119
S'oossaa Higgiyaw Imetteedda Sabaa
Alef
1 Barenttu ogiyaan tooshii bayinnawanttunne,
Med'inaa Godaa higgiyaadan hamettiyaawanttu,
anjjetteedawantta.
2 I odeeddawaa ootsiyaawanttunne
barenttu kumentsaa wozanaappe Aa siik'iyaawanttu,
anjjetteeddawantta.
3 Unttunttu balabaa ootsikkino;
S'oossaa ogiyaan hamettiino.
4 Ne wogaw ammanettiide naagana mala,
neeni nuuna azazaadda.
5 Ne awaayoo azazettiyaawan
ta ogii minnanaadan amottay.
6 Yaatooppe, ne azazuwaa ubbaa hayzzaadde,
taani ubbakka yeellatikke.
7 Ne s'illo pirddaa tamaaraade,
taani neena suure wozanaappe galatana.
8 Taani ne awaayuwaadan ootsana;
taana ubbakka yeggoppa.
Beet
9 Yalagay bare ogiyaa geeshsha ootsiide
wooti naaganaw danddayii?
Ne k'aalay giyaawaadan de'ooppe danddayee.
10 Taani ta polo wozanaappe neena koyay;
ne azazotuwaappe wora hamettennaadan taana naaga.
11 Taani neena naak'k'ennaadan
ne k'aalaa ta wozanaan wotsaad.
12 Abeet Med'inaa Godaw, neeni galatetta!
Ne awaayuwaa taana tamaarissa.
13 Ne doonaappe keseedda pirddaa ubbaa,
taani ta ins's'arssan oday.
14 Duretetsan nashettiyaawaadan,
taani neeni odeedda k'aalan nashetay.
15 Ne wogatuwaa zaara zaaraadde k'oppaynne
ne ogiyaa loytsa akeekay.
16 Taani ne awaayuwaan nashetay;
ne k'aalaakka taani dogikke.
Gaameel
17 Taani pas'a de'ana malanne
ne k'aalaw azazettana mala,
taw ne k'oomaw keekabaa ootsa.
18 Ne higgiyaa giddon de'iyaa malalissiyaa tumatetsaa,
taani be'ana mala, ta ayifiyaa dooyaa.
19 Taani ha sa'aan imatsaa;
ne azazotuwaa taappe gentsoppa.
20 Taani ubbaa wode,
ne pirddaa loytsa laamotay.
21 Otorettiyaawanttu, shek'k'etteeddawantta,
ne azazuwaappe wora hamettiyaawantta,
neeni seeraasa.
22 Taani neeni odeeddawaa ootseedda diraw,
unttunttu boriyaanne unttunttu kad'iyaa ta bollaappe digga.
23 Haray atto kaappatuu shiik'iide,
ta bolla mak'ettooppekka,
taani, ne k'oomay, ne awaayuwaa zaara zaaraadde k'oppana.
24 Neeni odeedda k'aalatuu taana nashechchiino;
unttunttu taana zoriino.
Daalees'i
25 Taani hayk'k'ana hanay;
neeni geedda k'aalaadan ta shemppuwaa ashsha.
26 Taani ta ogiyaawaa new odina,
neeni taana sisaadda;
simmi, ne awaayuwaa taana tamaarissa.
27 Ne wogaa ogiyaa taana akeekissa;
malalissiyaa ne oosuwaa
taani zaara zaaraadekka k'oppana.
28 Kayyuu dareeddawaan ta shemppuu daabureedda;
neeni geedda k'aalaadan taana minisa.
29 Worddo ogiyaa taappe haassa;
ne aad'd'o keekkatetsan ne higgiyaa taana tamaarissa.
30 Tumuwaa ogiyaa dooraad;
ne pirddaa hayzzaad.
31 Abeet Med'inaa Godaw, taani
neeni odeeddawaa minisa oyk'k'aad;
simmi taana yeellayoppa!
32 Neeni ta wozanaa la"a keseedda diraw,
taani ne azazuwaa ogiyaan wos's'ay.
He
33 Abeet Med'inaa Godaw, ne awaayuwaa biletsaa
taana tamaarissa;
taani wurssetsay gakkanaw Aa naagana.
34 Taani ne higgiyaa naagana malanne
ta kumentsaa wozanaappe taani aw azazettana mala,
neeni taw akeekaa imma.
