8
ጻጸꬃ ማጻፋ ላፑንꬃ ማታፋይ ዶየቴዳ
1 ዶርሳይ ላፑንꬃ ማታፋ ዶዬዳ ዎደ፥ ባካ ሳትያ ግድያዋ ኬና ሳሉ ጮኡ ጌዳ።
2 ሄዋፐ ጉይያን፥ ታን ላፑ ኪታንቻቱዋ ጾሳ ስንꬃን ኤቂያዋንታ በኣድ፤ ኡንቱንቶ ላፑ ማላካታይ እመቴዳ።
3 እጻና ጩዋይያ ዎርቃ ሚሻ ኦይቄዳ ሀራ ኪታንቻይ ዪደ፥ ያርሽያ ሳ ማታን ኤቄዳ። ዎርቃፐ መቴዳ ያርሽያሳይ ካዉተꬃ ኦይድያ ስንꬃን ደኤ፤ ሄ ያርሽያ ሳ ቦላ ጌሻ ኡባቱዋ ዎሳ ጉጃና ማላ፥ ኪታንቻዉ ዳሮ እጻናይ እመቴዳ።
4 እጻና ጩዋይ ጌሻቱዋ ዎሳና እትፐ ሄ ኪታንቻ ኩሽያፐ ፑደ ጾሳኮ ቤዳ።
5 ሄዋፐ ጉይያን፥ ኪታንቻይ እጻና ጩዋይያዋ አኪደ፥ ያርሽያ ሳፐ ታማ ቦንቁዋ አኪደ፥ አን ኩንꬄዳ። ሄ እጻና ጩዋይያዋ ዱገ ሳኣ ኦልና፥ ጉጉንꬃይ ጉሜዳ። ዋልቃንꬃይ ዎልቃሜዳ፤ ቃይ ቢታይካ ቃጼዳ።
ማላካታቱ ፑነቴድኖ
6 ቃይ ላፑ ማላካታ ኦይቂደ ላፑ ኪታንቻቱ ማላካታ ፑናናዉ ጊጌድኖ።
7 ኮይሮ ኪታንቻይ ባረ ማላካታ ፑንና ሱꬃና ዋላከቴዳ ሻቻይነ ታማይ ሳኣን ቡኬዳ። ሳኣፐ ሄዘንꬆ ኩሺ ጉደቴዳ፤ ምꬃፐካ ሄዘንꬆ ኩሺ ጉደቴዳ፤ ማታ ኡባይካ ጉደቴዳ።
8 ላኤንꬆ ኪታንቻይካ ባረ ማላካታ ፑኔዳ። ዎልቃማ ደርያ ማላትያባይ ታማን ኤጺደ፥ አባን የገቴዳ፤ ያትና፥ አባፐ ሄዘንꬆ ኩሺ ሱꬃ ግዴዳ።
9 አባን ደኡዋን ደእያ መታቱዋ ሄዘንꬆ ኩሺ ሀይቄዳ፤ ማርካበቱዋፐካ ሄዘንꬆ ኩሺ ꬋዬዳ።
10 ሄዘንꬆ ኪታንቻይ ባረ ማላካታ ፑንና ሻፋፐነ ፑልቱዋ ሃꬃፐ ሄዘንꬆ ኩሽያ ቦላ ሳሉዋፐ ጾምፕያዳን ኤጽያ ዎልቃማ ጾልንቲ ዎꬌዳ።
11 ሄ ጾልንትያ ሱንꬃይ ጫሙዋ ጌተቴ። ሃꬃፐ ሄዘንꬆ ኩሺ ጫሜዳ፤ ቃይ ሃꬃይ ጫሜዳ ድራዉ፥ ዳሮ አሳይ ሄ ሃꬃ ኡሺደ ሀይቄዳ።
12 ኦይደንꬆ ኪታንቻይ ባረ ማላካታ ፑኔዳ። አዋፐ፥ አገናፐነ ጾልንትያፐ ሄዘንꬆ ኩሺ ደሸቴዳ፤ ኡንቱንቱ ፖኡዋፐካ ሄዘንꬆ ኩሺ ꬉሜዳ። ሄዋ ድራዉ፥ ጋላሳፐ ሄዘንꬆ ኩሺ፥ ቃማፐካ ሄዘንꬆ ኩሺ ꬉሜዳ።
13 እት አርጋንꬃይ ሳሉዋን ፓልያዋ ታን በኣድ። ሄ አርጋንꬃይ ባረ ቃላ ꬎቁ ኦꬂደ፥ “ሄዙ ኪታንቻቱ ፑናና በስያ የኮ ማላካታይ ፑነትያ ዎደ፥ ሳኣን ደእያ አሳዉ አዬሮ! አዬሮ! አዬሮ!” ያግያዋ ስሳድ።