5
ማጻፋነ ዶርሳ
1 እት ጻጸቶ ማጻፋይ ካዉተꬃ ኦይድያን ኡቴዳዋ ኡሸቻ ኩሽያን ደእያዋ በኣድ፤ ሄ ጻጸቶ ማጻፋይ ላኡ ባጋናካ ጻፈት ኡቴዳ፤ ቃይ ላፑ ማታፋይ አ ቦላ አታመቴዳ።
2 ታን እት ዎልቃማ ኪታንቻይ ባረ ቃላ ꬎቁ ኦꬂደ፥ “ማታፋ ዶዪደ፥ ጻጸቶ ማጻፋ ብላናዉ በስያ ኡራይ ኦኔ?” ያጊደ፥ አዋይያዋ በኣድ።
3 ሳሉዋን ግድና ዎይ ሳኣን ግድና፥ ዎይ ሳኣፐ ጋርሳን ግድና፥ ሄ ጻጸቶ ማጻፋ ብላናዉ ዎይ አ ግዱዋ ጼላናዉ ኦንነ በስያዌ ባዋ።
4 ጻꬃ ማጻፋ ብላናዉ ዎይ አ ግዱዋ ጼላናዉ በስያ ኡራይ ባይና ድራዉ፥ ታን ዳሮ ዬካድ።
5 ጭማቱዋፐ እቱ ታና፥ “ዬኮፓ፤ በአ፥ ይሁዳ ዛርያ ግዴዳ ጋሙ፥ ዳዊተ ዛሪ ጾኔዳ። እ ማታፋ ዶያናዉነ ጻጸቶ ማጻፋ ብላናዉ በሴ” ያጌዳ።
6 ታን ካዉተꬃ ኦይድያፐ፥ ደኡዋን ደእያ ኦይዱ መታቱዋፐነ ቃይ ጭማቱዋፐ ግዱዋን፥ ሹከቴዳ ዶርሳ ማላቲደ ኤቄዳዋ በኣድ፤ አዉ ላፑ ካጨቱነ ላፑ አይፈቱ ደኢኖ። ሄዋንቱ አላምያ ኡባ ኪተቴዳ ጾሳ ላፑ አያናቱዋ።
7 ሄ ዶርሳይ ቢደ፥ ካዉተꬃ ኦይድያ ቦላ ኡቴዳዋ ኡሸቻ ኩሽያፐ ጻጸቶ ማጻፋ አኬዳ።
8 እ ሄ ጻጸቶ ማጻፋ አኬዳ ዎደ፥ ደኡዋን ደእያ ኦይዱ መታቱነ ላታማነ ኦይዱ ጭማቱ አ ስንꬃን ኩንዴድኖ። ኡንቱንቱ ሁጲያን ሁጲያን ዲꬃነ እጻናይ ኩሜዳ ዎርቃ ሚሻ ኦይቄድኖ። ሄ እጻናይ ጌሻቱ ጾሳ ዎስያዋ።
9 ኡንቱንቱ፥
“ጻꬃ ማጻፋ አካናዉነ፥
ማታፋ ዶያደ፥
ጼላናዉ ነዉ በሴ።
አያዉ ጎፐ፥ ኔን ሹከታዳ።
ኔን ቆሙዋ ኡባፐ፥
ዱማ ዱማ ጋድያ ቃላ ኡባፐ፥
ያራ ኡባፐነ፥ ዛርያ ኡባፐ፥
ነ ሱꬃን፥ ጾሳዉ አሳ ዎዛዳ።
10 ኑ ጾሳዉ ኦꬃና ማላ፥
ኡንቱንታ ኔን፥ ካታቱዋነ፥
ቄሳቱዋ ኦꬃዳ።
ቃይ ኡንቱንቱ ሳአንካ ሞዳና”
ያጊደ ኦራꬃ ማዝሙርያ የጺኖ።
11 ሄዋፐ ጉይያን፥ ታን ጼላደ፥ ካዉተꬃ ኦይድያ፥ ደኡዋን ደእያ ኦይዱ መታቱዋነ ጭማቱዋ ዩይ አꬊደ ኤቄዳ ዳሮ ኪታንቻቱዋ ኮሻ ስሳድ፤ ኡንቱንቱ ሻኣንነ ሚሎንያን ፓይደቴድኖ።
12 ሄ ኪታንቻቱ ባረንቱ ቃላ ꬎቁ ኦꬂደ፥
“ሹከቴዳ ዶርሳይ
ዎልቃ፥ ዱረተꬃ፥
አꬌዳ ኤራ፥
ምኖተꬃ፥
ቦንቹዋ፥ ሳባ፥
ጋላታ አካናዉ በሴ!”
ያጌድኖ።
13 ሄዋፐ ጉይያን፥ ሳኣን፥ ሳሉዋን፥ ሳኣፐ ጋርሳንነ አባ ግዱዋን ደእያ መታ ኡባይነ ቃይ ሄዋንቱን ደእያ መታ ኡባይ፥
“ካዉተꬃ ኦይድያ ቦላ፥
ኡቴዳዎነ ዶርሳዉ፥
ጋላታይ፥ ቦንቹ፥
ሳባይነ ዎልቃይ፥
መꬍ መꬍናዉ ግዶ!”
ያጊደ የጽሽን ስሳድ።
14 ደኡዋን ደእያ ኦይዱ መታቱ፥ “አመንእ” ያግና፥ ጭማቱ ጉፋኒደ ጎይኔድኖ።