2
(1) ዬሱሲ ኤፌሶኔን ዴዒያ ዎሳ ጎሌው ጎዋ
1 «ኤፌሶኔን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡
‹ባሬ ኡሼቻ ኩሺያን ላፑ ፆሊንቲያ ኦይቄዳዌ፥ ፆምፓቱዋ ዎꬂያ ላፑ ዎርቃ ባላቱዋ ጊዱዋና ሃሜቲያዌ ሃዋዳን ያጌ።
2 ታኒ ኔ ኪታ፥ ኔ ዳቡራኔ ኔ ጌንጩዋ ኤራይ። ቃሲ ኔኒ ኢታ ኣሳቱዋ ጌንጫናው ዳንዳያቤናዋካ ታኒ ኤራይ፤ ዬሱሲ ኪቴዳዋንታ ጊዴናን ዴዒዴ ባሬንታ፥ ‹ኑኒ ዬሱሲ ኪቴዳዋንታ› ጊያዋንታ ኔኒ ፆሞሳዴ፥ ኡንቱንቱ ዎርዶ ጊዲያዋ ዴሜዳዋካ ኤራይ።
3 ኔኒ ጌንጫዳ፤ ቃሲ ታ ሱንꬃ ዲራዉካ ሜቱዋ ዳንዳያዳ፤ ዳቡራቤይካ።
4 ሺን ታኒ ኔና ካꬊያባይ ዴዔ፤ ኣዪሲ ጎፔ፥ ኔኒ ካሴ ኔ ሲቁዋ ኣጋዳ።
5 ሲሚ ኔኒ ሃቃፔ ኩንዳዲንቶኔ ኣኬካ። ኔ ናጋራፔ ሲማ፤ ኔኒ ካሴ ኦꬂያ ኦሱዋ ኦꬃ። ሄዌ ꬋዮፔ፥ ታኒ ኔኮ ያና፤ ያዴ ኔኒ ኔ ናጋራፔ ሲማና ꬋዮፔ፥ ኔኒ ፆምፒያ ዎꬂያ ኔ ባላ ኣ ሳዓፔ ኣካዲጋና።
6 ሺን ኢቲባ ሎይꬃዳ፤ ኒቆላዋቱዋ ኦሱዋ፥ ታኒ ኢፂያዋ ኔኒካ ኢፃዳ።
7 ‹ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ፤ ታኒ ፆኒያ ኡራው ፆሳ ጌኔቲያን ሞኪያ ዴዑዋ ሚꬃ ኣይፊያ ማናው ኢማና› ያጌ»
ያጋዴ ፃፋ።
(2) ዬሱሲ ሳሚሪኔሳን ዴዒያ ዎሳ ጎሌው ጎዋ
8 «ሳሚሪኔሳን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡
‹ሃይቄዳዌ፥ ሃይቁዋፔካ ዴንዴዳዌ፥ ኮይሩኔ ዉርሴꬃይ ሃዋዳን ያጌ።
9 ‹ታኒ ኔ ዋዪያኔ ኔ ሂዬሳቴꬃ ኤራይ፤ ሺን ኔኒ ዱሬ። ኣዪሁዳ ጊዴናን ዴዒዴ ባሬንታ፥ ‹ኑኒ ኣዪሁዳ› ጊያዋንቱ ቦሪያዋ ታኒ ኤራይ፤ ሺን ኡንቱንቱ ሴፃና ማባራን ዴዒኖ።
10 ኔኒ ዋዬታና ዋዬው ያዮፓ። ቤዓ፥ ፃላሂያ ካፑ ሂንቴፔ ኣማሬዳዋንታ ፆሞሳናው ቃሾ ጎሌን ዬጋና፤ ታሙ ጋላሳ ጋካናው ሂንቴንቱ ዋዬታና። ሃይቃና ጋካናሲካ ኣማኔቴዳዋ ጊዳ፤ ታኒ ኔው ዴዑዋ ኣኪሊሊያ ኢማና።
11 ‹ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ፤ ፆኒያ ኡራይ ላዔꬁዋ ሃይቁዋን ቆሄቴና› ያጌ»
ያጋዴ ፃፋ።
(3) ዬሱሲ ጴርጋሞናን ዴዒያ ዎሳ ጎሌው ጎዋ
12 «ጴርጋሞናን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡
‹ላዑ ባጋና ሌፌቴዳ ማሻይ ዴዒያዌ ሃዋዳን ያጌ።
13 ‹ታኒ ኔኒ ዴዒያ ሳዓ ኤራይ። ኔኒ ሴፃና ካዉቴꬃ ኦይዲ ዴዒያ ሳዓን ዴዓሳ፤ ታ ሱንꬃ ሚኒሳ ናጋሳ። ሃራይ ኣቶ፥ ሴፃናይ ዴዒያ ሳዓን ሂንቴንቱ ማታን ኣሳይ ዎꬌዳ ታኒ ኣማኒያ ማርካይ ኣንቲጳሲ ዴዒያ ዎዴካ ታና ኣማኒያዋ ኣጋቤይካ።
