110
ጾሳይ ዶሬዳ ካትያ ዳውት ጻፌዳ ማዛሙርያ
1 መꬍና ጎዳይ ታ ጎዳ፥
“ታን ነ ሞርከቱዋ ኔን ገድያን
የꬋ ኤቂያዋ ኦꬃና ጋካናዉ፥
ሀዋን ታፐ ኡሸቻ ባጋና ኡታ” ያጌዳ።
2 መꬍና ጎዳይ ነ ምኖተꬃ ጻምኣ ጽዮነፐ ኪታና፤
ያትና፥ “ነ ሞርከቱዋ ሞዳ!” ያጋና።
3 ኔን ነ ሞርከቱዋና ኦለትያ ጋላስ፥
ነ አሳይ ኤኖ ጋና።
ዎንታ ጉራ ከተርሳዳን፥
ነ ዎዳላ አሳይ ኔኮ ጌሻ ደረቱዋን ሺቃና።
4 መꬍና ጎዳይ፥ “ማልካ ጸደቅ ቄስያ ግዴዳዋዳን፥
ኔንካ መꬍናዉ ቄስያ ግዳና” ያጊደ ጫቄዳ፤
እ ባረ ቆፋ ላመና።
5 ጎዳይ ነ ኡሸቻን ደኤ፤
ባረ ሀንቁዋ ጋላስ እ ካተቱዋ ክንቼሬꬃና።
6 ካዉተꬃ ቦላ እ ፕርዳና፤
ኦላ ደምባቱዋካ አሃ ጻላላ ኦꬃና፤
ሳኣን ኡባን ደእያ ካተቱዋ እ መንሬꬃና።
7 ካቲ ኦግያ ማታን ደእያ ሃꬃ ፑልቱዋፐ ኡሺደ፥
እ ባረ ሁጲያ ꬎቁ ኦꬃና።