ኦይደንꬆ ማጻፋ
90
(90—106)
አሳ ናኣ ደኡዋ
ጾሳ አሳይ ሙሴ ዎሴዳ ዎሳ
1 ጎዳዉ፥ ኔን የለታ ኡባን፥
ኑን ደእያ ሳኣ ግዳዳ።
2 ደረቱ መታናፐ ካሰ፥
ዎይ ኔን ሳኣ ኦꬃናፐ ካሰ፥
መꬍናፐ መꬍና ጋካናዉካ ኔን ጾሳ።
3 ኔን አሳ ናናቱዋ፥ “አሳ ናቶ፥
ጉየ ቢታዉ ስምተ” ያጋደ፥
ኡንቱንታ ጉየ ኡንቱንቱ መቴዳ ቢታዉ ዛራሳ።
4 ሻኡ ላይꬃይ ነዉ ዝን አꬎ ጋላሳ ማላ፤
ዎይ ቃማ ግዶፐ እት ሳትያ ማላ።
5 ኔን አሳ ቆፐናን ድኡዋዳን አፋሳ።
ኡንቱንቱ አኩሙዋ ማላ፤
ዎንታ ዎንታ ዶልያ ማታ ማላ።
6 ሄ ማታይካ ዎንታ ዎደ ድጪደ ጪሼ፤
ኦማርስያ ዎደ ሹል መሌ።
7 ኑን ነ ይሉዋን ዉሬዶ፤
ነ ሀንቁዋ ሱሉዋን ዳጋሜዶ።
8 ኔን ኑ ኢታ ኦሱዋ
ነ ስንꬃን ዎꬃዳ፤
ቃይ ኑ ጌሜዳ ናጋራ
ነ ስንꬃ ፖኡዋኮ አꬃዳ።
9 ኑ ጋላሳ ኡባይ ነ ሀንቁዋን አꬌዳ፤
ኑ ላይꬃ እት ኦልያዳን ዉርሴዶ።
10 ኑ ደኡዋ ላይꬃይ ላፑን ታማ፤
ዎይ ምኖፐ፥ ሆስፑን ታማ፤
ሄዌካ መቱዋነ ቱጋ።
ኑ ላይꬃይ ኤለካ አꬌ፤
ኑንካ ኤለካ ክቼቶ።
11 ነ ሀንቁዋ ዎልቃ ኤርያዌ ኦኔ?
ነ ሀንቁዋ ሱሉ ያሽያዋ።
12 ሄዋ ድራዉ፥ ኑ ላይꬃ በስያዋዳን፥
ጎኤታና ማላ አꬌዳ ኤራ ኑና ታማርሳ።
13 አቤት መꬍና ጎዳዉ፥ ነ ሀንቁ አዉደ ጋካናሴ?
ሀያና፤ ነ ቆማቶ ቃረታ!
14 ኑ ላይꬃ ኡባን
ኑን ናሸታናዳንነ የጻናዳን፥
ዎንታ ዎንታ አገና ነ ሲቁዋን ኑና ካልሳ።
15 ኔን ኑና መቶዬዳ ጋላሳቱዋ ኬሻነ
ኑን ቱጋ በኤዳ ላይꬃቱዋ ኬሻ፥
ኑና ናሸቻ።
16 ኑዉ ነ ቆማቶ ነ ኦሱ ቆንጮ፤
ነ ቦንቾ ዎልቃይ ኡንቱንቱ ናናቶ ቤቶ።
17 ጎዳ ኑ ጾሳ ኬካተꬃይ ኑ ቦላን ግዶ፤
ኑ ኩሽያ ኦሱዋ ኑዉ ሱርሳ።
ኤ፥ ኑ ኩሽያ ኦሱዋ ሱርሳ።