14 ሺን ታኒ ኔና ቦሪያ ጉꬃባይ ዴዔ፤ ኢስራዔሊያ ኣሳይ ኤቃው ያርሼዳ ቁማ ማናዳኒኔ ዎሹማናዳን ኡንቱንታ ናጋራ ኦሲሴዳ ባላቃ ታማሪሴዳ ባላማ ቲሚርቲያ ታማሪያ ኣማሬዳ ኣሳቱ ኔናና ዴዒኖ።
15 ሄዋዳንካ፥ ቃሲ ኒቆላዋቱዋ ቲሚርቲያ ታማሪያ ኣሳቱ ኔናና ዴዒኖ።
16 ሄዋ ዲራው፥ ኔኒ ኔ ናጋራፔ ሲማ፤ ሄዌ ꬋዮፔ፥ ታኒ ኔኮ ኤሌካ ያና፤ ያዴ ሄ ኣሳቱዋና ታ ዶናፔ ኬሲያ ማሻን ኦሌታና።
17 ‹ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ። ፆኒያ ኡራው ታኒ ጌማን ዴዒያ ማናፔ ኣማሬዳዋ ኢማና። ቃሲ ታኒ ቦꬃ ሹቻካ ኣው ኢማና፤ ኣኪያ ኡራፔ ኣቲን፥ ኦኒኔ ኤሬና ኦራꬃ ሱንꬃይ ሄ ሹቻ ቦላ ፃፌቲ ኡቴዳ› ያጌ»
ያጋዴ ፃፋ።
(4) ዬሱሲ ቲያፂሮኔን ዴዒያ ዎሳ ጎሌው ጎዋ
18 «ቲያፂሮኔን ዴዒያ ዎሳ ጎሊያ ኪታንቻው ሃዋዳን ያጋዴ ፃፋ፡
‹ፆሳ ናዓይ፥ ታማ ላጩዋ ማላቲያ ኣይፊ ዴዒያዌ፥ ቃሲ ጮጪያ ታማን ቴሪዴ ጶሊያ ናሃሲያ ጌቴቲያ ቢራታ ማላቲያ ጌዲ ዴዒያዌ፥ ሃዋዳን ያጌ።
19 ‹ታኒ ኔ ኦሱዋ፥ ኔ ሲቁዋ፥ ኔ ኣማኑዋ፥ ኔ ማዱዋኔ ኔ ጌንጩዋ ኤራይ፤ ኔኒ ኮይሮ ኦꬂያዋፔ ሃዒ ዳሪሳዴ ኦꬂያዋ ታኒ ኤራይ።
20 ሺን ታኒ ኔና ካꬊያባይ ዴዔ፤ ባሬና፥ ‹ታኒ ናባቶ› ያጊያ ሚሺራቶ ኤልዛቤሎ ሼኔኮ ጋዳ፤ ሄ ሚሺራታ ታ ኦሳንቻቱ ዎሹማናዳኒኔ ኤቃው ያርሼዳ ቁማ ማናዳን፥ ታማሪሳዉኔ ባሌꬃው።
21 ኢዛ ባሬ ናጋራፔ ሲማና ማላ፥ ታኒ ኢዚው ዎዲያ ኢማዲ፤ ሺን ዎሹማናው ካጄሊያዋፔ ኢዛ ሲማናው ኮያቤይኩ።
22 ቤዒቴ፥ ታኒ ኢዞ ጊሱዋን ኩንዲሲና፤ ሳኩዋን ኢዛ ዋዬታና። ኢዚና ዎሹሚያዋንቱ ሄ ኢዚና ኦꬂያ ናጋራፔ ሲማና ꬋዮፔ፥ ኡንቱንታካ ዎልቃማ ዋዪያን ዬጋና።
23 ታኒ ኢዚ ናናካ ዎꬋና፤ ቃሲ ዎሳ ጎሊያ ኡባይካ ታኒ ኣሳ ቆፋኔ ኣሙዋ ኤሪያዋ ጊዲያዋ ኤራና፤ ታኒ ሂንቴንቱሲ ሂንቴንቱ ኪታ ማላ ኢማና።
24 ‹ቲያፂሮኔን ዴዒያ ሃራቶ፥ ሃ ኢታ ቲሚርቲያ ታማሪቤናዋንቶ፥ ሃራቱ፥ «ሴፃና ጪሞ ዬዉዋ» ጊያዋ ሂንቴንቱ ታማሪቤዪኪታ፤ ታኒ ሂንቴንታ ሃራ ዴፁዋ ቶሲኬ ጋይ።
25 ሺን ታኒ ያና ጋካናው ሂንቴንቱሲ ዴዒያዋ ሎይꬂ ናጊቴ።
26-27 ‹ፆኔዳዎኔ ዉርሴꬃይ ጋካናው ታ ኪታ ናጌዳዎ፥ ኣሳ ዛሪያ ኡባ ሞዳና ማላ፥ ታኒ ታ ኣዉዋፔ ኣኬዳ ማታ ማላ ኣው ኢማና፤
«ኢ ኣሳ ዛሪያ ኡባ ቢራታ ፃምዓን ሞዳናኔ ኡርቃፔ
ሜꬌታ ሚሻ ሜንꬂያዋዳን ሜንꬃና።»
28 ቃሲ ታኒ ኣው ባካሊያ ፆሊንቲያ ኢማና።
29 ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ› ያጌ»
ያጋዴ ፃፋ።