10
ኤቃዉ ጎይናናዉ በሰና
1 ሄዋ ቦላን ታናዳን አማንያዋንቶ፥ ታን ህንተ ሀዋ ኤራና ማላ ኮያይ። ኑ አዎቱ ኡባይ ሻርያፐ ጋርሳና ደኤድኖ፤ ኡባይካ አባ ግዶና ፕኔድኖ።
2 ኡንቱንቱ ኡባይ ሙሴና እትፐ ግዳናዉ፥ ሻርያንነ አባን ጻማቀቴድኖ።
3 ኡንቱንቱ ኡባይ ሄ እት አያና ቁማ ሜድኖ።
4 ቃይ ኡባይካ ሄ እት አያና ኡሻ ኡሼድኖ። አያዉ ጎፐ፥ ኡንቱንቱ ባረንታ ካለꬅያ አያና ዛላፐ ፑልቶዋ ኡሼድኖ፤ ሄ ዛላይካ ክርስቶሳ።
5 ሽን ጾሳይ ኡንቱንቱፐ ዳርያ ባጋቱዋን ናሸትቤና ድራዉ፥ ኡንቱንቱ አሃይ አሳይ ባይና ሳን ላለቴዳ።
6 ኡንቱንቱ ኢታባ አሞቴዳዋዳን፥ ኑ ዎዛናይ ቃይ ኢታባ አሙዋፐ ናገታናዳን፥ ሄዌ ኡባይ ኑዉ ትምርተ ግዴዳ።
7 ጾሳ ማጻፋይ፥ “አሳይ ማናዉነ ኡሻናዉ ኡቴድኖ፤ ቃይ ዱሮ ደንድ ኤቄድኖ” ያግያዋዳን፥ ኡንቱንቱፐ እቱ እቱ ኤቃዉ ጎይኔዳዋዳን፥ ህንተ ጎይኖፕተ።
8 ኡንቱንቱፐ እቱ እቱ ዎሹሜዳዋዳን፥ ኑን ዎሹማናዉ በሰና። ሄዋ ጋሱዋን ኡንቱንቱፐ እት ጋላስ ላታማነ ሄዙ ሻአይ ሀይቄዳ።
9 ኡንቱንቱፐ እቱ እቱ ጎዳ ፓጪደ፥ ሾሻን ዱከት ሀይቄዳዋዳን፥ ኑን ጎዳ ፓጫናዉ በሰና።
10 ኡንቱንቱፐ እቱ እቱ ዙዙምና፥ ዎꬍያ ኪታንቻን ኡንቱንታ ꬋይሴዳዋዳን ዙዙሞፕተ።
11 ሀዌ ኡባይ ሀራቶ ትምርተ ግዳናዳን ኡንቱንቱ ቦላ ጋኬዳ። ቃይ ኑና ዎድያ ዉርሰꬃይ ጋካና ማቴዳዋንታ ሴራናዉ ጻፈቴዳ።
12 ሄዋ ድራዉ፥ ምና ኤቃድ ጊደ ቆፕያ ኡራይ ኦንነ ኩንደናዳን፥ ባረና ናጎ።
13 ህንተንታ ጋክያ ፓጪ፥ አሳ ኡባ ጋክያ ፓጭያ ማላፐ አትን፥ አይነ ዱማተና። ህንተንቱ ዎልቃይ ዳንዳይያዋፐ አꬍያ ፓጭያን ህንተ ፓጨታናዉ ኮየና ጾሳይ አማነቴዳዋ። ሽን ህንተንታ ፓጪ ጋክያ ዎደ፥ ሄ ፓጭያ እ ህንተንታ ዳንዳይሳና። ቃይ ሄ ፓጭያፐ ህንተንቱ ከስያ ኦግያካ እ እማና።
14 ሄዋ ድራዉ፥ ታ ዶስያዋንቶ፥ ኤቃዉ ጎይኖፕተ።
15 ህንተንቱ ዎዛናማ አሳ ግዴዳ ድራዉ፥ ታን ህንተንቶ ኦዳይ። ታን ግያዋ ህንተ ፕርድተ።
16 ኑን ጾሳ ጋላቲደ ሻክያ አንጁዋ ጹአይ ክርስቶሳ ሱꬃና እትፐተꬃይ ደእያዋ ግደኔ? ቃይ ኑን መንꬅያ ኡክꬃይ ክርስቶሳ አሹዋና እትፐተꬃይ ደእያዋ ግደኔ?
