12
ሎአ ማላትያ ኢታተꬃፐ ናገታና ማላ ሴራ
(ማቶሳ 10:26፣ 27)
1 ሄ ዎድያን ጮራ ሻኣን ፓይደትያ አሳይ እቱ እቱዋ የꬋና ጋካናዉ ሺቅ ደእሽን፥ የሱስ ባረና ካልያዋንቶ ኮይሮ ኦዳናዉ ዶሚደ፥ “ፓርሳዋቱዋ እርሹዋፐ ናገትተ፤ ሀዌካ ሎአ ማላትያ ኡንቱንቱ እምያ ኢታ ትምርትያ።
2 ሽን አያንነ ካመቴዳ የዉ ቆንጭያ ከሰናን አተና፤ ቃይካ ጌሜዳ የዉ ኤረተናን አተና።
3 ሄዋ ድራዉ ህንተ ꬉማን ሃሳዮዌ ኡባይ፥ ጋላስ ፖኡዋን ስሰታናዋ፤ ህንተንቱ አሳይ ባይናሳን ህን ግሶ ጎልያን ሀይꬃን ሳሱኮዌ ኡባይ ꬎቁ ጌዳ ስሰትያ ቆንጨሳን አዋየታናዋ።
እት ጾሳ ጻላላዉ ያያና በሴ
(ማቶሳ 10:28-31)
4 “ታናዳን አማንያዋንቶ፥ ታን ህንተዉ ያጋይ፤ ሀእ አሹዋ ዎꬍያዋንታ፥ ሄዋፐ ካላ ቃይ አያነ ኦꬃናዉ ዳንዳየናዋንታ ያዮፕተ።
5 የዉዋን ቃይ ህንተንቱ ኦስ ያያናዉ በስንቶ ታን ህንተንታ ኤርሳና፤ ሄዌካ ዎꬎዋፐ ጉይያን ጋናምያን ኦላናዉ ማታይ ደእያ ጾሳ ጻላላዉ ያይተ፤ ኤ፥ አዉ ያይተ ያጋይ።
6 “እቼሹ ሱንያ ካፋቱ ሳንትምያን ሻመትክኖየ? ሄዋንቱፐ እትኖነ ኡሳ ጾሳይ ዶገና።
7 ሽን ሀራይ አቶ ህንተንቱ ሁጲያን ደእያ ብናናይ ኡባይካ ፓይደቴዳዋ፤ ሀዋ ድራዉ ያዮፕተ፤ ህንተንቱ ጮራ ሱንያ ካፋቱዋፐ ዳሪታ።
የሱሳን አማንያዋንታነ አ እጽያዋንታ
(ማቶሳ 10:32፣ 33፤ 12:32፤ 10:19፣ 20)
8 “ታን ህንተዉ ኦዳይ፤ ታባ አሳ ስንꬃን ማርካትያዎ ኦስነ ታንካ አሳ ናአይ፥ ቃይ ጾሳ ኪታንቻቱዋ ስንꬃን ማርካታና፤
9 ሽን አሳ ስንꬃን ታና ካድያዋንታ ታንካ አሳ ናአይ፥ ቃይ ጾሳ ኪታንቻቱዋ ስንꬃን ካዳና።
10 “ታ ቦላ፥ አሳ ናኣ ቦላ፥ ቦርያ ቃላ ሃሳይያዌ ደኦፐ አ ናቁ አቶ ጌተታና፤ ሽን ጌሻ አያና ቦላ ቦርያ ቃላ ሃሳይያዌ ደኦፐ ቃይ አ ናቁ አቶ ጌተተና።
11 “አሳይ ህንተንታ አይሁደ ዎስያ ጎልያኮ፥ ጋድያ አይስያዋንቱኮነ ማታይ ደእያዋንቱ ስንꬃ ፕርዳዉ ሺሽያ ዎደ፥ ‘ዋግ ዛራኔሻ? ዎይ አያ ጊደ ሃሳያኔሻ?’ ያጊደ ህርጎፕተ፤
12 አያዉ ጎፐ፥ ህንተና አያና ጌሻይ ህንተንቱ ሄ ሳትያን ሃሳያናዉ በስያባ ታማርሳናዋ” ያጌዳ።
ዱረ ብታንያ ቦዛተꬃ ኦድያ ሌምሱዋ
13 አሳ ጋርሳፐ እት ብታኒ የሱሳ፥ “ታማርስያዎ፥ ኑ አቡ ሀይቂና ኑን ላታና ማላ አቴዳባ፥ ታዉ ግሻና ማላ ሀያ ጎዶ ታ እሻዉ ኦዳ” ያጌዳ።
