21
ኣምዓቲ ኢሞታ
(ማር 12፡41-44)
1 ዬሱሲ ꬎቁ ጊዴ ፄሊያ ዎዴ፥ ዱሬ ኣሳይ ጌሻ ጎሊያን ኢሞታ ሺሺያ ሚሻ ጊዶን ባሬንቶ ዴዒያዋፔ ኡንቱንቱ ዬጊያ ዎዴ ቤዔዳ።
2 ቃሲካ ኢቲ ሂዬሳ ኣምዔ ሚሺራታ ላዑ ሴምቤሪያ ሄዋን ዬጊያ ዎዴ ቤዒዴ፥
3 «ታ ሂንቴው ቱሙዋ ጋይ፥ ሃ ሂዬሳ ኣምዔ ሚሺራታ፥ ኦፔኔ ዳሩዋ ኢማዱ።
4 ሃ ኣሳይ ኡባይ ባሬንቶ ፓላሆዋፔ ኢሜዲኖ፤ ሺን ኢዛ ባሬ ሂዬሳቴꬃ ዎልቃን ባሬው ዴዒያዋ ኡባ ኢማዱ» ያጌዳ።
ጌሻ ጎሊ ኮሌታናዋ ዬሱሲ ካሴቲዴ ኦዴዳ
(ማት 24፡1-2፤ ማር 13፡1-2)
5 ኣ ካሊያዋንቱፔ ኢቱ ኢቱ፥ «ጌሻ ጎሊ ሎዖ ሹቻኒኔ ባላ ሺቁዋ ኢሞታን ሎዔዳዋ» ያጊ ሃሳዪያ ዎዴ ዬሱሲ፥
6 «ሃዌ ሂንቴንቱ ቤዒያዌ ኡባይ ኮሌቴናን፥ ሹቻይ ሹቻ ቦላን ኬሌቲዴ ኣቴና ዎዲ ያናዋ» ያጌዳ።
7 ኡንቱንቱካ፥ «ታማሪሲያዎ፥ ሲሚ ሃዌ ሃናናዌ ኣዉዴ? ቃሲካ ሃዌ ሃናናው ማላይ ኣዬ?» ያጊዲ ኦቼዲኖ።
ዬሱሲ ሜቱዋ ዎዲኔ ናሼቻ ዎዲ ያናዋ ኦዴዳ
(ማት 24፡3-13፤ ማር 13፡3-13)
8 ኢካ፥ «ኦኒኔ ባሌꬄናዳን ናጌቲቴ፤ ጮራ ኣሳይ፥ ‹ታኒ ኪሪስቶሳ› ያጊዴ ቃሲካ፥ ‹ዎዲ ማቴዳ› ያጊዴ ታ ሱንꬃን ያናዋንታ፤ ሂንቴንቱ ቃሲ ኡንቱንታ ካሎፒቴ።
9 ኦላ ዬዉዋኔ ኣሳ ማካላባ ሲሲያ ዎዴ ዳጋሞፒቴ፤ ሃዌ ኮይሮ ሃናናው ቤሲያዋ ጊዶ ዲራፔ ኣቲን ዉርሴꬃይ ቢራ» ያጌዳ።
10 ሄዋፔ ካሊዴ ኣሳው፥ «ኣሳይ ኣሳ ቦላ፥ ካዉቴꬃይካ ካዉቴꬃ ቦላ፥ ዴንዳናዋ፤
11 ዎልቃማ ቢታ ቃꬃይ ሃናናዋ፤ ኮሻይኔ ሃርጊ፥ ዱማ ዱማሳን ሜꬌታናዋ፤ ያሺያ ዬዉኔ ኡባካ ዎልቃማ ማላታይ ሳሉዋፔ ሃናናዋ።
12 «ሃዌ ኡባይ ሃናናፔ ካሲያን ቃሲ ኣሳይ ሂንቴንታ ኦይቃናዋንታ፥ ሜቶꬃናዋንታ፤ ሂኒ ኣዪሁዳቱዋ ዎሳ ጎሌ ኣሳው ኣꬂ ኢማናዋንታ፤ ቃሾ ጎሌካ ጌሊሳናዋንታ፤ ካታቱዋ ሲንꬃኒኔ ሞዲያዋንቱ ሲንꬃን ሺሻናዋንታ፤ ሃዌ ኡባይ ታ ሱንꬃ ጋሱዋን ሂንቴንታ ጋካናዋ።
13 ሃዌካ ማርካታናው ሂንቴው ሎዖ ቃዳ ጊዳናዋ።
14 ሃዋ ጊዲያ ዲራው፥ ኣይ ዛሩዋ ኢማኔ ጊዴ ኮይሮቲዴ ሂንቴንቱ ኡንዔቴና ማላ ሃዋ ዎዛና ኣꬂቴ።
15 ኤቄቲያዋንቱ ኡባይ፥ ኤቄታናዉኔ ላካናው ዳንዳዬና ቃላኔ ኣꬎ ጪንጫቴꬃ ታኒ ሂንቴንቶ ኢማና።
16 ሂንቴንታ ዬሌዳዋንቱኔ ሂንቴንቱ ኢሻቱ፥ ሂንቴንቱ ዳባቱኔ ሂንቴንቱ ላጌꬃቱካ ኣቴናን ሂንቴንታ ኣꬂ ኢማናዋንታ፤ ሂንቴንቱፔካ ኢቱዋ ኢቱዋ ዎꬋናዋንታ።
17 ታ ሱንꬃ ዲራው ኣሳ ኡባ ማታን ኢፄቴዳዋንታ ጊዳኒታ።
18 ዬዉዋን ቃሲ ሂንቴንቱ ሁጲያ ቢናናፔካ ኢቲናኔ ባዩኩ።
19 ሚኒ ኤቂዴ ሂንቴንቱ ሼምፑዋ ኣሺታ።
ዬሱሲ ዬሩሳላሜ ባዬꬃባ ኦዴዳ
(ማት 24፡15-21፤ ማር 13፡14-19)
20 «ዬሩሳላሜ ኦላ ኣሳን ዶዴቴዳ ዎዴ፥ ኢዚ ባዬꬃይ ማቴዳዋ ኤሪቴ።
21 ሄ ዎዴ ዪሁዳን ዴዒያዋንቱ ዴሪያኮ ባቃቲኖ፤ ካታማን ዴዒያዋንቱ ቃይ ሄዋፔ ኬሲኖ፤ ባላጋሪያን ዴዒያዋንቱካ ያ ካታማኮ ጌሎፒኖ፤
22 ፆሳ ቃላን ፃፌቴዳዌ ኡባይ ፖሌታናዳን ሃዌ ሃሉዋ ኬሲያ ዎዲያ።
23 ቢታ ቦላን ዎልቃማ ሜቱ ሃናናዋ፤ ሃዒ ዴዒያ ኣሳ ቦላን ሃንቁ ያናዋ፤ ሄዋ ዲራው ሄዎዲያን ሻሃሮዋንቶኔ ꬋንꬂያዋንቶ ኣዬ!
