34
Israa'eeliyaa Biittaa Zawaa
1 Med'inaa Goday Musa hawaadan yaageedda;
2 «Neeni Israa'eelatuwaa hawaadan yaagaade azaza; ‹Laataadan hinttena gakkiyaa Kanaane biittaa zaway hawaa.
3 Gedissa baggana hintte zaway S'iina mela biittaanne Eedooma zawaa gidanawaa. Away doliyaa baggana hintte gedissa zaway Mas'iniyaa Abbaa gedissappe doommee;
4 Ak'irabiima pudetsaanna gedissa baggana simmiide, S'iina mela biittaa aad'd'iidde, K'aadeesa-Barnne gedissa gakkee; hewaappe Hadaari-Adaara aad'd'iidde, As'imoona gakkee.
5 As'imoonappe Gibs'e Shaafaakko simmiide, Meediteraane Abbaa gakkee.
6 « ‹Away wulliyaa baggana hintte zaway Meediteraane Abbaa gas'aa gidanawaa.
7 « ‹Huup'issa baggana hintte zaway Meediteraane Abbaappe Hoora Deriyaa sitti ootsi biide,
8 Hoora Deriyaappe Leebo-Hamaata Pinuwaa gakkanaassa; hewaappe S'adaadan zawatee.
9 K'ay Zifirooneppe biide, Has'aari-Enaana gakkee. Huup'issa baggana hintte zaway hawaa gidanawaa.
10 « ‹Away doliyaa baggana hintte zaway Has'aari-Enaanappe Shafaama gakkanaw sitti ootsi biide,
11 Shafaamappe biide, Ayinappe away doliyaa baggana de'iyaa Ribila wod'd'iide, Galiilaa Abbaappe away doliyaa baggana de'iyaa deriyaa gakkee.
12 Hewaappe duge Yorddaanoosa Shaafaa wod'd'i zawatiide, Mas'iniyaa Abbaa gakkee. Hintte biittaa zaway ubbaa bagganakka hawaa› yaaga» yaageedda.
13 Muse Israa'eelatuwaa hawaadan yaagiide azazeedda; «Es's'aa yeggiide, hintte laattana mala, udduppun zaretoonne bagga zaretoo he biittay imettanaadan Med'inaa Goday azazeedda.
14-15 Ayaw gooppe, Roobeela zaratuu Gaada zaratuunne, Minaase zaratuwaappe baggay barenttu laataa Iyaarikko hefintsan Yorddaanoosa Shaafaappe away doliyaa baggana akkeeddino» yaageedda.
16 Med'inaa Goday Musa hawaadan yaageedda;
17 «He biittaa hinttenttoo laata ootsiide, shaakki immana asatuu suntsay hawaa; k'eesiyaa El"aazaranne Neewe na'aa Iyaasa.
18 K'ay biittaa shaakkanaw maaddana mala, zare ubbaappe itti itti kaappuwaa suntsite.
19 Unttunttu suntsay hawaappe kaalliide de'iyaawaa.
Zariyaa Kaappuwaa
Yihudaa Yifune na'aa Kaaleeba;
20 Simoona Amihuuda na'aa Shalumi'eela;
21 Biiniyaama Kisiloona na'aa Elddaada;
22 Daana Yoogila na'aa Buuk'a;
23 Yooseefo na'aa Minaase Efooda na'aa Hani'eela;
24 Yooseefo na'aa Efireema Shifs's'aana na'aa K'amu'eela;
25 Zaabiloona Parnnaaka na'aa Els's'aafaana;
26 Yisaakoora Azzaana na'aa Pals's'i'eela;
27 Aaseera Shalooma na'aa Ahihuuda;
28 Nifttaaleema Amihuuda na'aa Padaahi'eela;
29 Kanaane gadiyaan Israa'eelatoo laataa shaakki immana mala, Med'inaa Goday azazeedda asatuu hawantta» yaageedda.