14 የሱስ ቃይ፥ “ሀ ብታነዉ፥ ህንተንቱ ቦላን ፕርድያዋ ግዳናዳነ ሄዋ ህንተዉ ግሻናዳን ታና ኦኔ ሱንꬄዳዌ?” ያጌዳ።
15 ጉጂደካ ኡባቱዋ፥ “አሳ ሸምፖ ሻሉዋ ዱረተꬃይ ደኡዋ እመና ድራዉ፥ ያረትያዋፐነ ዮራትያዋፐ ናገትተ፤ ዱረተꬃ አሙዋ ኡባፐካ ህንተና ናግተ” ያጌዳ።
16 ካሊደካ ሀዋዳን ያግ ሌምሱዋ ኡንቱንቶ ኦዴዳ: “አዉ ደእያ ቢታይ ዳርሲደ ካꬃ ሞኬዳ እት ዱረ ብታኒ ደኤ።
17 ሀ ብታኒ፥ ‘ታዉ ታ ካꬃ ዎꬃናዉ ግድያ ሳአይ ባንታዋ ድራዉ አያ ኦꬆሻ?’ ያጊደ፥ ባረ ዎዛናን ቆፔዳ፤
18 ሀዋዳን ያግ ማሌዳ፤ ‘ታን ዎታነ ጎፐ፥ ታዉ ደእያ ዬስያ ኮላደ፥ ሀራ አክያ ዬስያ መꬋና ያጊደ ማሌዳ፤ ሄዋን ታ ካꬃነ ታዉ ደእያ ሚሻ ኡባ ዎꬃና።
19 ያታደ ታና፥ “ነ ካጫይ ዳሮ ሎአ፤ ነዉ ዳሮ ዎድያዉ ግድያ ማጹዋ ሺሻዳ፤ ስም ሸምፓደ ማ፥ ኡሻ፥ ናሸታ” ጋና’ ያጌዳ።
20 “ሽን ጾሳይ አ፥ ‘ሀ ቦዛዉ፥ ሀቼ ቃማ ኔን ሀይቃ። ያትና ሀ ኔን ሺሼዳ ማጹ ኡባይ ኦስ ግዳናዌ?’ ያጌዳ።
21 “ባረዉ ቢታ ቦላን ሻሉዋ ሺሽያዌ፥ ጾሳ ስንꬃን ቃይ ማንቆ ግዴዳ አሳይ ሀ ብታንያ ማላ” ያጌዳ።
ኡባ ዎደ ጾሳን አማነቱሳ ኮሼ
(ማቶሳ 6:25-34)
22 ሀዋፐ ካላ የሱስ ባረና ካልያዋንታ፥ “ሀዋ ድራዉ፥ ታ ህንተዉ ኦዳይ: ህንተንቱ ፓጻ ደአናዉ አያ ማኔ? ህንተንቱ ቦላዉ አያ ማያኔ? ያጊደ ህርጎፕተ።
23 “ጋሱካ፥ ሸምፑ ቁማፐ፥ ቃይ አሳተꬃይ ማዩዋፐ አኔ?
24 አነ ቁራቱዋ ጼልተ፤ ኡንቱንቱ ዘርክኖ፤ ጫክክኖ፤ ኡንቱንቶ ካꬃ ሺሽያ ሳአይ ዎይ ዬሲ ባዋ፤ ሀኖፐ አትን፥ ኡንቱንታ ጾሳይ ምዜ፤ ህንተንቱ ካፋቱዋፐ ዳሮፐ ዳርክቴ?
25 ህንተንቱፐ ዳሪ ቆፒደ ዳሮ ዎድያ ደአናዉ ዳንዳይያዌ ኦኔ?
26 “ስም ህንተንቱ ሀ ላፋባ ኦꬃናዉ ዳንዳየናዋንታ ግዶፐ አያዉ ሀራባዉ ህርገቲቴ?
27 ጪሻቱ ዎት ድጪኖንቶ አነ ጼልተ፤ ኡንቱንቱ ኪታን ዳቡርክኖ፤ ፑቱዋ ሱቂክኖ፤ ግዶ ሽን ታን ህንተዉ ኦድያዌ፥ ሶሎሞነ ሄዋ ኬና ቦንቼቴዳዋ ግዲደ፥ ሄ ጪሻቱዋፐ እቱዋ ማላነ ማይቤና።
28 ህንተንቶ ላፋ አማኑ ደእያዋንቶ፥ ያቶፐ ጾሳይ ሀቼ ቤቲደ፥ ዎንት ታማን ኤጻናዉ ኦለትያ፥ ደንባን ዶልያ ማታ ሀዋዳን ማይዝያዋ ግዶፐ፥ ህንተንታ ዎቲደ ኡንቱንቱፐ አꬂደ ማይዘኔ?
