo̱o̱z u̱s-yoor
1 Burus ze̱e̱ru̱, “No̱ o̱r re ne̱ u̱n tat-ne̱ ne̱, raks no̱ u̱t-to̱, u̱m ru̱ru̱ no̱ yo no̱me̱ à, remen u̱m kututú̱ no̱ u̱nze me̱tt u̱r-ba'as á.”
2 Bo̱ ye̱ ho̱gu̱te̱ wu̱ cepu̱te̱ ye̱ u̱t-ma u̱n rem-de u̱t-Ibra à, ye̱ jamsu̱ru̱ m-rest temb.
Ka da-o̱, Burus ze̱e̱ru̱:
3 “Me̱ ko-Yahuda-wu̱. Tarsus-o̱ a matu̱ me̱, u̱n dak-o̱ o-Kirikiya, amba u̱n ka bo̱-o̱ o-Urusharima u̱m bo̱'o̱se̱. U̱m yooste̱ m-karante̱ u̱n ku̱s-o Gamariyer, wu̱ yoosu̱ me̱ ko̱yan be-de u̱n ma-to̱ u̱n karamsa-u̱t tat na ne̱. Me̱ m-se̱nge̱ ne̱ be-de u̱n gu̱w-mo̱ Shir, bo̱ no̱ m-no̱m kap-m no̱ caane̱ à.
4 Har u̱m rangsu̱te̱ yan-do̱re̱ u̱n ka Co̱w-yo a hoomtú̱ ye̱ de̱e̱n. U̱m ka'ag hun-ne̱ campo̱-ne̱ u̱n ne'a-ne̱ ne̱, u̱n kur-o̱ m-ke'et.
5 Har ma ko-Gwo̱mo-wu̱ u̱n ko̱n-se Shir ma u̱n kap o̱ u̱n Mo̱ro̱g-de u̱n Se̱k-ye̱ ne̱, ye̱a hoks me̱ m-su̱'e̱. Be-de u̱n ye̱ u̱m go̱kse̱ u̱t-taku̱rda haan-mo̱ u̱n o̱r na ne̱ Yahuda-ne̱ n-me̱ bo̱-o̱ o-Damaskus. Me̱ m-ha u̱n ka be-de remen u̱m shipt yan-do̱re̱ u̱n ka co̱w-yo ye̱ ro̱ re̱e̱no̱ à, u̱m hantu̱tu̱ ye̱ o-Urusharima remen a piishité̱ ye̱ u̱t-ma, a 'ye ye̱ u̱r-ko̱o̱b.
Burus rwo̱ro̱g bo̱ wu̱ nome̱
wu̱ waktu̱nte̱ be-de u̱n dor-o̱ Shir à
(Se̱ng 9:1-19; 26:12-18)
6 “Me̱ m-neke̱, u̱m ro yow yow u̱m woot o-Damaskus, ho̱-u̱r ro̱ u̱r-hi. Mo̱ ken caari-mo̱ m-cecar mo̱ cir-mo̱ n-To̱n mo̱ caragsu̱ru̱ be-de u̱m ro'e̱ à.
7 U̱m argu̱ m-he̱ n-dak, komo u̱m ho̱gu̱ru̱ o̱ ken co̱r-o̱, o̱ ro̱ me̱ m-ze̱e̱, ‘Shawuru, Shawuru, ¿remen yan o̱ wo̱ttu̱ me̱ m-rangse̱?’
8 “U̱m citu̱ru̱, ‘Wa-u̱t-Go̱s, ¿Wo̱ wu̱ wa ne̱?’
“Wu̱ ze̱e̱ru̱ me̱, ‘Me̱ ro̱ Ye̱so ko-ya-o-Nazaret ka wu̱ wo̱ m-rangse̱ à.’
9 To̱, ka yan-hew u̱n de ye̱, ye̱ hyenu̱ste̱ ka cecar-mo̱, amba ye̱ nap co̱r-o̱ u̱n wu̱ ro̱ u̱n te̱p u̱n me̱ ne̱ á.
10 “U̱m citu̱ru̱, ‘Wa-u̱t-Go̱s, ¿ya u̱m he m-no̱mu̱ ne̱?’