17 እት ኡክꬃይ ደእያ ድራዉ፥ ኑን ጮራ ግዶፐካ፥ እት አሳተꬃ። አያዉ ጎፐ፥ ኑን ኡባይካ ሄ እት ኡክꬃ ሻከቴቶ።
18 እስራኤልያ አሳ ጼልተ። ያርሹዋ ምያዋንቱ ያርሽያሳና እትፐተꬃይ ደእያዋንታ ግድክኖ?
19 ስም ታን ዋጋይታ? ኤቃዉ ያርሸቴዳ ቁማይ ማዲ ዎይ ኤቃይ ማዲ?
20 ማደና፤ ሽን ታን ግያዌ ጾሳ አማነና አሳቱ ኢታ አያናቶ ያርሽያዋፐ አትን፥ ጾሳዉ ያርሽክኖ። ኢታ አያናቱዋና ህንተ እትፐ ዙፐታና ማላ፥ ታን ኮይከ።
21 ጎዳ ጹኣፐ ኡሺደ ቃይ ኢታ አያናቱዋ ጹኣፐ ኡሻናዉ ህንተ ዳንዳይክታ። ጎዳ ጋይታፐ ህንተ ግሸቲደ ቃይ ኢታ አያናቱዋ ጋይታፐ ማናዉ ዳንዳይክታ።
22 ሄዋ ኦꬂደ ኑን ጎዳና ጺኖታናዉ ኮሺ? ኑን አፐ ምኔቶ?
23 ህንተፐ እቱ እቱ፥ “ኡባባ ኦꬃናዉ ታና ድግያባይ ባዋ”፤ ሽን ኡባባይ ማደና። “ኡባባ ኦꬃናዉ ድግያባይ ባዋ፤ ሽን ኡባባይ ጌሸና” ያጊኖ።
24 ኦንነ ሀራ አሳ ማድያባ ቆፖፐ አትን፥ ሀራይ አቶ እቱነ ባረና ማድያባ ቆፖፖ።
25 ገያን አጻረ ታራን ዛልኤትያ አሹዋ ህንተ ዎዛና ቆፋን፥ አይነ ስናን ሚተ።
26 አያዉ ጎፐ፥ አላሚነ አን ደእያባይ ኡባይ ጎዳባ።
27 እት አማነና አሳይ ህንተንታ እማꬃ ኦꬅ ሾባናዉ ጼስና ባናዉ ኮዮፐ፥ ህንተ ዎዛና ቆፋን፥ አይነ ስናን ህንተ ስንꬃ እ አꬅያባ ኡባ ሚተ።
28 ሽን እት ኡራይ ህንተንቶ፥ “ሀዌ ኤቃዉ ያርሼዳዋ” ጎፐ፥ ሄ ህንተንቶ ኦዴዳ ብታንያ ድራዉነ ቃይ ህንተ ዎዛና ቆፋ ድራዉ፥ ሄ ቁማ ሞፕተ።
29 ታን ግያዌ ነ ዎዛና ቆፋ ድራሳ ግደና፤ ሽን የኮ ብታንያ ዎዛና ቆፋ ድራሳ።
ታን ታ ሀናናዉ ዳንዳይያ ታ ሀኖታ ሀራ አሳ ዎዛናይ አያዉ ፕርዲ?
30 ታን ጾሳ ጋላታደ ቁማ ሞፐ፥ ጾሳ ጋላታደ ሜዳ ቁማዉ አያዉ ቦረታይታ?
31 ስም ህንተ አያነ ሞፐ፥ ዎይ አያነ ኡሾፐ፥ ዎይ ህንተ አያነ ኦꬆፐ፥ ኡባባ ጾሳ ቦንቾ ኦꬅተ።
32 ህንተንቱ አይሁዳ አሳቶ ዎይ ግሪከ አሳቶ ዎይ ጾሳ አማንያዋንቶ ꬉቦ ግዶፕተ።
33 ታን ቃይ ጮራቱ አታና ማላ፥ ኡንቱንቱ ኡባ ማዳናዳንፐ አትን፥ ታ ሁጰዉ ማዱዋ ኮየናን፥ አሳ ኡባ ኡባባን ናሸችያዋዳን፥ ህንተንቱካ ሄዋዳ ኦꬅተ።