27
ጳዉሎስ ሮመ ቤዳ
1 ኑን ማርካብያን ጻልያ ባናዉ ቆፕ ኡቴዳ ዎደ፥ ጳዉሎሳነ ሀራ አማሬዳ ቃሸቴዳ አሳቱዋ አዉግስጾሳ ዎታዳራቱዋ ግያዋንቱፐ እት ዩልዮሳ ግያ ጼታቱዋ ካፖ አꬂደ እሜድኖ።
2 ኢስያ ጋጻን ደእያ ጋዳቱዋ ብያ አድራምጽዮና ማርካብያን ገሊደ ቤዶ፤ ማቅዶንያ አሳ ግድያ ተሰሎንቀ አርስጽሮኮስ ኑናና ደኤ።
3 ዎንትሳ ጋላስ ኑን ሲዶና ጋክሽን፥ ዩልዮስ ጳዉሎሳዉ ዳሮፐ አ፥ “ነ ዳባቱ ኔና ኮሽያባ ማዳና ማላ፥ ኔን ኡንቱንቱኮ ባናዉ ዳንዳያ” ያጌዳ።
4 ሄዋፐ ደንዲደ፥ ስንꬃና ኑ ቦላ ጫርክያ ድራዉ፥ ቆጲሮሳ ሃꬃን ዶደቴዳ ሳኣን ጫርከና ባጋ ቤዶ።
5 ክልቂያ ማታንነ ጵንፍልያ ማታን ደእያ አባ ፕኒደ፥ ልቅያን ደእያ ሙራ ጋኬዶ።
6 ሄዋን ጼታቱዋ ካፑ ጻልያ ብያ እስክንድርያ ማርካብያ ደሚደ፥ አን ኑና ገልሴዳ።
7 ኑን ጮራ ዎድያ ሎዳን ቢደ፥ ዳሮ መቱዋን ቀንዶሳ ካታማ ጋኬዶ፤ ሄዋና ባናዉ ኑና ጫርኩ ድግና ሳልሞናና አꬊደ፥ ሃꬃን ዶደቴዳ ቃርጼሳን ጫርኩዋፐ ተኤቲደ ቤዶ።
8 ቃይካ ዳሮ መቱዋን ጋጻና ጋጻና አꬊደ፥ ላስያ ካታማ ማታን ደእያ አባ ዶናን ማርካቢ ዎፑ ጊደ ሸምፕያ ሳ ጌተትያሳ ዬዶ።
9 ኑን ሄዋን ጮራ ዎድያ ጋምኤዳዋፐ ጉይያን፥ ጾማይ ብለት ድጌዳ ድራዉ፥ ማርካብያን ብያዌካ ህርግሽን ጳዉሎስ ኡንቱንታ ዞሪደ፥
10 “አሳዉ፥ ኑ ቡሳን ዎልቃማ ቦሻይነ ዳሮ ባሻይ ደአናዌ ታዉ ቤቴ፤ ባሻይ ይያዌ ጫና ቦላነ ማርካብያ ቦላ ጻላላን ግደና፤ ኑ ሸምፑዋ ቦላካ ያናዋ” ያጌዳ።
11 ሽን ጼታቱዋ ካፑ ጳዉሎስ ጌዳዋፐ አꬂደ፥ ማርካብያን ደእያዋንታ አዛዝያዌነ ማርካብያ ጎዳይ ግያዋ አማኔ።
12 ሄ አባ ማታ ካታማይ ባልጉዋ ሻጫናዉ ኡንቱንቶ ሚከና ካታማ፤ ሄዋ ድራዉ፥ ጮራ አሳቱ ባረንቶ ዳንዳየቶፐ፥ ፕንቀ ግያ ካታማ ጋኪደ፥ ባልጉዋ ያን ሻጫና ማላ፥ ያፐ ደንዳናዉ ዞረቴድኖ፤ ፕንቀን ደእያ ማርካቢ ሸምፕያ ሚኮ ሳአይ ዶየቴዳዌ፥ አዋይ ዉልያሳፐነ ኡሸቻ ባጋፐ ግዱዋን፥ ቃይ ዉልያሳፐነ ሀድርሳፐ ግዱዋና።
አባ ቦላን ጎቱ ደንዴዳ
13 አዋይ ከስያሳ ጼልያ ዎደ ኡሸቻ ዱገሃ ባጋ ጫርኩ ሎዳን ጫርኬዳ ዎደ፥ ባረንቱ ቆፔዳዋዳን ሀኔዳዋ ኡንቱንቶ ማላትና ደንዴድኖ፤ ማርካቢ ቤና ማላ ኦይቂያ ብራታ ፑደ ዳፊደ፥ ቃርጼሳ ማታቲደ፥ ላንቂያና አꬌድኖ።
14 ሽን ዳሪ ጋምኤናን፥ “አዉራቂስ” ግያ ዳሮ ዎልቃማ ጎቱ ሃꬃ ግዶን ደእያ ሳኣፐ ዱገ ኡንቱንቱ ቦላ ደንዴዳ።