“Wan-Ko̱yan ze̱e̱ru̱ me̱, ‘Ine̱, o cu̱w o-Damaskus, re̱e̱no̱ a he wo̱ m-rure̱ rii-yo a e̱sse̱ wo̱ o nom à.’
11 Yan-hew u̱n de naku̱ me̱ u̱t-kom. Ye̱ tu̱wtu̱ me̱ o-Damaskus, remen me̱ ro m-hoks m-hyan á remen ka cecar-mo̱ no̱mo̱g de̱e̱n.
12 “Wu̱ ken ne̱t-wu̱ jin-de u̱n wu̱ Hananiya, wu̱ haanu̱ru̱ wu̱ hyenet me̱. Wan-dor-o̱ o-karamsa m-so̱k ne̱, kap Yahuda-ne̱ ro̱ wu̱ m-'ya m-se̱k de̱e̱n.
13 Wu̱ e̱ssu̱ru̱ u̱n riib-o re, wu̱ ze̱e̱ru̱ me̱, ‘O̱r re Shawuru, go̱ks o-hyan.’ Da-o gaan, yish re upsu̱ru̱, u̱m hyanu̱ wu̱ komo.
14 “Wu̱ ze̱e̱ru̱, ‘Shir o̱ u̱n Tat na ne̱ dagantu̱ wo̱ o nep yo wu̱ co̱ne̱ à, o hyenet ka Kashi u̱n Ne̱t-wu̱, komo o ho̱gu̱te̱ ma-to̱ u̱n nu-o̱ u̱n wu̱.
15 Remen wo̱a wakte̱ wan-su̱'e̱ u̱n wu̱ be-de u̱n hun-ne̱ u̱n kap mo̱sse̱ u̱n rii-yo o hyane̱ ne̱ à, komo u̱n yo o ho̱ge̱ ne̱ à.
16 To̱, m-mo̱ka ¿ya wo̱ u̱r-'er? Ine̱, a yo'os wo̱ m-ho̱ a so'oste̱ ba'as-u̱t ru be-de u̱n aag u̱n jin-u̱r Wan-Ko̱yan.’
Eeg Burus ha-mo̱ u̱n
be-de u̱n ye̱ ro̱ Yahuda-ne̱ á
17 “Bo̱ u̱m musunte̱ o-Urusharima à, me̱ u̱s-ko̱n n-me̱ u̱n Pyo-o̱ Shir, u̱m hyanu̱ u̱t-hyangan.
18 N-me̱ u̱n ka hyangan-to̱ komo u̱m hyanu̱ Ye̱so. Wu̱ ma'asu̱ me̱ m-ze̱e̱, ‘No̱m ku̱sse̱! Ine̱, o yage̱ o-Urusharima ho̱r-m-ho̱r. Me̱ u̱n ze̱e̱ káane̱, remen ká hun-ne̱ ye̱ kàne̱, ye̱a dek ma-to̱ o he me̱ m-su̱'e̱ á.’
19 “Me̱ komo u̱m ze̱e̱g, ‘Wan-Ko̱yan, ai ka hun-ne̱ ye̱ ma u̱n hi u̱n de u̱n ye̱, ye̱ nepste̱ u̱nze u̱n ko̱ o̱ ke kuke̱-o̱ u̱n yoos u̱n Ma-to̱ Shir o̱ u̱m ka'ag ye̱ she̱re̱ u̱n wo̱ ne̱ à. Komo u̱m bu ka ye̱ she̱re̱ be u̱n du à.
20 Da-o̱ a wu̱u̱se̱ hyó-m Istipanus wu̱ ro wo̱ m-su̱'e̱ à, me̱ u̱n hi u̱n de, u̱m ro kon kane̱ eso, me u̱n swo̱-se u̱n rii-yo a no̱me̱ à, har ma me̱ ro u̱n 'er-de u̱n matuku-to̱ u̱n ka ye̱ ho̱ wu̱ à.