24 ኣሳይ ኡባይ ማሻን ሃይቃናዋንታ፤ ፆሳ ኤሬና ጋዲያ ኡባቱካ ኦሞዱዋን ባናዋንታ፤ ዬሩሳላሜካ ኣዪሁዳ ጊዴናዋንቱ ዎዲ ፖሌታና ጋካናው፥ ኡንቱንቱን ዬꬌቴዳዉኖ ጊዳናዉኑ።
ኪሪስቶሳ ላዔꬆ ዩሳ
(ማት 24፡29-31፤ ማር 13፡24-27)
25 «ኣዋ፥ ኣጌናኒኔ ፆሊንቲያ ቦላ ማላታይ ሃናናዋ፤ ኣባፔኔ ቤታ ኮሻፔ ዴንዶ ጋሱዋን ቢታ ቦላን ዴዒያ ኣሳይ ኡባይ ኡንዔታናዋንታ፤ ሂርጋናዋንታ።
26 ሳሉዋ ዎልቃይ ኡባይ ቃፂያ ዲራው ኣሳይ ያሻኒኔ ኣላሚያ ቦላ ኣዬ ያናዌሻ ያጊዴ ናጉዋን ዳቡራናዋንታ።
27 ሄ ዎዴ ኣሳ ናዓይ ዎልቃኒኔ ዎልቃማ ቦንቹዋን ሻሪያን ዪያ ዎዴ ቤዓናዋንታ።
28 ሂንቴንቱካ፥ ሃ ዬዉ ፖሌቱሳ ዶሚያ ዎዴ፥ ዎዙ ማቶ ዲራው ሲቲ ጊዴ ኤቂቴ፤ ፑዴ ꬎቁ ጊዴ ፄሊቴ» ጌዳ።
ባላሲያ ጌቴቲያ ሚꬃ ሌሚሱዋ
(ማት 24፡32-35፤ ማር 13፡28-31)
29 ካሊዴካ፥ ሃዋ ያጊ ሌሚሱዋ ኦዴዳ፥ «ዎዴንꬃፔኔ ሃራ ሚꬃ ኡባፔ ፄሊቴ፤
30 ሃይꬃይ ኣጪና ቤዒያ ዎዴ፥ ሄ ዎዴ ቦኒ ማቴዳዋ ሂንቴንቱ ኤሪታ።
31 ሄዋዳንካ ቃሲ ዬዋቱ ፖሌቲያዋ ቤዒያ ዎዴ፥ ፆሳ ካዉቴꬃታ ማቴዳዉኖ ኤሪቴ።
32 «ታኒ ሂንቴው ቱሙዋ ጋይ፤ ሃዌ ኡባይ ፖሌታና ጋካናው ሃ ዬሌታይ ኣꬌና።
33 ሳሉኔ ሳዓይ ኣꬋና፤ ሺን ታ ቃላይ ኣꬌና።
34 ሲሚ ዛዋይ ባይና ዴዑዋን፥ ኡሻ ዳሩዋኔ ዴዑዋባን ኡንዔቲሺን ሂንቴንቱ ዎዛናይ ሌፔናዳኒኔ ሄ ጋላሳይ ጲሪያዳን ቆፔናን ሂንቴና ጋኬናዳን ናጌቲቴ፤
35 ሃዌ ቢታ ኡባን ዴዒያዋንቱ ኡባቱዋ ቦላን ጋካናዋ።
36 ሲሚ ዪያ ኢታባ ኡባፔ ሂንቴንቱ ኣታናዳኒኔ ኣሳ ናዓ ሲንꬃንካ ኤቃናው ዳንዳያና ማላ፥ ኡባ ዎዴ ሚኒ ዎሲቴ» ያጌዳ።
37 ዬሱሲ ጋላሲ ጋላሲ ጌሻ ጎሊያን ታማሪሲዴ፥ ቃማ ቃማ ዴብሬ ዛይቴ ያጌቲያ ዴሪያኮ ኬሲዴ ኣቄ።
38 ኣሳይ ኡባይ ኣ ሲሳናው ጉራን ያ ጌሻ ጎሊያ ኣኮ ዪኖ።