6
1-2 ሄዋ ድራዉ፥ ክርስቶሳ ትምርትያ ብሮ ዶምያዋ አጊደ፥ ዎዛናማ አሳ ትምርተዉ ስንꬃዉ ቦይተ፤ ኮይሮ ኑን ታማራናዉ ኮሽያ ትምርትያ ዎꬍ ኤቂደ ታማራናዉ ኑዉ በሰና፤ ሄ ትምርቲ አዬ ጎፐ፥ ማደና ኦሱዋፐ ስምያዋ፥ ጾሳ አማንያዋ፥ ጽንቃታቱዋባ፥ ኩሽያ ዎꬁዋባ፥ ሀይቁዋፐ ደንዱዋባነ መꬍና ፕርዳባ።
3 ጾሳይ ኦꬅተ ጎፐ፥ ሄዋ ኑን ኦꬃና።
4-5 አያዉ ጎፐ፥ እቶደካ ፖኡ ፖኤዳዋንታነ ሳሉዋ እሙዋ ባር በኤዳዋንታ፥ ቃይ ጌሻ አያናካ ሻክ አኬዳዋንታነ ጾሳ ቃላይ ሎአ ግዴዳዋ ስስ ኤሬዳዋንታ፥ ስንꬃፐ ያና ሳኣ ዎልቃካ ቦች ጼሌዳዋንታ፥
6 ሄዋፐ ጉየ ስሚደ ካዴዳዋንታ ናጋራፐ ላኤንꬁዋ ዛራናዌ ዳንዳየተና። አያዉ ጎፐ፥ ሄዋንቱ ጾሳ ናኣ ማስቃልያ ቦላ ምስማርያን ꬍሺደ ካቂያዋንታነ አሳ ስንꬃን ካዉሽያዋንቱ ማላ።
7 ኡባ ዎደ ቡክያ እራ ኡሽና፥ ጎሼዳ ኡራ ጎእያ ካꬃ ሞክያ ቢታ ጾሳይ አንጄ።
8 ሽን ቡሉዋነ ቡዙዋ ሞኮፐ፥ አይነ ጎኤና፤ ሸቃዉ ሺቅ ኡቴዳ። ቃይ ዉርሰꬃን ጉደታና።
9 ሽን ኑ ሲቃቶ፥ ኑን ሀዋዳን ሃሳይያዋ ግዶፐነ፥ ህንተንቱ አቶተꬃዉ ግድያ ሎኦባይ ህንተንቶ ደእያዋ ኤሬቶ።
10 አያዉ ጎፐ፥ ህንተንቱ ኦꬄዳ ኦሱዋነ ቃይ አማንያዋንታ ማዴዳዋንነ ሀእካ ማድያዋን ጾሳ ሲቄዳ ሲቁዋ ጾሳይ ዶጋናዉ ማካላ ግደና።
11 ህንተንቱ ሁጲያን ሁጲያን ደማና ጊደ፥ ህዶታን ናግ ኡቴዳ ኩመንꬃ ቱማተꬃ ዉርሰꬃይ ጋካናዉ፥ ካሰዋዳን ምንሲደ ኦꬃና ማላ አሞቴቶ።
12 ጾሳይ እማና ጌዳዋ አማኑዋንነ ገንጫን ላትያዋንቱ ማላ ህንተንቱ ግዳናዋ ኑን ኮይያዋፐ አትን፥ አዛላ ግዳናዋ ኮዮኮ።
ጾሳይ እሜዳ ህዶታይ ስꬍሰናዋ
13 ጾሳይ አብራሃሞ እማና ጊደ ጫቄዳ ዎደ፥ ባረፐ አꬍያ ዎልቃማይ ባይና ድራዉ፥ ባረ ሁጲያን ጫቄዳ።
14 ጾሳይ አ፥
“ታን ኔና አንጃና፤
ነ ዘረꬃካ ጮርሳና”
ያጊደ ጫቄዳ።
15 ሄዋዳንካ፥ አብራሃሞ ገንጭ ናጊደ፥ ጾሳይ እማና ጌዳዋ አኬዳ።
16 አያዉ ጎፐ፥ አሳይ ባረፐ ꬎቂያ ኡራን ጫቄ፤ ቃይ ሄ ጫቁ ፓሉምያ ኡባካ ተኤ።
17 ሄዋ ድራዉ፥ ጾሳይ ባረ እማና ጌዳዋ ላታናዋንቶ ባረ ቆፋ ኡባካ ላመናዋ ጌሽ ኦዳናዉ ሎይꬅ ኮዪደ፥ ሄዌ ቱማ ግዴዳዎ ጫቄዳ።
18 ጾሳይ ዎርዶታናዉ ዳንዳየና ሀ ላኡ ላመተና የዋቱዋን፥ እ እማና ጌዳ ኑ ስንꬃን ደእያዋ ኦይቃናዉ አኮ ባቃቴዳ ኑዉ ዎልቃማ መንꬁ ደኤ።
19 ሀ ኑን ደማና ጊደ ናሸቻን ናግ ኡቴዳዌ፥ ኑ ሸምፖ ማርካብያ ኦይቂያ ቃጸና ብራታ ማላ፤ ሄ ኑን ደማና ጊደ፥ ናሸቻን ናግ ኡቴዳዌ ኤረቴዳ ምኖ ግዲደ፥ ጋርዱዋ ግዶ ጌሻ ሳ ገሌ።
20 ቃይ የሱስ ማልክ-ጸደቃ ሱንꬃተꬃዳን፥ መꬍናዉ ቄሳቱዋ ኡባቱዋ ካፑዋ ግዲደ፥ ኑ ግሻታዉ ኑፐ ካሰቲደ፥ ሄ ሳኣ ገሌዳ።