15 ሄ ጎቱ ማርካብያ ደቺደ አናን ድግና፥ ባናዉ ኑዉ ዳንዳየተናን እጼዳ ድራዉ፥ ማርካብያ እ አፍያሳ አጊደ ቤዶ።
16 ኑን ቄዳ ግያ ሃꬃን ዶደቴዳ ጫርኩዋፐ ጌሜዳ ሳና አꬍያ ዎደ፥ ዳርስ መቶቲደ ማርካብያ ዎንግርያን ናግ አሻናዉ ዳንዳዬዶ።
17 ኡንቱንቱ ዎንግርያ ፑደ ከሴዳዋፐ ጉይያን፥ ጋድያን ማርካብያ ጻጺደ፥ ምንስ ቃቼድኖ፤ ስርጽሳ ግያ ሻፊ ኩሜዳ ሳን ባረንታ ኩንድሳነንቶነ ጊደ ህርጊደ፥ ማርካብያ አፍያ ሻራ ዎꬂደ፥ ጫርኩዋን ማርካብያ ጮ የድ አጌድኖ።
18 ጎቱ ዎልቃሚደ ኑ ቦላን ዎልቃሜዳ ድራዉ፥ ዎንትሳ ጋላስ ጫናፐ አባን ኦሉዋ ዶሜድኖ።
19 ሄዘንꬅያ ጋላስካ ማርካብያን ደእያ ሚሻ ኡንቱንቱ ባረንቱ ኩሽያን ኦሌድኖ።
20 ኑን ዳሮ ዎድያ አዋነ ጾልንትያ በኤናን፥ ዎልቃማ ኡሹ ኑ ቦላ ቡክሽን፥ ስንꬃፐ ꬋየናን አቶኮ ጊደ ቆፔዶ።
21 ኡንቱንቱ ዳሮ ዎድያ ቁማ ሜናን ጋምኤዳዋፐ ጉይያን፥ ጳዉሎስ ሄ ዎደ ኡንቱንቱ ግዶን ደንድ ኤቂደ፥ ሀዋዳን ያጌዳ፤ “አሳዉ፥ ህንተንቱ ታ ዞርያ አኬደንቶነ ቃርጼሳፐ ደንደናን አቴደንቶ፥ ሀዋ ማላ ባየꬃይነ ቆሁ ኑና ጋከና።
22 ሽን ሀእካ ታን ህንተንታ ያዮፕተ ጋደ ዞራይ፤ አያዉ ጎፐ፥ ሀ ማርካቢ ባያናፐ አትን፥ ህንተንቱፐ እት ኡራ ሸምፑካ ባየና።
23 አያዉ ጎፐ፥ ጾሳ ኪታንቻይ፥ ታና ሞዴዳ ታን ጎይንያ ጾሳዌ፥ ዝኖ ቃማ ታ ማታን ኤቂደ፥
24 ‘ጳዉሎሳ፥ ያዮፓ፤ ኔን ሮመ ጋድያ ካትያ ቄሳራ ስንꬃን ኤቃናዉ በሴ፤ በአ፥ ጾሳይ ባረ ኬካተꬃን ኔናና ብያ አሳ ኡባ ሸምፑዋ አሻና’ ያጌዳ።
25 ሄዋ ድራዉ አሳዉ፥ ያዮፕተ። አያዉ ጎፐ፥ ሄ ኪታንቻይ ታዉ ኦዴዳዋዳን ሀናናዋ ታን ጾሳ አማናይ፤
26 ሽን ጫርኩ ኑና እት ሃꬃን ዶደቴዳ ሳኣን አባ ዶናን ዶምእሳና” ያጌዳ።
27 ታማነ ኦይደንꬆ ጋላስ ሜድትራንያ አባን ኑና ጫርኩ ያነ ሃነ ሱግሽን፥ ማርካብያን ኦꬅያዋንቶ ቃማ ብላሂ ቢታኮ ማቴዳዋ ማላቴዳ።
28 ኡንቱንቱ ልክያ ጋድያ ጼራን ዴጽያባ ቃቺደ፥ ሃꬃን የግና፥ ሃꬃይ ኦይታሙ ምትርያ ጪማቴዳዋ ኤሬድኖ። ጉꬃ ጋምኢደ፥ ላኤንꬁዋ የጊደ፥ ሀታሙ ምትርያ ጪማቴዳዋ ኤሬድኖ።
29 ኡንቱንቱ ሹቻትያሳን ኩንደና ማላ ያዪደ፥ ማርካቢ ቤና ማላ ኦይቂያ ኦይዱ ብራታ ማርካብያፐ ጉየና አባን የጊደ፥ ሳአይ ዎንታና ማላ፥ ባረንቱ ጾሳቱዋ ዎሲኖ።