29 “ሀዋ ድራዉ፥ ‘አያ ማኔ? አያ ኡሻኔ?’ ያጊደ ኡባ ዎደ ኮዮፕተነ ህርጎፕተ።
30 አያዉ ጎፐ፥ ሀዋ ደማናዉ ሀ አላምያን ደእያ ጾሳን አማነተና አሳይ ህርገቲኖ። ህንተንቶ ሀዌ ኡባይ ኮሽያዋ ሳሉዋን ደእያ ህንተንቱ አዉ ኤሬ።
31 ሄዋ ሀንያዋ አጊደ፥ ጾሳ ካዉተꬃ ኮይተ፤ እ ህንተንታ ኮሽያዋ ኡባ እማናዋ።
ሳኣን ባረ ዱረተꬃን አማነቶዌ ሳሉዋን ዋኒ?
(ማቶሳ 6:19-21)
32 “ህንተንቱ ጉꬃ ግድንቶነ፥ ሳሉዋ ህንተንቱ አዉ ባረ ካዉተꬃ ህንተንቶ እማናዉ ናሸቴዳ ድራዉ ያዮፕተ።
33 “ህንተዉ ደእያዋ ዛልኢደ ማንቆ እምተ፤ ካይሱ ሺቀናሳን፥ ብልአይካ ሜናሳን፥ ሳሉዋን ዉረና ሚሻ ዳጋዪደ፥ ኤጨና ቃርጭታቱዋ ህንተንቱ ሁጰዉ ዎꬅተ።
34 አያዉ ጎፐ፥ ህንተንቱ ዎዛናይ ህንተ ሚሻይ ደእያ ሳን ደአናዋ።
ምኖ ኦሳንቻ
35 “ህንተ ጼሳይ ዳንጨቶዋ፥ ህንተ ጾምፒካ ፖኤዳዋ ግዶ።
36 ህንተንቱካ፥ ባረንቱ ጎዳይ ዪደ ፐንግያ ቆጽያ ዎደ፥ ኤለካ ዶያናዉ ቡላቻፐ ስማና ጋካናዉ ናግያ ኦሳንቻቱዋ ማላትተ።
37 ባረንቱ ጎዳይ ሶይ ዬዳ ዎደ ቤጎት ደእሽን ደምያ ሄ ኦሳንቻቱ አንጀቴዳዋንታ። ታን ቱሙዋ ጋይ፤ እ ኡንቱንታ፥ ‘ኡትተ’ ጊደ፥ ባረ ዳንጩዋ ምንሲደ ኡንቱንቶ ቁማ አꬂደ ሾባናዋ።
38 ጎዳይ ሄካ ብላህያን ዎይ ሄካ ብላህያፐ ካላ ዬዳ ዎደ፥ ቤጎቲደ ገንጭ ናጊደ ቤትያ ቆማቱ አንጀቴዳዋንታ።
39 ሀዋ ቃይ ኤርተ፤ ካይሱ አይ ሳትያን ይንቶ ጎልያዉ ኤርንቶ፥ ጎሊ ቦከትያ ዎደ ጮኡ ጊደ ጼለናሽን።
40 አሳ ናአይ ቆፐና ሳትያን ያናዋ፤ ህንተንቱ ጊገት ናግተ” ያጌዳ።
41 ጰጽሮስካ “ጎዳዉ፥ ሀ ሌምሱዋ ኔን ኦድያዌ ኑ ጻላላሴ ሀራ ኡባዉካ እትፐ ኦዳይ?” ያጌዳ።
42 ጎዳይካ፥ “ስም ኡንቱንቱ ባረ ሶይ አሳዉ ቁማ እማናዉ በስያ ሳትያን እማና ማላ፥ አ ጎዳይ ሱንꬅያ አማነቴዳነ ኤራንቻ ምዝያ ቆማይ ኦኔ?” ያጌዳ።
43 ጎዳይ ስምያ ዎደ ሀዋዳን ኪተቲና ደምያ ቆማይ እ አንጀቴዳዋ።
44 ታን ህንተዉ ቱሙዋ ኦዳይ፤ ደእያ ማጹዋ ኡባ ቦላን አ ሱንꬃናዋ።