35 Ne azazuwaa ogiyaan taana kaaletsa;
ayaw gooppe, taani an nashetay.
36 Ta wozanaa amuwaakko gidennaan,
neeni odeedda k'aalaakko zaara.
37 Patsennabaa s'eellenna mala,
ta ayifetuwaa te"a;
ne ogiyaan ta de'uwaa ooratsa.
38 Neeni yayetana mala,
neeni gelo k'aalaa taw,
ne k'oomaw pola.
39 Yashshiyaa boriyaa taappe digga.
Ne pirdday ay mala lo"ee!
40 Taani ne wogaa naaganaw amottay;
neeni s'illuwaa gidiyaa diraw,
ta de'uwaa ooratsa.
Waw
41 Abeet Med'inaa Godaw, aggena ne siik'uwaa taana bessa;
neeni geedda k'aalaadan taana ashsha.
42 Taani ne k'aalan ammanettiyaa diraw,
taana boriyaawanttoo zaaranaw danddayay.
43 Taani ne pirddan nashshechchaa ootsiyaa diraw,
ta ins's'arssaappe tumatetsaa k'aalaa d'ayissoppa.
44 Taani ubbaa gede, med'i med'inawukka
ne higgiyaw azazettana.
45 Taani ne wogaa poliyaa diraw,
aakuwaan hamettana.
46 Taani kaatetuwaa sintsan ek'k'aade,
neeni odeeddabaa odaadde yeellatikke.
47 Taani dosiyaa ne azazotuwaan nashettay
48 Taani siik'iyaa ne azazotuwaa bonchchay;
ne awaayuwaakka zaara zaaraadde k'oppana.
Zaw
49 Neeni taw, ne k'oomaw,
immeedda k'aalaa k'oppa;
he k'aalan taani hidootaa ootsay.
50 Neeni, «Taani neena pas'a wotsana»
geedda k'aalay ta tuggaa wode taana mintsetseedda.
51 Otoranchchatuu taana likkiyaappe aatsiide shek'iino;
shin taani ne higgiyaappe sher"i giikke.
52 Abeet Med'inaa Godaw, beniideppe de'iyaa ne pirddaa taani hassayay;
hewan taani minetay.
53 Iitatuu ne higgiyaw azazettenawaa be'ina,
yiluu taana wod'eedda.
54 Taani de'iyaa allaga biittan,
ne awaayuu taw yetsaa gideedda.
55 Abeet Med'inaa Godaw, taani k'amma ne suntsaa k'oppay;
ne higgiyaakka naagay.
56 Ne wogaw azazettiyaawe taw anjjo gideedda.
Heet
57 Abeet Med'inaa Godaw, taana gakkeedda saamay neena;
taani ne k'aalaw azazettana yaagay.
58 Taani ta kumentsaa wozanaappe neena woossay.
Neeni geedda k'aalaadan taw k'aretta.
59 Taani ta ogiyaa akeeka s'eellaade,
neeni odeeddabaakko simmaad.
60 Taani ne azazuwaa naaganaw,
elleellanaappe attina takkikke.
61 Iitatuu taana wodoruwaan k'achchooppekka,
taani ne higgiyaa dogabeykke.
62 Ne s'illo pirddaa diraw, neena galatanaw,
taani k'amma bilahe dendday.
63 Taani new yayyiyaawanttu ubbawunne
ne wogaa naagiyaawanttoo dabbo.
64 Abeet Med'inaa Godaw, sa'ay
aggena ne siik'uwaan kumeedda;
ne awaayuwaa taana tamaarissa.
S'eet
65 Abeet Med'inaa Godaw, ne geedda k'aalaadan,
taw ne k'oomaw keekkabaa ootsaadda.
66 Taani ne azazotuwaan ammanettiyaa diraw,
lo"o pirddaanne eratetsaa taana tamaarissa.
67 Taani murettanaappe kase wora hamettaad;
shin ha"i ne k'aalaw azazettay.
68 Neeni keeka; neeni keekkabaa ootsaasa;
ne awaayuwaa taana tamaarissa.
69 Otoranchchatuu taana wordduwaa okkiino;
shin taani ne wogaa ta kumentsaa wozanaappe naagana.
70 Unttunttu wozanay ubbakka donc'c'illowantta;
shin taani ne higgiyan nashetay.
71 Taani muretteeddawe taw lo"eedda;
ayaw gooppe, ne awaayuwaa tamaaranaw taana maaddeedda.