30 ማርካብያን ኦꬅያዋንቱ ማርካብያፐ ክቻናዉ ኮዪደ፥ ማርካቢ ቤና ማላ ኦይቂያ አማሬዳ ብራታቱዋ ማርካብያፐ ስንꬃ ባጋና አባን የግያዋ ማላቲደ፥ ዎንግርያ አባን ዎꬄዳ ዎደ፥
31 ጳዉሎስ ጼታቱዋ ካፑዋነ ዎታዳራቱዋ፥ “ሀዋንቱ ማርካብያ ግዶን ደአና ꬋዮፐ፥ ህንተንቱ አታናዉ ዳንዳይክታ” ያጌዳ።
32 ሄዋፐ ጉይያን፥ ዎታዳራቱ ዎንግሪ ቃሸቴዳ ጋድያ ቃንጺደ፥ የድ አጌድኖ።
33 ሳአይ ዎንታና ሀንሽን፥ ጳዉሎስ ኡባይ ቁማ ማና ማላ፥ ሀዋዳን ያጊደ ዎሴዳ፤ “ህንተንቱ ሀቼና ታማነ ኦይዱ ጋላሳ ናጌድታ፤ ቃይ ሄ ኡባንካ ቁማ ምበይክታ።
34 ሄዋ ድራዉ፥ ጉꬃ ቁማ ህንተንቱ ማና ማላ፥ ታን ህንተንታ ዎሳይ፤ አያዉ ጎፐ፥ ህንተንቱ ፓጻ ደአናዉ ጉꬃ ቁማ ማና ኮሼ፤ ሀራይ አቶ ህንተንቱ ሁጲያ ብናናፐ እቱካ ባየና” ያጌዳ።
35 ጳዉሎስ ሀዋ ጊደ፥ ኡክꬃ አኪደ፥ ኡባ ስንꬃን ጾሳ ጋላቴዳ፤ መንꬅ ሙሳ ዶሜዳ።
36 ሄዋፐ ጉይያን ኡባይ ሎይꬅ፥ ባረንቶ ቃይ ቁማ ሜድኖ።
37 ኑን ማርካብያን ደእያዋንቱ ላኡ ጼታነ ላፑን ታማነ ኡሱፑና።
38 ኡንቱንቱ ሚደ ካሌዳ ዎደ፥ ጫና ዛርጋ አባን ኦሊደ ማርካብያ ዴጹዋ ካዉሽሴድኖ።
ማርካብያ መኡሳ
39 ሳአይ ዎንቴዳ ዎደ፥ ማርካብያን ኦꬅያዋንቱ ጋድያ ኤርበይክኖ፤ ሽን ሃꬃይ ጎጊደ አባን ገሌዳሳ ምይያን ደእያ ሻፍያ አኬካን ጼሌድኖ። ባረንቶ ዳንዳየትንቶ፥ ማርካብያ ሄ ሻፍያኮ ላጋናዉ ባረንቱ ቆፋ ቃቼድኖ።
40 ያቲደ ማርካቢ ቤና ማላ ኦይቂያ ብራታቱዋ ብሊደ፥ አባ ግዶ የጌድኖ፤ ሄ ዎደ፥ ማርካብያ ኮዬዳሳ ዛሪደ ላግያ ምꬃ ቃቼዳ ጋድያ ብሌድኖ፤ ሄዋፐ ጉይያን፥ ጫርኩ ማርካብያ ስንꬃዉ ሱጋና ማላ፥ ማርካብያ አፍያ ሻራ ስንꬃ ባጋና ꬎቁ ኦꬂደ፥ ቡሳ ዶሜድኖ።
41 ሽን ማርካቢ ጪሙ ደኢያሳፐ አꬊደ ሃꬃን ዶደቴዳ ሳኣ ማታን ደእያ ደꬃሳን ዶምኤት ኤቄዳ፤ ማርካብያዉ ጉየ ባጋይ ቤታ ሱገꬃን መኤረትሽን፥ ስንꬃ ባጋይ ዱገ ꬍሸቲደ፥ ቃጸናን እጽ አጌዳ።
42 ዎታዳራቱ ቃሸቴዳ አሳፐ እቱነ ሃꬃ ዋꬊደ ከስ አክቤና ማላ፥ ኡንቱንታ ዎꬋናዉ ዞረቴድኖ።
43 ሽን ጼታቱዋ ካፑ ጳዉሎሳ አሻናዉ ኮዪደ፥ ዎታዳራቱዋ ማቁዋ እጼዳ፤ ሃꬃ ዋꬋ ኤርያ ኡባይ ማርካብያፐ ሃꬃን ጉፕ ጉፒደ ካሰቲደ ጋጻ ከሳና ማላ አዛዜዳ።
44 አቴዳዋንቱፐ አማሬዳዋንቱ ሳንቃን፥ አማሬዳዋንቱ ቃይ ማርካብያ መኡዋን ከሳና ማላ አዛዜዳ፤ ሄዋዳን ኡባቱካ ጋጻ ሳሮተꬃን ከሴድኖ።