6
የሌዳዋንቱባነ የለቴዳ ናናቱዋባ
1 ናቶ፥ ህንተና የሌዳዋንቶ ጎዳ ቦንችያዋዳን አዛዘትተ፤ አያዉ ጎፐ፥ ሀዌ ኦꬃናዉ በስያዋ።
2-3 “ነዉ ኡባባይ ሎአናዳንነ ሳኣን ነ ላይꬃይ አዱቃናዳን፥ ነ አዉዋነ ነ ዳዮ ቦንቻ” ግያ አዛዙ ጾሳይ እማና ጌዳ ህዶታና ደእያ ኮይሮ አዛዙዋ።
4 አዋቶ፥ ህንተ ህንተ ናናቱዋ ጎዳ ሴራንነ ዞርያን ድችተፐ አትን፥ ኡንቱንታ ሀንቀꬆፕተ።
ጎዳቱዋባነ አይላቱዋባ
5 አይላቶ፥ ክርስቶሳዉ ኦꬅያዋዳን፥ ህንተ ጎዳቶ ያሻተꬃንነ ኮኮርሳን ሱረ ዎዛናፐ አዛዘትተ።
6 ጾሳይ ጌዳዋ ኦꬅያዋንቱዳን፥ ክርስቶሳ አይላቱዋዳን፥ ዎዛናፐ ኦꬅተፐ አትን፥ አሳ ናሸቻናዉ ኦꬅያዋዳን፥ አሳይ በኦ ጊደ ኦꬆፕተ።
7 አሳዉ ግደናን ጎዳዉ ኦꬅያዋዳን፥ ꬍበናን ዎዛናፐ ኦꬅተ።
8 አይለ ግድና ዎይ ዎማኑዋ ግድና፥ እ ኦꬅያ ሎኦ ኦሶ ኡባዉ ጎዳይ ሁጲያን ሁጲያን ዎይታናዋ ኤሪታ።
9 ጎዳቶ፥ ህንተ አይለቱዋ ናስያዋ አጊደ፥ ኡንቱንቶ ሄዋዳን ኦꬅተ፤ ህንተናነ ኡንቱንታ ጋꬅ ሞድያ ጎዳይ፥ ኦናነ ማድ ፕርደናዌ፥ ሳሉዋን ደእያዋ ኤሪታ።
ጾሳ ኦላ ሚሻቱዋባ
10 ዉርሰꬃን፥ ጎዳንነ አ ዎልቃማ ዎልቃን ኡባ ዎደ ምንተ።
11 ጻላህያ ኢታ ጭሙዋ ተአናዉ ህንተ ዳንዳያና ማላ፥ ጾሳይ ህንተንቶ እምያ ኦላ ማዩዋ ኡባ ማይተ።
12 አያዉ ጎፐ፥ ኑን ቦላ ሳሉዋ ደእያ ኢታ አያና ዎልቃቱዋና፥ ሞድያዋንቱና፥ ጎዳተꬃይ ደእያዋንቱናነ ሀ ꬉማ ቢታ ሞድያዋንቱና ኦለትያዋፐ አትን፥ አሳና ኦለቶኮ።
13 ሄዋ ድራዉ፥ ኢታ ጋላሳን ተአናዉነ ቃይ ዉርሰꬃይ ጋካናዉ ዋቶዋፐ ጉይያን፥ ምን ኤቃናዉ ህንተ ዳንዳያና ማላ፥ ጾሳ ኦላ ሚሻ ኡባ ኦይቂተ።
14-15 ሄዋ ድራዉ፥ ጼሳን ሳቂያ ዳንጭያዋዳን ቱማተꬃ ዳንጪደ፥ ትራን ዎꬅያ ኦላ ሚሻዳን ጽሎተꬃ ማዪደ፥ ህንተ ገድያን ጫማ ዎꬅያዋዳን ሳሮተꬃ ምሽራቹዋ ቃላ ኦዳናዉ ጊጊደ፥ ምን ኤቂተ።
16 ሄ ኡባፐ አꬂደ፥ ጻላሂ የድያ ዎንዳፍያ ታማ ኡባ ቶይሳናዉ፥ አማኑዋ ኡባ ዎደ ጎንዳልያዳን ኦይቂተ።
17 አቶተꬃ ሁጲያን ዎꬅያ ብራታ ቆብያዳን ዎꬅተ፤ ቃይ ጌሻ አያና ማሻ ግዴዳ ጾሳ ቃላ ኦይቂተ።
18 ጾሳ ዎሲደነ አ ማዱዋ ኦቺደ፥ ኡባ ዎደ ጌሻ አያናን ጾሳ ዎስተ። ሄዋ ድራዉ፥ ምንተ፤ ሳለቶፕተ፤ ጌሻቱዋ ኡባዉ ጾሳ ኡባ ዎደ ዎስተ።
19 ቃይ ታን ያየናን ዎንጋላ ጹራ ኦዳናዉ፥ ጾሳይ ታ ዶና ዶዪደ፥ ሃሳይያዋ እማናዳን፥ ታዉካ ጾሳ ዎስተ።
20 ታን ሀእ ቃሹዋን ደኦፐካ፥ ሀ ዎንጋላ ድራዉ ታን ኪተቴዳዋ፤ ታን አባ ታዉ በስያዋዳን ያየናን ኦዳና ማላ፥ ታዉ ጾሳ ዎስተ።
ዉርሰꬃ ሳሮታ
21 ሽን ታን ዋና ደእንቶነ አያ ኦꬃይታንቶ ህንተካ ኤራናዳን፥ ኑ ሲቆ እሻይ፥ ጎዳ ኦሱዋን አማነቴዳ ቆማይ ትክቆስ፥ ታዋ ኡባ ህንተንቶ ኦዳናዋ።
22 ኑን ኡባይ ዋን ደእንቶ ህንተንቶ ኦዲደ፥ ህንተና ምንሳና ማላ፥ ታን አ ህንተኮ ኪታድ።
23 ጾሳ አዉዋፐነ ጎዳ የሱስ ክርስቶሳፐ ሳሮተꬃይነ ሲቆተꬃይ አማኑዋና እትፐ እሻቱዋ ኡባዉ ግዶ፤
24 ዶቼና ሲቁዋን ኑ ጎዳ የሱስ ክርስቶሳ ሲቅያ ኡባቱዋና ጾሳ አꬎ ኬካተꬃይ ግዶ። አመንእ።