Payduwaa Mas'aafaa
Geluwaa
Payduwaa geetetteedda ha mas'aafay, Israa'eeliyaa asaa yaratuwaa Muse paydeeddawaa bessiyaa diraassa. Siina Deriyaappe denddeedda wodiyaappe doommiide, S'oossay unttunttoo immana geedda, hidootaa biittaw away wulliyaa bagga zawaa gakkana gakkanaw, oytamu laytsaa unttunttu de'eedda taarikiyaa odee. Mas'aafaa suntsay, giddon de'iyaa taariketuwaappe dariyaa kifiliyaa besse. Hewenne Israa'eeliyaa Asay Siina Deriyaappe denddiide baanaappe kasetiide, k'ay itti yeletaappe simmina Yorddaanoosa Shaafaappe away doliyaa baggana Moo'aaben, Muse asaa paydeedda payduwaabaa besse. Laa"u paydatuwaappe gidduwaan de'iyaa wodetuwaan Israa'eeliyaa Asay Kanaanew gedissa bagga zawaa gidiyaa K'aadeesa-Barnne gakki utteedda. Gidooppenne unttunttu hewaana hidootaa biittaa gelanaw danddayibeykkino. Hewaa diraw, unttunttu hewaa heeraan daro laytsaa aatsiide, guyyeppe Yorddaanoosa Shaafaappe away doliyaa baggana de'iyaa biittaa beeddino. Unttunttuppe baggay yan de'anaw k'ofaa k'achchina, atteeda Asay Yorddaanoosa pinniide, Kanaane baanaw barena giigisseedda.
Payduwaabay daro metuu gakkiyaa wode yayyiyaanne hidootaa k'ans's'iyaa asatuu taarikiyaa, S'oossaa bollanne unttuntta kaaletsana mala S'oossay unttunttoo dooreedda Muse bolla makkaliide denddeedda asatuu taarikiyaa oyk'k'eeddawaa. Asay daaburanchchanne d'iba gidooppenne S'oossay unttunttoo ammanettiyaawaa gidiide, unttuntta kabboyiide wotseeddawaa taarikii odee. Hewaadankka Muse itti ittooden genc'c'aa d'ayooppe, aw mino ammanuu de'iyaawe S'oossawunne asaw ammanettiide ootseedda asaa I gidiyaawe beetteedda.
Shemppatuwaa Ubbatoo Imetteedda K'antsa K'ofatuwaa
Israa'eelatuu Siina Deriyaappe Baanaw Giigussaa 1:1—9:23
Aa Koyro Asaa Payduwaa 1:1—4:49
Duma Duma Higgiyaanne Wogaa 5:1—8:26
Laa"entso Paasigaa 9:1-23
Siina Deriyaappe Moo'aabe Buussaa 10:1—21:35
Moo'aaben Ooseteedda Hanotatuwaa 22:1—32:42
Gibs'eppe Moo'aaba Gakkanaw de'iyaa Hamesay K'antsaan 33:1-49
Yorddaanoosa Pinanappe kaseti Imetteedda Azazuwaa 33:50—36:13
Israa'eelatuu Siina Deriyaappe Baanaw Giigussaa
1
(1:1—9:23)
Koyro Israa'eeliyaa Asaa Payduwaabaa
(1:1—4:49)
1 Siinaa Mela Biittaa, Med'inaa Godaa Dunkkaaniyaa giddon, Israa'eeliyaa Asay Gibs'e gadiyaappe keseedda laa"entso laytsan, laa"entso aginaan, he aginaw koyiro gallassan, Med'inaa Goday Musa hawaadan yaageedda;
2 «Israa'eeliyaa asaa ubbaa unttunttu yaran yaraaninne golliyaan golliyaan paydaade, attuma asaa unttunttu suntsan suntsan s'aafa.
3 Neeninne Aarooni yelettoodeppe laatamu laytsanne hewaappe bollana de'iyaa Israa'eelatuwaa, olaa baanaw danddayiyaawantta ubbatuwaa, unttunttu c'itan c'itan paydite.
