49
Yaak'oobi Bare Naanaa Anjjeedda
1 Hewaappe guyye, Yaak'oobi bare attuma naanaa s'eesissiide hawaadan yaageedda; «Sintsappe hinttenttoo hananabaa taani hinttenttoo odana mala shiik'ite.»
2 «Hinttenttoo Yaak'ooba naanaatoo,
ittippe shiik'iide sisite;
hinttenttu aawuu Israa'eelii hinttenttoo odiyaawaa hayzitte.
3 «Roobeelaa, ta bayira na'aw,
neeni ta wolk'k'aa;
ta minotetsaw koyruwaa.
Neeni bonchchuwaankka wolk'k'ankka ubbaappe aad'd'iyaawaa.
4 Neeni di'uwaa mala; ek'k'osa'an de'akka;
neeni ubbaappe aad'd'iyaawaa gidakka.
Ayaw gooppe, neeni ne aawuwaa gisuwaa kesaadda;
ne aawuwaa gisuwaa tunissaadda.
5 «Simooninne Leewii ishatuwaa;
unttunttu mashshay makkalatetsaw olaa miishshaa.
6 Taani unttunttu zoretan gelikke;
taani unttunttu shiik'uwaankka uttikke;
ayaw gooppe, unttunttu barenttu hank'k'uwaan
asaa wod'eeddino barena akka akka giina,
booratuwaa k'ans's'eeddino.
7 Unttunttu suulo hank'k'uu
unttunttu mek'etsaa iitatetsaynne shek'etteeddawaa gido!
Taani unttuntta Yaak'ooba asaa gidduwaan laalana;
Israa'eeliyaa biittaan tiskki ootsana.
8 «Yihudaw, ne ishatuu neena galatana.
Ne kushii ne morkkatuwaa pillanttiyaa oyk'k'ana.
Ne aawuwaa naanay new hokkiide goynnana.
9 Yihudaw, neeni wodalla gaammo.
Ta na'aw, neeni shankkaappe wod'i simmiide,
c'ogottiide giseedda gaammuwaa mala.
Neeni asaa bosheretsanaw koyenna mac'c'a gaammatti mala.
10 Ayissiyaawe yaana gakkanaw,
Kawutetsaa s'am"ay Yihudaappe,
deriyaa ayissiyaawanttu gatimay Aa gediyaa giddoppe shaakettenna.
K'ay deriyaa Asay aw azazettana.
11 I bare hariyaa woyniyaa anuwaan,
bare hare maraa muruta woyniyaa turaan k'achchana.
I bare afilaa woyniyaa eessan,
bare mayuwaa suutsaa malatiyaa woyniyaa eessan meec'c'ana.
12 Aa ayfii woyniyaa eessaappe aad'd'i zo"ana;
Aa achchaykka maatsaappe aad'd'i boos's'ana.
13 «Zaabiloone abbaa doonaan de'ana;
I abbaa doonaan markkabatuu ek'k'iyaa sa'aa gidana;
Aa zaway Sidoona gakkanawaa.
14 «Yisaakoore mino hariyaa;
c'aaniyaa laa"u doonniyatuwaa gidduwaan gis bashee
15 I bare shemppiyaasaa lo"a gidiyaawaanne
bare biittay nashechiyaawaa gidiyaawaa be'iyaa wode,
c'aanaa tookkanaw bare hashiyaa hokisiide,
ayiletetsaa oosuwaa ootsana.
16 «Daani israa'eeliyaa zaratuwaappe
ittuwaa gideedda bare asaa bolla daannatanawaa.
17 Daani ogiyaa doonaan de'iyaa shooshshaa;
Paraa toggeeddawe guyye kunddana mala
paraa ginddiyaa dukkiyaa,
ogiyaan de'iyaa hasuwaa.
18 Abeet Med'inaa Godaw, taani neeni ashshanaadan naagay.
19 Gaadi bonk'k'iyaawanttun deshettanawaa;
Shin ikka unttunttu k'atamaa kaalliide
unttuntta bonk'k'anawaa.
20 Aaseera ukitsay ordduwaa;
kaatiyaw I lo"o k'umaa immana.
21 Nifttaaleeme k'ashettennan yeda de'iyaa,
lo"o maratuwaa yeliyaa gen"iyaa.
22 Yooseefo ayfiyaana yonddodeedda woyniyaa turaa.
I pulttuwaa matan yonddodda ayfiyaana de'iyaa,
daashshaykka godaappe bollaanna zaa'iyaa woyniyaa turaa.
23 Wonddaafiyaa dukkiyaawanttu
Aa bolla dooddeeddino;
barenttu wonddaafiyaankka,
dukkeeddinonne mayttiseeddino.
24 Aa wonddaafii min utteedda;
Aa wolk'k'aykka minniide gam"eedda.
Hewekka Yaak'ooba S'oossaa Wolk'k'aama kushiyaa gaasuwaana,
ne hentsanchchaa, Israa'eeliyaa Zaallaa gaasuwaana,
25 Neena maaddiyaa ne aawotuwaa S'oossaa gaasuwaaninne,
neena bolla saluwaa anjjuwaan,
garssa c'iimmaa anjjuwaan, d'antsaa anjjuwaaninne
yeliyaa uluwaa anjjuwaan anjjiyaa,
Ubbaa Danddayiyaa S'oossaa gaasuwaana.
26 Ne aawuwaa anjjuu beni deretuwaa anjjuwaappekka
med'inaappe de'iyaa anjjuwaappekka aad'd'ee.
Hawe ubbay Yooseefo huup'iyaan,
bare ishatuwaa gidduwaan kaappuwaa gidiyaawaa liip'iyaan shemppo.
27 Biiniyaame bonk'k'iyaa walliyaa.
Bare shankkateeddawaa wontta mee;
bare omoodeeddawaa omarssi shaakkee» yaageedda.
28 Hawanttu tammanne laa"u israa'eeliyaa zaratuwaa; k'ay unttunttu aawuu unttuntta huup'iyaan huup'iyaan unttunttoo bessiyaa anjjuwaa anjjiidde unttunttoo geeddawe hawaa.
Yaak'ooba Hayk'k'uwaa
29 Hewaappe guyye, I unttuntta hawaadan yaagiide azazeedda; «Taani ta mayza asatuwaan gakettanaw hanay; taana Hiitiyaa Efiroona gaden de'iyaa gonggoluwaan, ta aawotuwaana moogite.
30 Hewekka Kanaane biittaan, Mamire matan de'iyaa, Maakip'eela giyaa gonggoluwaa; hewe Abrahaame Hiitiyaa Efiroonappe Aa gadiyaanna shammeedda gonggoluwaa.
31 Abrahaamenne Aa machata Saara yan moogetteeddino; Yisaak'inne Aa machata Ribik'a yan moogetteeddino; taani k'ay Liyo yan moogaad.
32 He gadiinne an de'iyaa gonggoluu Hiitetuwaappe shametteeddawaa» yaageedda.
33 Yaak'oobi bare naanaw azazuwaa wursseedda wode, bare gediyaa pude bare hiis'aw shiishshi akkiidde, hayk'k'i aggeeda; bare mayzzan gaketeedda.