20
ግብጼ ቦላነ ቶጵያ ቦላ ኦደቴዳ ትምቢትያ
1 አሶረ ጋድያ ካቲ ሳርጎን ኪቴዳ ኦላ ጋዳዋይ ዪደ፥ አሽዶዳ ግያ ፕልስጼማ ካታማ ኦሊደ ኦይቄዳ ላይꬅ፥
2 ሄ ዎደ መꬍና ጎዳይ አሞጻ ናኣ ኢስያሳ ሀዋዳን ያጌዳ፤ “ባ፤ ነ ቦላፐ ማቃ ቃራ፤ ነ ገድያፐካ ነ ጫማ ከሳ” ያጌዳ፤ እስያስ ጾሳይ ጌዳዋዳን ሀኒደ፥ ካሎ ጺራነ መላ ገድያን ሀመቴዳ።
3 መꬍና ጎዳይ ሀዋዳን ያጌዳ፤ “ታ ቆማይ እስያስ ግብጼነ ቶጵያ ቦላን ጋክያባዉ ማላታ ግዳና ማላ፥ ሄዙ ላይꬃ ካሎ ጺራነ መላ ገድያን ሀመቴዳ።
4 ሄዋዳን አሶረ ካቲ፥ ግብጼፐ ኦሞደቴዳዋንታነ ቶጵያፐ በቲደ ከሴዳዋንታ ካሎ ጺራነ መላ ገድያና፥ ዱሊካ ካሎ ደእሽን ላግ፥ ግብጼ ዬላዉ አፋና።
5 ቶጵያን አማነትያዋንቱነ ግብጼን ጬቀትያዋንቱ ያዪደ ዬላታና።
6 አባ ማታን ደእያ አሳይ ሄ ጋላስ ሀዋዳን ያጋና፤ ‘በእተ፥ ኑን አሶረ ካትያፐ አታናዉ ማዲኖ ጊደ ኑ ህዶታ ዎꬄዳነ ኡንቱንቱኮ ባቃቴዳ አሳ ቦላ ሀዌ ጋኬዳ፤ ያትና፥ ኑን ዋን አታናዉ ዳንዳዬቶ?’ ያጋና” ያጌዳ።