23
1 Balaami Baalaak'a, «Hawaan neeni taw laappun yarshshiyaa sa'aa gimbba; k'ay laappun korumaa booraanne laappun dorssaa orggetuwaa neeni taw giigissa» yaageedda.
2 Balaami geeddawaadan Baalaak'i ootseedda; unttunttu laa"uukka itti itti yarshshiyaa sa'aan itti korumaa booraanne itti dorssaa orggiyaa yarshsheeddino.
3 Hewaappe guyyiyaan, Balaami Baalaak'a, «Neeni ne s'uuggiyaa yarshshuwaa matan hawaan ek'k'ashsha; taani gedekko bay. Med'inaa Goday taananna gakkettanaw hak'eti yeennan aggena. I taw k'onc'c'issiyaawaa ayaanne taani new odana» yaageedda. D'ok'k'a zoozetiyaa mela sa'aa keseedda.
4 Hewaan S'oossay Balaamana gakettina Balaami, «Taani laappun yarshshiyaa sa'aa giigissaad; itti itti yarshshiyaa sa'aan itti korumaa booraanne itti dorssaa orggiyaa yarshshaad» yaageedda.
5 Balaami gaanabaa Med'inaa Goday aw odiidde, «Neeni Baalaak'akko simmaade, aw ha timbbitiyaa oda» yaageedda.
6 I Baalaak'akko simmiyaa wode, Baalaak'i Moo'aaba kaappatuu ubbaanna bare s'uuggiyaa yarshshuwaa matan ek'k'eedda.
7 Hewaappe guyyiyaan, Balaami bare timbbitiyaa hawaadan yaagiide odeedda;
«Moo'aaba kaatii Baalaak'i away doliyaa bagga deretuwaappe,
Sooriyaa gadiyaappe taana hawaadan yaagiide aheedda;
‹Haaya; Yaak'ooba taw shek'k'a!
Israa'eeliyaa asaa, «Wurite!» yaaga› yaageedda.
8 S'oossay shek'k'ibeenawantta taani waata shek'k'oo?
Med'inaa Goday, ‹Wurite!› yaagibeennawantta,
taani waataade, ‹Wurite!› yaagoo?
9 Taani d'ok'k'a zaallaa huup'iyaan ek'k'aade unttuntta s'eellay;
zooziyaan ek'k'aade taani unttuntta be'ay.
Unttunttu barekka de'iyaa asaa;
unttunttu barena kawutetsatuwaappe ittuwaadan paydikkino.
10 Baanaadan c'oratteedda Yaak'ooba zeretsaa ooni
paydanaw danddayii?
Haray atto Israa'eeliyaa asaw oyddentso kushiyaa ooni
paydanaw danddayii?
Ta hayk'k'uu s'illotuwaa hayk'uwaa mala gido;
ta de'uwaa wurssetsaykka unttunttuwaadan hano!» yaageedda.
11 Baalaak'i Balaama, «Neeni ta bolla ootsiyaabay ayee? Taani neena ta morkkatuwaa shek'k'anaadan ahaad; shin neeni unttuntta anjjaaddappe attina, harabaa ayinne ootsabaakka!» yaageedda.
12 Balaami zaariide, «Taani Med'inaa Goday taana haasayissiyaawaappe haraa haasayooyye?» yaageedda.
Balaama Laa"entso Timbbitiyaa
13 Hewaappe guyyiyaan, Baalaak'i Aa, «Unttunttu neeni be'anaw danddayiyaa harasaa taananna dendda. Neeni unttunttuppe amareedawaa be'anaappe attina, unttuntta ubbaa be'akka. Neeni hewan taw unttuntta shek'k'aarikkii» yaageedda.
14 Pisgga giyaa deriyaa huup'iyaan de'iyaa S'ofiima dembbaa akkiide afeeda. Hewaan laappun yarshshiyaa sa'aa gimbbeedda; itti itti yarshshiyaa sa'aan itti korumaa booraanne itti dorssaa orggiyaa yarshsheedda.
15 Balaami Baalaak'a, «Taani hinina S'oossaanna gaketiyaa wode, neeni hawaan ne s'uuggiyaa yarshshuwaa matan ek'k'ashsha» yaageedda.
16 Med'inaa Goday Balaamana gakettiide kiittiidde, «Neeni Baalaak'akko simmaade, aw ha timbbitiyaa oda» yaageedda.
17 I aakko simmiide, bare s'uuggiyaa yarshshuwaa matan Moo'aaba biittaa kaappatunna ek'k'eeddawaa demmeedda. Baalaak'i Aa, «Med'inaa Goday odiyaabay ayee?» yaageedda.
18 Balaami bare timbbitiyaa hawaadan yaagiide odeedda;
«S'ippoora na'aa Baalaak'aa dendda sisa;
taani odiyaawaa sisa!
19 S'oossay worddotanaw asaa gidenna;
bare k'ofaa laammanaw I asaa na'aa gidenna.
I odiidde, bare odeeddawaa ootsenee?
Woy I bare geeddawaa polennee?
20 Taani anjjanaw azazuwaa akkaad.
I anjji kichcheedda;
taani hewaa laammanaw danddaykke.
21 Yaak'ooba zariyaw iitabay yaanabay,
Israa'eeliyaa asaw metuu gakkanabay taw beettibeenna.
Med'inaa Goday unttunttu S'oossay unttunttunna de'ee;
I unttunttoo kaatiyaa gidiyaawaa awaayiino.
22 S'oossay unttuntta Gibs'eppe kesseedda;
I mino mentsaadan unttunttoo de'ee.
23 Yaak'ooba bolla gakkana bitay baawa;
Israa'eeliyaa asaa k'ohana murunuukka baawa.
Asay ha"i, ‹Yaak'oobawunne Israa'eelaw S'oossay ootseeddawaa be'ite› yaagana.
24 Ha Asay mac'c'a gaammattidan denddeedda.
Bare oyk'k'eeddawaa maana gakkanawunne,
bare wod'eeddawaa suutsaa ushana gakkanaw,
Shemppenna gaammuwaadan unttunttu ek'k'i denddino» yaageedda.
25 Hewaappe guyyiyaan, Baalaak'i Balaama, «Neeni unttuntta mulekka shek'k'oppanne mulekka anjjoppa» yaageedda.
26 Balaami zaariide, «Med'inaa Goday giyaawaa ubbaa ootsana gaade taani new odabeykkitaa?» yaageedda.
Balaama Heezzentso Timbbitiyaa
27 Hewaappe guyyiyaan, Baalaak'i Balaama, «Haaya; taani neena harasaa afana. Ooni erii, neena yaa afina S'oossay nashettiide, neena unttuntta taw shek'isanentto» yaageedda.
28 Baalaak'i Balaama mela biittaa bollana duge s'eelliyaa Pa'oora Deriyaa huup'iyaa afeeda.
29 Balaami, «Neeni hawaan taw laappun yarshshiyaa sa'aa gimbba; k'ay laappun korumaa booratuwaanne laappun dorssaa orggetuwaa taw giigissa» yaageedda.
30 Balaami geeddawaadan Baalaak'i ootseedda; itti itti yarshshiyaa sa'aan itti korumaa booraanne itti dorssaa orggiyaa yarshsheedda.