21 “Ka da-o̱, Wan-Ko̱yan ze̱e̱ru̱ me̱, ‘Ine̱ o arag, man tom wo̱ re̱e̱no̱ u̱r-hew ne̱ be-de u̱n hun-ne̱ ye̱ ro̱ Yahuda-ne̱ á.’ ”
22 Mo̱ro̱g-u̱r se̱ngu̱ru̱ rege̱n Burus u̱t-to̱ har wu̱ ze̱e̱ru̱ yo ka. Ye̱ daku̱ u̱s-co̱r, ye̱ ze̱e̱ru̱, “A ho wu̱! A wongse̱ go̱n ka ne̱t-wu̱ u̱n ho̱no o-dak ne̱, u̱depe̱ wu̱ nom ho̱o̱g á!”
23 Bo̱ ye̱ ro u̱n dak u̱s-co̱r ye̱ u̱n jore̱ u̱n co̱p-to̱ u̱n ye̱, ye̱ u̱n aas m-hu n-to̱n m-yo.
24 Remen kaane̱ ka go̱s-wu̱ wu̱ u̱n karma-ne̱ wu̱ rwo̱'u̱ru̱ a woot Burus u̱n bariki-o̱ u̱n karma-ne̱. Wu̱ rwo̱'u̱ru̱ a nome̱ wu̱ u̱s-so̱ro̱g, remen wu̱ nept rii-yo rwo̱'e̱ hun-ne̱ ro̱ttu̱ wu̱ u̱n deke̱ u̱s-co̱r kaane̱ à.
25 Amba bo̱ ye̱ gage̱ wu̱ remen ye̱ bu'ut wu̱ à, Burus ze̱e̱ru̱ caari-wu̱ u̱n ko-karma-wu̱ u̱n Roma-ne̱ wu̱ ro̱ eso yow yow à, “Ashi, ¿hond hond o̱ n-te̱ o-karamsa a nome̱ mat-de u̱n ko-Roma u̱s-so̱ro̱g ba a u̱n piishi wu̱ u̱t-ma?”
26 Bo̱ caari-wu̱ u̱n ko-karma-wu̱ u̱n Roma-ne̱ ho̱gu̱te̱ kaane̱ à, wu̱ neku̱ru̱ be-de u̱n go̱s-wu̱ wu̱ karma-ne̱. Wu̱ ze̱e̱ru̱ wu̱, “¿Ya wo̱ u̱n sakto̱-o̱ m-no̱m o̱? Ka ne̱t-wu̱ ha mat-de u̱n ko-Roma-wu̱.”
27 Go̱s-wu̱ u̱n karma-ne̱ wo̱o̱nu̱ru̱ wu̱ citu̱ru̱ Burus, “Ru̱ru̱ me̱ o-nip, ¿wo̱ ko-Roma-wu̱?”
Burus shasu̱ru̱, “Eba.”
28 Go̱s-wu̱ u̱n karma-ne̱ ze̱e̱ru̱, “Me̱ u̱n ya'as hwo̱r de̱e̱n u̱m kumut ka rii-yo, yo ze̱e̱ me̱ ko-o-Roma u̱m ro̱ à.”
Burus ze̱e̱ru̱, “Me̱ ne̱ mat-de jip u̱n to̱ ne̱ a matu̱ me̱.”
29 Remen kaane̱ ye̱ ro̱ o-sakto̱ ye̱ cit wu̱ à, da-o gaan ye̱ wargu̱ jim. Wu̱ ma go̱s-wu̱ wu̱ u̱n karma-ne̱ bo̱ wu̱ nepte̱ u̱nze Burus mat-de u̱n ko-Roma-de à wu̱ ho̱gu̱ru̱ o-gye̱r, wu̱ ka ne̱ rege̱ wu̱ ke'estu̱ wu̱.
Burus be-de yan-piish u̱t-ma
30 Bo̱ ish geste̱ à, go̱s-wu̱ wu̱ u̱n karma-ne̱ co̱nu̱ wu̱ nep u̱rege̱ nip-o̱ gyekt-se Yahuda-ne̱ ro̱ m-hante̱ u̱n Burus à. Wu̱ ussu̱ru̱ wu̱, wu̱ rwo̱'u̱ru̱ Gwo̱mo-ne̱ ye̱ u̱n ko̱n-se Shir u̱n kap Mo̱ro̱g-de u̱n Se̱k-ye̱ ne̱ ye̱ mo̱rge̱. Ka da-de wu̱ deknu̱ Burus, wu̱ ze̱e̱ru̱ Burus wu̱ es u̱n co-o̱ u̱n ye̱.