Bo̱r-u̱s o̱p u̱s-tet
M-was
1 Ko̱ u̱m hoks nap u̱n te̱p
u̱n rem-to̱ u̱n hun-ne̱ ho̱r-ye̱ u̱n to̱
u̱n yan-to̱m-ye̱ Shir ne̱,
amba u̱rege̱ me̱ m-was u̱n o̱r re ne̱ á,
u̱m waragte̱ o̱ ká u̱ntu̱n o-jeger yo
u̱n zaaz-o̱ o-hwaa,
ko̱ ne̱ o-kanga o̱ u̱n kaas u̱n hun-ne̱ u̱t-to̱ o-zaaz.
2 Ko̱ me̱ u̱n yar-mo̱ u̱n ko̱'o̱t u̱n ma-to̱ rwu̱u̱ne̱ be-de Shir ne̱ à,
u̱m nep komo rii-yo ro̱ wukusse̱ à,
u̱m nep komo ho̱n u̱s-nap kap.
Komo me̱ m-she̱r ne̱ de̱e̱n,
mo̱ wo̱o̱ wugur u̱t-haag à,
amba me̱tt m-was á, to̱,
me̱ rii-yo á.
3 Ko̱ u̱m ya'as kap o̱
u̱n rii-yo u̱m ro̱tte̱ à,
remen u̱m re̱e̱gtu̱té̱ ko̱o̱b-ne̱,
U̱m ya'as wu̱r-o re a tu̱ks,
U̱rege̱ me̱tt m-was á,
ai kap to̱ ka to̱a gu me̱ á.
4 Was-mo̱ ro̱ m-hante̱ m-mo̱ u̱r-hur, u̱r-'wo̱n ne̱.
Was-m ro̱ m-hante̱ u̱r-shoob á,
gwo̱n-m ro̱ ko̱n á, ko̱ nu̱-mo̱ u̱r-hi á.
5 Jaks u̱r-hi ro̱ ko̱n á.
Was-m ro̱ u̱n cu̱ne̱ u̱n hi u̱n de u̱n mo̱ á.
Was-m ro̱ m-hante̱ o-su̱gu̱m á,
Was-m ro̱ m-hum
u̱r-ba'as u̱r-hur á.
6 Was-m ro̱ u̱n ho̱ge̱ u̱n re̱re̱m-mo̱
u̱n me̱n-u̱t jaas-to̱ á,
amba mo̱ ro̱ u̱n ho̱ge̱-m re̱re̱m-mo̱ u̱n a ru̱r o-nip.
7 Was-m ro̱ u̱n hante̱ u̱n 'mo̱ u̱r-hur
be-de u̱n ko̱ yo ke rii-yo.
Was-m ro̱ m-hante̱ m-she̱r n-me̱ u̱n ko̱yan,
Was-m ro̱ m-hante̱ o-sakto̱
U̱n hwo̱ u̱r-hur ne̱ be-de u̱n ko̱yan.
8 Was-m ro̱ m-ta á har da-o̱ ba m-ta.
Amba ko̱'o̱t u̱n ma-to̱ rwu̱u̱ne̱ be-de Shir à a tees,
Nap-o̱ u̱n rem-u̱t ho̱r-to̱ komo to̱a e̱ge̱,
u̱s-nap sea tees.
9 O-nip nap-u̱s na shiishe̱ se á,
Komo yo Shir nape̱ à, a hoks yo m-nap kap á.
10 Da-o̱ shiishe̱ wo̱o̱ne̱,
ká yar-mo̱ mo̱ ro̱
Shiishe̱ se á
mo̱ argu̱ m-ta.
11 Da-o̱ u̱m ro wà à,
U̱m ro u̱n no̱m u̱t-ma
u̱ntu̱n to̱ u̱n wà,
U̱m ro u̱n no̱m u̱s-barag u̱ntu̱n se u̱n wà,
nap-u̱s re u̱ntu̱n se u̱n wà.
Amba da-o̱ u̱m wo̱o̱ ne̱t se̱k-wu̱ à
u̱m yagu̱ru̱ rem-se ma wà.
12 Remen kaane̱, m-mo̱ka,
Rim rim a m-hyan
u̱ntu̱n u̱r-madipi,
Amba ka ho̱-de wo̱o̱ne̱
ka da-de a he m-hyan cas.
M-mo̱ka nap-u̱s re ba shishe̱-se á,
amba ká ho̱-de wo̱o̱ne̱
Man nep ko̱yan hond hond
bo̱ Shir napu̱ me̱ à.
13 To̱, rem-u̱s tet ro̱ ko̱n se ro̱:
She̱r o-nip,
O-sakto̱ ne̱,
M-was ne̱,
amba yo jiishe̱ kap à yo ro̱ m-was.