4
ስም ጾሳይ ኑና ባረ ሸምፕያ ሳ፥ “ገልሳና” ጌዳዌ ብራ ግዶፐ፥ ህንተፐ ኦንነ ሄ ሸምፕያ ሳ ገለናን አተና ማላ ናገቶ። አያዉ ጎፐ፥ ኡንቱንቱ ዎንጋላ ምሽራቹዋ ስሴዳዋዳን፥ ኑንካ ስሴዶ፤ ኡንቱንቱ ስሴድኖ፥ ሽን አማኒደ አክቤና ድራዉ፥ አይነ ኡንቱንታ ጎእቤና። ግዶፐካ፥ ጾሳ ኪታይ ሳአይ መቶደፐ ዶምና ፖለቴዳዋ ግዶፐነ፥ ጾሳይ፥
“ታን ሀንቀታ ጫቃደ፥
‘ኡንቱንቱ ታን ሸምፕያ ሳ
ኡባካ ገልክኖ’ ያጋድ”
ጌዳዋዳን፥ ኑን አማኔዳዋንቱ እ ሸምፕያ ሳ ገላና። + አያዉ ጎፐ፥ ላፑንꬃ ጋላሳባ እትሳን ጾሳ ማጻፋይ፥ “ጾሳይ ላፑንꬃ ጋላሳን ባረ ኦሱዋ ኡባፐ ሸምፔዳ” ያጌዳ። + ቃይ ሄ ሳኣን፥ “ኡንቱንቱ ታን ሸምፕያ ሳ ኡባካ ገልክኖ” ያጌዳ። + ዎንጋላ ምሽራቹዋ ኮይሮ ስሴዳዋንቱ አዛዘትቤና ድራዉ፥ ሸምፑዋ ሳኣ ገልበይክኖ፤ እት እት አሳቱ ያ ገላናዋንቱ ደኢኖ። ጾሳይ ዳሮ ዎድያፐ ጉይያን፥ ዳዊታ ባጋና ላኤንꬁዋ እት ጋላሳ፥ “ሀቼ” ግያ ቃላን ኬሪደ፥
“ጾሳ ቃላ ህንተንቱ ሀቼ ስስያዋ ግዶፐ፥
ዞርያ አከናን እጾፕተ”
ያጌዳ።+ ጾሳይ ሸምፕያ ሳ አሳ አፊደ ኢያሱ ሸምፕሴዳዋ ግድንቶ፥ ጾሳይ ሀራ ጋላሳዋ ጉየ ኬረና። + ሄዋ ድራዉ፥ ጾሳ አሳዉ ሳምባታ ሸምፑ ናገት ኡቴዳ። 10 አያዉ ጎፐ፥ ጾሳይ ሸምፕያ ሳ ገልያ ኦንነ፥ ጾሳይ ባረ ኦሱዋፐ ሸምፔዳዋዳን፥ እካ ባረ ኦሱዋፐ ሸምፓና። + 11 ስም እስራኤልያ አሳይ አዛዘተናን እጺደ፥ ጾሳና እትፐ ሸምፕያ ሳ ገለናን አቴዳዋዳን፥ ኑፐ ኦንነ ሄዋ ማላ ኤኖ ጌናን እጹዋን ያ ገለናን አተና ማላ ምኖይተ።
12 አያዉ ጎፐ፥ ጾሳ ቃላይ መꬍናዉ ደእያዋኔ ኦꬅያዋ፤ ላኡ ባጋና ሌፈቴዳ ማሻፐካ አꬊደ ኩሴ። ሄ ቃላይ ሸምፑነ አያናይ፥ ኩሪነ ኮልዚ እትፐ ጋከትያሳ ሻካና ጋካናዉ ጫዴ። ቃይ አሳ ዎዛናን ደእያ ኮሻነ ቆፋ እ ሻኬ። 13 ኑን ኦꬅያዋ ዎችያ ጾሳ ስንꬃን ኡባባይካ ቤትያዋፐነ ቆንጭያን ደእያዋፐ አትን፥ አ አይፍያን ጌምያ መታይ አያይነ ባዋ።
የሱስ ቄሳቱዋ ኡባቶ ዎልቃማ ካፑዋ
14 ስም ሳሉዋ ቤዳ፥ ቄሳቱዋ ኡባቱዋ ዎልቃማ ካፑ፥ ጾሳ ናአይ የሱስ፥ ኑዉ ደእያ ድራዉ፥ ኑ አማኑዋ ሎይꬅ ናጌቶ። 15 አያዉ ጎፐ፥ ኑ ቄሳቱዋ ኡባቱዋ ካፑ ኑን ዳቡርያ ዎደ ኑዉ ቃረታናዉ ዳንዳዬ፤ ናጋራ እ ኦꬅቤናዋፐ አትን፥ ኑናዳን ኡባባንካ ፓጨቴዳ። 16 ስም ኑና ኮሽያ ዎደ ማድያ ማሮተꬃ አካናዉነ አꬎ ኬካተꬃ ደማናዉ፥ አꬎ ኬካተꬃይ ደእያ ሳኣ ጾሳ አራታኮ፥ ያየናን ሺቆይተ።
+ 4:3 ማዝ. 95:11 + 4:4 ዶመꬃ 2:2 + 4:5 ማዝ. 95:11 + 4:7 ማዝ. 95:7-8 + 4:8 ዛረ. 31:7፤ ኢያሳ 22:4 + 4:10 ዶመꬃ 2:2