45 የዉዋን ቃይ ሄ ቆማይ፥ “ታ ጎዳይ ኤለ ዬና፤ ጋምአናዋ” ያግ ባረ ዎዛናን ቆፖፐነ አቱማነ ማጫ ቆማቱዋ ሾቻ ዶሞፐ፥ ቃይካ ኮዮዋዳን ሙሳነ ኡሻ፥ ማꬆቱሳካ ዶሞፐ፥
46 ሄ ቆማ ጎዳይ፥ እ ቆፐና ጋላስነ ስꬍቤና ሳትያን ያናዋ፤ ሄ ዎድያን አ ቃንጸሬꬂደ፥ አ ግሹዋ ካጫካ አማነናዋንቱና እትሳ ኡዳናዋ።
47 ባረ ጎዳ ሸንያ ኤሪደ ጊገናዌነ አ ሸንያዳን ኪተተና ቆማይ፥ እ ኢታ ꬎኦባ ꬎኦበታናዋ።
48 ኤርቤናዌ ቃይ ꬎኦበታናዉ በስያዋ ኦꬄዳዌ፥ ጉꬃ ꬎኦበቴ። ዳሮባይ እመቴዳ አሳ ኡባፐ፥ አፐ ዳሮባይ ኮየቴ፤ ዎልቃማ ሀዳራይ እመቶዋፐ፥ አፐ ዳርሲደ ኮየቴ።
49 የሱስ፥ “ታን ዬዳዌ፥ ሀ ሳኣ ቦላ ታማ ሳꬃናሳ፤ ሀእካ ኤጼደንቶ፥ ታና አይ ኬና ናሸቻናዌሻ።
50 ታን ጻማቀታና መቱዋ ጽንቃታይ ፖለታና ጋካናዉ ዋናደ ኡንኤታይታ!
51 ሀ ሳኣ ታን ዬዳዌ፥ ሳሮተꬃ አሀናሳ ማላቲዬ? ህንተዉ ማላቶፖ። ታን ዮዌ፥ ሳሮታዉ ግደናን ሻካናሳፐ አትን።
52 አያዉ ጎፐ፥ ሀእፐ ዶምና እት ጎልያን ደእያ እቼሹ አሳቱ ሻከታናዋንታ፤ ሄዛቱ ላአቱዋ ቦላ፥ ላአቱካ ሄዛቱዋ ቦላ ደንዲደ ዋላቀታናዋንታ።
53 አዉ ናኣ ቦላ፥ ናአይካ አዉዋ ቦላ፥ አታ ናት ቦላ፥ ናታካ አት ቦላ፥ ቦሎታታ ናኣ ማች ቦላ፥ ናኣ ማቻካ ቦሎታት ቦላ፥ ዋላሳን ደንዲደ ሻከታናዋንታ” ያጌዳ።
ዎድያ ሀኖታ ኤሩዋ
(ማቶሳ 16:2-3)
54 ቃይካ የሱስ አሳዉ፥ “አዋይ ዉልያ ባጋና ህንተ ሻርያ በኦፐ፥ ‘ሀእ ሀ ሳትያን ሄኮ ዎልቃማ እራይ ቡካና ሀኔ’ ያጊታ፤ ቱሙካ ቃይ ቡኬ።
55 ዱገ ባጋና ጫርኩ ጫርኮደ፥ ‘ሀቼ ሻማናዋ’ ያጊታ፤ ጌተቶዋዳንካ ቃይ ሀኔ።
56 ህንተኖ ሎአ ማላትያ ኢታቶ፥ ሳኣነ ሳሉዋ ጼሊደ፥ ሀናናዋ ኤሪታ፤ ሽን ሀ ዎድያባ ዎት ኤራናዉ ዳንዳይክቴ?
ስጋተꬃባነ ሞቱዋባ
(ማቶሳ 5:25-26)
57 “ዎደ ህንተንቱ ጽሎ ግዴዳ የዉዋ ህንተንቶ አያዉ ፕርድክቴ?
58 ነ ሞርክያና እትፐ ፕርድያ ዳና ስንꬃን ሺቃናዉ ቦደ፥ ብሮ ኦግያ ቦላ ደእሽን ስገታ ድጋ። ሄዌ ꬋዮፐ ኔና ጎቺደ ፕርድያ ዳናኮ አፋና፤ ዳናይካ ፖልሰዉ አꬅ እማናዋ፤ ፖልሲ ቃሾ ጎለን የጋናዋ።
59 ታን ነዉ ኦድያዌ፥ ዉርሰꬃ አጩዋ ጭጋና ጋካናዉ ሄዋፐ ከሳካ” ያጌዳ።