4 Zariyaappe zariyaappe itti itti Asay bare golliyaa asaw kaappuwaa gidiide, hinttena maaddo.
5 Hinttena maaddana asatuu suntsay hawaappe kaalliide de'iyaawaa:
Zariyaa Golliyaa Asaa Kaappuwaa
Roobeela Shade'uura na'aa Eliis'uura,
6 Simoona S'uriishadaaya na'aa Shalumi'eela,
7 Yihudaa Aminaadaaba na'aa Na'asoona,
8 Yisaakoora S'u'aara na'aa Nataani'eela,
9 Zaabiloona Heloona na'aa Eli'aaba,
10 Yooseefo naanaappe Efireema Amihuuda na'aa Elishamaa'a,
Minaase Padaas'uura na'aa Gamaali'eela,
11 Biiniyaama Giidi'oona na'aa Abidaana,
12 Daanappe Amishadaaya na'aa Ahi'eezera,
13 Aaseera Okiraana na'aa Paagi'eela,
14 Gaada Da'u'eela na'aa Eliyasaafa,
15 Nifttaaleema Enaana na'aa Ahiraa'a;
16 Ha asatuu barenttu aawotuwaa golliyaa asatuwaappe kaaletsanaw dooretteeddawantta; unttunttu Israa'eeliyaa yaratoo kaappatuwaa» yaageedda.
17 Musenne Aarooni suntsay s'eesetteedda ha asatuwaa afeedino.
18 Laa"entsa aginaan koyiro gallassi kumentsaa maabaraa s'eesiide, ittippe shiishsheeddino. Asay bare yaran yaraaninne bare golliyaan golliyaan odiide, yelettoodeppe laatamu laytsanne hewaappe bollana de'iyaa attuma asatuwaa ubbaa suntsay ubbaanna s'aafetteedda.
19 Med'inaa Goday Aa azazeeddawaadan, Muse unttuntta Siinaa mela biittaan paydeedda.
20-21 Olaw baanaw danddayiyaa attuma asatuu ubbay, laatamu laytsanne hewaappe bollana de'iyaawanttu paydetiide, huup'iyaan huup'iyaan s'aafetteeddino. Unttunttu barenttu yaran yaraaninne barenttu golliyaan golliyaan shaakettiide, hawaappe kaalliide de'iyaa payduwaan mazggobetteeddino.
Zariyaa Olanchchatuwaa Payduwaa;
Roobeela (Israa'eeliyaa na'aa bayiraa) 46,500;
22-23 Simoona 59,300;
24-25 Gaada 45,650;
26-27 Yihudaa 74,600;
28-29 Yisaakoora 54,400;
30-31 Zaabiloona 57,400;
32-33 Yooseefo na'aa Efireema 40,500;
34-35 Yooseefo na'aa Minaasa 32,200;
36-37 Biiniyaama 35,400;
38-39 Daana 62,700;
40-41 Aaseera 41,500;
42-43 Nifttaaleema 53,400;
44 Muse, Aarooninne tammanne laa"u Israa'eeliyaa zaratuu kaappatuu paydeedda Asay hawaa.
45 Olaw baanaw danddayiyaa attuma asatuu ubbay laatamu laytsanne hewaappe bollana de'iyaawanttu barenttu aawuwaa golliyaan golliyaan paydeteeddino.
46 Hewanttu ubbaanna 603,550.
47 Shin Leewiyaa zaratuu ha paydeteedda asaana paydettibeykkino.
48 Ayaw gooppe, Med'inaa Goday Musa hawaadan yaageedda;
49 «Leewiyaa zaratuwaa paydoppa; unttuntta atteeda Israa'eelatuwaa payduwaan yeggoppa.
50 Leewatuwaa S'oossaa Dunkkaaniyaa bollaninne Aa giddon de'iyaa miishshatuwaa ubbaa bollan kaappuwaa ootsaade suntsaa. Unttunttu he Dunkkaaniyaanne Aa giddon de'iyaa miishshata tookkino; unttunttu Aa giddon ootsinonne Aa yuushshuwaan dunkkaanino.
51 S'oossaa Dunkkaanii shodettiyaa wode Leewatuu shoddino; S'oossaa Dunkkaanii ek'k'iyaa wodekka Leewatuu essino. Unttunttuppe haray ooninne aakko shiik'ooppe, hayk'k'o.
52 Israa'eeliyaa asatuu ubbay barenttu armman armmaaninne barenttu c'itan c'itan shaakettiide, barenttu dunkkaaniyaa dunkkaanino.
53 Shin S'oossaa hank'k'uu Israa'eeliyaa maabaraa bolla wod'd'enna mala, Leewatuu S'oossaa Markkatetsaa Dunkkaaniyaa yuushshuwaan barenttu dunkkaaniyaa dunkkaanino; Leewatuu S'oossaa Dunkkaaniyaan aawotino» yaageedda.
54 Israa'eelatuu hawaa ubbaa Med'inaa Goday Musa azazeeddawaadan ootseeddino.