4
ናቁዋ፥ ዳቡራነ ላግያ ꬋዩሳ
1 ታን ቃይካ፥ ሳሉዋ ጉፋንꬃን አሳይ አሳ አያ ኬሻ ናቂንቶነ ጼላድ። ናቀቴዳዋንቱ ባረንታ ምንꬅያዋ ꬋዪደ ዬኪኖ። ናቂያዋንቶ ዎልቃማ ማታይ ደእያዋፐ አትና፥ ናቀትያዋንታ ማድያዌ ኦንነ ባዋ።
2 ሄዋ ድራዉ፥ ታን፥ “ሀእ ፓጻ ደእያዋንቱፐ ካሰ ሀይቂ ክቼዳዋንቱ ኬካ” ያጋድ።
3 ግዶ ሽን፥ ሀ ላኡዋፐካ አꬊደ ቃይ፥ ሙለ የለትቤናዋንቱ ካጫይ ሎአ፤ አያዉ ጎፐ፥ ኡንቱንቱ ሳሉዋ ጉፋንꬃን ኦሰትያ ናቁዋ ሙልያ በእበይክኖ።
4 አሳይ ባረ አሞቴዳባ ደማናዉ ሎይꬅ ዳቡሪደ ኦꬄ፤ ሽን ሄ ዳቡራይ ባረ ላግያ ቦላን ቃናትያ ቆፋፐ ደንዴዳዋና ግድያዋ ታን አኬካድ። ሄዌካ ቃይ መላ፤ ጫርኩዋ ኦይቃናዉ የደርስያባ ማላ።
5 ባረ ኩሽያ ጻጺደ፥ ኡት አግያ አዛላይ፥ ኮሻን ሀይቄ።
6 ዳቡራንነ ጫርኩዋ ኦይቃናዉ የደርስያባ ማላ ጃማን ዳቡሪደ ደምያ ላኡ ኩሽያፐ፥ ዎፓን ደምያ እት ኩሽያ ዳሬ።
7 ቃይ ታን፥ ሳሉዋ ጉፋንꬃን መላ ግደዳዋ እት ሀራባካ በኣድ።
8 ሄዌካ እት ባረካ ዴእያ ብታንያባ፤ አዉ አቱማ ናአይ ዎይ እሽ ባዋ። ሽን እ ዳቡርያ ዳቡራዉ ዛዋይ ባዋ፤ ቃይ ባረዉ ደእያዋን አለና። እ ባረካ ባረና ኦቺደ፥ “እ ታ ሀዋ ኦሲ ዳቡራይታ? ታና ታ ሁጲያ አያዉ ናሸቻ ድጋይታ?” ያጊደ ኦቼዳ። ሄዌካ ቃይ ሀዳባነ ቱጋ ደኡዋ።
9 እቱዋ ግድያዋፐ ላአ ግድያዌ ሎአ፤ አያዉ ጎፐ፥ ኡንቱንቱ ኦሱ እቱዋዋፐ አꬊደ፥ ሎኦ አይፍያ እማናዉ ዳንዳዬ።
10 ቃይ፥ ላኡዋፐ እቱ ኩንዶፐ እቱ ደንꬄ፤ ሽን ባረካ ደእያ ኡራይ ኩንዶፐነ አ ደንꬅያዌ ባይና ድራዉ፥ አዉ አየ አና!
11 ሜጎ ዎድያን ላኡ እትፐ ግሶፐ ሆኤ፤ ሽን ባረካ ግስያ ኡራ ሀቃፐ ሆአናዉ ዳንዳዪ?
12 እት አሳይ ባረካ ተአናዉ ዳንዳየና መቱዋ ላኡ አሳቱ እትፐ ኤቀቲደ፥ ተአናዉ ዳንዳዪኖ። ሄዙ ኩꬃን ዶቀቴዳ ዎዶሩካ ኤለ ዱጸና።
13 ሎኦ ዞርያ አከና ጭማ ካትያፐ ህዬሳ ግዶፐነ፥ አꬌዳ ኤራንቻ ያላጋይ ኬካ።
14 አያዉ ጎፐ፥ እ ሄ ህዬሳ ግድያ ሳኣፐ ደንዲደ፥ ዎይ ቃሾ ጎልያፐ ከሲደ፥ ባረ ቢታን ካተ ግድያ ሳኣ ጋካናዉ ዳንዳዬ።
15 ሳሉዋ ጉፋንꬃን ደእያነ ሀመትያ አሳ ኡባይ ካትያ ካዉተꬃ አራታ ላትያ ያላጋ ካልያዋ በኣድ።
16 እት ካቲ ሞድያ አሳይ ፓይዱ ባይና ጮራ ግዳናዉ ዳንዳዬ። ሽን ካዉታፐ እ ክችያ ዎደ፥ እ ኦꬄዳባዉ ኦንነ አ ጋላተና። ሄዋ ድራዉ፥ ሀ ኡባይካ መላ፤ ጫርኩዋ ኦይቃናዉ የደርስያባ ማላ።