145
ጋላታ ጾሳዉ
ዳውት ጻፌዳ ጋላታ ሳባ
1 አቤት ታ ጾሳዉ፥ ታ ካትያዉ፥ ታን ኔና ግታያናነ፥
ነ ሱንꬃ መꬍ መꬍናዉ ጋላታና።
2 ታን ኔና ኡባ ጋላስ ሳባና፤
ነ ሱንꬃካ መꬍ መꬍናዉ ጋላታና።
3 መꬍና ጎዳይ ዎልቃማ፤ ꬎቃ ጋላታይ አዉ በሴ።
አ ግታተꬃይ አሳ ቆፋፐ አꬌ።
4 እት የለታይ ሀራ የለታዉ
ኔን ኦꬄዳዋ ኦዳና፤
ነ ማላልስያ ኦሶቱዋካ አዋያና።
5 ኡንቱንቱ ነ ቦንቹዋነ
ነ አንጋ ግታተꬃባ ሃሳያና፤
ታንካ ነ ማላልስያ ኦሱዋ
ዛራ ዛራደ ቆፓና።
6 አሳይ፥ “ሆላ!” ጊስያ ነ ኦሱዋ ዎልቃባ ሃሳያና፤
ታንካ ነ ግታተꬃ አዋያና።
7 ኡንቱንቱ ነ ኬካተꬃ ዳሩዋ ኦዳና፤
ነ ጽሎተꬃባካ የጻና።
8 መꬍና ጎዳይ ቃረትያዋነ ማርያዋ፤
እ ሀንቀታናዉ ኤሌለናዋነ፤
ዳንዳያንቻነ አገና ሲቁ ዳርያዋ።
9 መꬍና ጎዳይ ኡባዉ ኬካ፤
እ ባረ መꬌዳ ኡባዉ ቃረትያዋ።
10 አቤት መꬍና ጎዳዉ፥
ነ መታ ኡባይ ኔና ጋላታና፤
ነ አሳቱ ኡባይካ ኔና ሳባና።
11 ኡንቱንቱ ነ ካዉተꬃ ቦንቹዋባ ሃሳያና፤
ነ ዎልቃባ ኦዳና።
12 ሄዌነ፥ ነ ዎልቃማ ኦሱዋባነ
ነ ካዉተꬃ ቦንቹዋ አንጋባ
አሳ ኤርሳና።
13 ነ ካዉተꬃይ መꬍና ካዉተꬃ፤
ነ ማታይ የለታ ኡባ ጋካናሳ።
መꬍና ጎዳይ ባረ ጌዳ ቃላዉ ኡባዉ አማነትያዋ፤
እ ባረ ኦሱዋ ኡባን ቃረትያዋ።
14 መꬍና ጎዳይ ሆኬዳዋንታ ኡባ ዘምፕሴ፤
ኩንዴዳዋንታ ኡባ ደንꬄ።
15 ኡባ አይፊ ኔኮ ጼሌ፤
ኡንቱንታ ኮሽያ ዎድያን ኔን ኡንቱንቶ ቁማ እማሳ።
16 ኔን ነ ኩሽያፐ እማ፤
ፓጻ ደእያዋንታ ኡባ አሙዋ አላ።
17 መꬍና ጎዳይ ባረ ኦግያን ኡባን ጽሉዋ፤
እ ባረ ኦሱዋ ኡባን ቃረትያዋ።
18 መꬍና ጎዳይ ባረና ጼስያ ኡባዉ፥
ቱሙዋን ባረና ጼስያ ኡባዉ ማታን ደኤ።
19 እ ባረዉ ያይያዋንቱ ኡባዉ፥
አሙዋ ኩንꬄ።
ቃይ እ ኡንቱንቱ ዋሱዋ ስሲደ፥
ኡንቱንታ አሼ።
20 መꬍና ጎዳይ ባረና ሲቅያዋንታ ኡባ ናጌ፤
ሽን ኢታቱዋ ኡባ ꬋይሳና።
21 ታን ታ ዶናን መꬍና ጎዳ ጋላታና።
መታ ኡባይ አ ጌሻ ሱንꬃ
መꬍ መꬍናዉ ጋላቶ!