26
S'oossay Bare Asaw S'oonuwaa Immana
1 He gallassi Yihudaa gadiyaan ha yetsay yes'ettana.
Nuw mino katamay de'ee;
S'oossay atotetsaa Aa yuushshuwaan gimbbiyaadaaninne geessuwaadan essee.
2 Ammanuwaa naagiyaa s'illo kawutetsay gelana mala,
penggiyaa dooyite.
3 Bare k'ofaa neenan wotseedda asaa
neeni polo sarotetsaan naagaasa;
Ayaw gooppe, I neenan ammanettee.
4 Med'inaa Godaan med'inaw ammanetitte;
ayaw gooppe, Med'inaa Goday, Med'inaa Goday med'inaa Zaallaa.
5 D'ok'k'an de'iyaawanttanne,
unttunttu d'ok'k'a katamaa zik'k'i ootseedda;
I Aa kawushshee.
Duge sa'aa gakkanaw zik'k'i ootsee;
biittaa baanan olee.
6 Mank'k'uwaa gedii, metootanchchaa gedii, Aa yed'd'ana.
7 S'illotuwaa ogii salalaa.
Abeet S'illoo, neeni
s'illotuwaa ogiyaa salallissaasa.
8 Ee Med'inaa Godaw, ne higgiyaa ogiyaan hamettiidde,
nuuni neena naageetto.
Nu wozanaa amuu,
ne suntsaa bonchchanawaa s'alalaa.
9 K'amman taani neena laamotay;
Wonttan ta giddon de'iyaa ta ayyaanay,
tumuwaappe neena minisiide koyee.
Ayaw gooppe, ne pirdday sa'aan de'iyaa wode,
sa'aan de'iyaa Asay s'illotetsaa tamaaree.
10 Iita asaw keekatetsaa ootsooppekka,
I s'illotetsaa tamaarenna.
Suure asatuwaa gadiyaan iitabaa ootsee;
Med'inaa Godaa gitatetsaakka erenna.
11 Abeet Med'inaa Godaw, neeni,
ne kushiyaa d'ok'k'u ootsaadda;
Shin unttunttu be'ikkino.
Ne asaw neeni mishettiyaa mishuwaa be'iide yeellatino.
Neeni ne morkketoo wotseedda tamay,
unttuntta mi d'ayisso.
12 Abeet S'oossaw, neeni,
nuw sarotetsaa mintsaadda;
Nu ooso ubbaa neeni nuw ootsaadda.
13 Abeet Med'inaa Godaw, nu S'oossaw,
neeppe haratuu nuuna mooddeeddino;
Shin nuuni ne suntsaa s'alalaa bonchcheetto.
14 Unttunttu hayk'k'eeddino;
simmiide pas'a de'ikkino.
Neeni d'ayisseedda diraw,
simmiide denddikkino.
Unttunttu hassayettiyaawaa ubbaa k'uc'c'a d'ayissaadda.
15 Abeet Med'inaa Godaw!
Neeni asaa darissaadda.
Asaa darissaade, neeni bonchchettaadda;
biittaa zawaa ubbaakka aassaada.
16 Abeet Med'inaa Godaw!
Metuwaa wode unttunttu neena koyeeddino.
Neeni unttuntta mureedda wode,
unttunttu neena saasukki woosseeddino.
17 Abeet Med'inaa Godaw! Shahaareedda mishiratta,
yeliyaa wodii gakkina,
Yeluwaa un"ettaade waassiyaawaadan,
Nuunikka ne sintsan hewaadan haneeddo.
18 Nuuni shahaareeddo; oytsaa oyk'k'eteeddo;
Shin c'arkkuwaa yeliyaawaa gideeddo.
Nuuni sa'aw atotetsaa ahibeykko;
sa'aan de'iyaa asaakka yelibookko.
19 Hayk'k'eedda ne Asay pas'ana;
unttunttu anhay denddana.
Hinttenoo, biittaa baanaa giddon de'iyaawanttoo,
hintte s'aasay wontta ketterssaa mala gidiyaa gishshawunne,
sa'aykka hayk'k'eeddawantta zaaretsiide immiyaa diraw,
Beegottitenne nashshechchaw yes's'ite.
Pirddaanne Omooduwaappe Simmiyaawaa
20 Ta asatoo, haa yiite; hintte golle geliide, penggiyaa hintte bolla gorddite. S'oossaa hank'k'uu aad'd'ana gakkanaw, guutsaa wodiyaa hinttena k'osite.
21 Biittaa bollan de'iyaa asaa, unttunttu nagaraa diraw murana, Med'inaa Goday bare de'iyaasaappe kesiide yee. Biittaykka bare bollan gukkeedda suutsaa k'onc'c'issana; wod'eeddawanttakka laa"entso gentsenna.