72 Daro sha"u work'k'aappenne biraappe,
ne doonaappe keseedda higgii taw aad'd'ee.
Yod
73 Taana ne kushii med'd'eeddanne giigisseedda.
Ne azazuwaa taani tamaarana mala,
taw akeekaa imma.
74 Taani ne k'aalan hidootaa wotsiyaa ootseedda diraw,
new yayyiyaawanttu taana be'iide nashetino.
75 Abeet Med'inaa Godaw, ne pirdday s'illa gidiyaawaanne
neeni amaneteedawaa gido diraw taana mureeddawaa eray.
76 Neeni taw ne k'oomaw geedda k'aalaadan,
aggena ne siik'uu taana miniso.
77 Taani pas'a de'ana mala, taw k'aretta;
ayaw gooppe, ne higgii taana nashechchee.
78 Otoranchchatuu wordduwaan
taana mootiyaa diraw, yeellatino.
Taana gidooppe, taani ne wogatuwaa
zaara zaaraadde k'oppay.
79 New yayyiyaawanttunne,
neeni odeeddabaa eriyaawanttu ubbay,
taakko yiino.
80 Taani yeellatenna mala,
ne awaayoo azazettiyaawan
tooshii bayinnawaa gidaarikkitaa!
Kaaf
81 Neeni taana ashshana mala,
taani naagaadde daaburay;
taani ne k'aalan hidootaa ootsay.
82 Neeni geedda k'aalay polettina
be'anaw s'eelliidde, ta ayifii galjjeedda.
Taani, «Neeni taana awude mintsetsaniishsha?» yaagay.
83 C'uwaan kak'k'eedda ogoruwaa gidaade gunddaad;
gidooppenne, ne awaayuwaa balikke.
84 Taani ne k'oomay awude gakkanaw naagoo?
Taana yederssiyaawantta neeni awude pirddanii?
85 Ne higgiyaa naagenna otoranchchatuu,
taana kuddissana giide, taw ollaa bookkiino.
86 Ne azazotuu ubbay ammantsiyaawantta.
Taana asatuu wordduwaan yederssiyaa diraw,
ha"i taana maadda!
87 Unttunttu taana wod'i diggeeddinoshin;
taani ne wogaa aggabeyikke.
88 Aggena ne siik'uwaan ta de'uwaa naaga;
hewenne, neeni ne doonaappe odeeddawaa taani naaganaassa.
Laameed
89 Abeet Med'inaa Godaw, ne k'aalay med'inaassa;
ikka saluwaan minniide de'ee.
90 Neeni yeletaappe yeletaa gakkanaw ammanettiyaawaa.
Neeni ha sa'aa baasaade essaadda;
ikka minniide de'ee.
91 Neeni geeddawaadan ubbabaykka
hachchi gakkanaw minniide de'ee;
ayaw gooppe, ubbatuukka ne k'oomatuwaa.
92 Ne higgii taana nashechchiyaabaa gidenentto,
ta tuggaa wode taani d'ayana shin.
93 Ne wogaa ubbakka dogikke;
ayaw gooppe, neeni an taana pas'a wotsaadda.
94 Taani newaattee; taana ashsha;
ayaw gooppe, taani ne wogaa naaganaw koyay.
95 Iitatuu taana d'ayissanaw kuukuliide naagiino;
shin taani neeni odeeddawaa k'oppay.
96 Polo geetettobaw ubbabaw zaway de'iyaawaa taani be'aad;
shin ne higgiyaw zaway baawa.
Meem
97 Taani ne higgiyaa waata dosayttaa!
Gallassaa kumentsaa taani k'oppiyaawe Aa.
98 Ne azazotuu ubbaa wodekka taananna de'iyaa diraw,
unttunttu taana ta morkkatuwaappe aad'd'eeda eranchcha kessiino.
99 Taani neeni odeeddawaa k'oppiyaa diraw,
taana tamaarisseedda ubbaappekka aad'd'eeda akeekay taw de'ee.
100 Taani ne wogaw azazettiyaa diraw,
c'imatuwaappe aatsaade akeekay.
101 Taani ne k'aalaw azazettanaw koyiyaa diraw,
ta gediyaa iita ogiyaa ubbaappe naagaad.
102 Neeni taana tamaarisseedda diraw,
taani ne pirddaappe wora babeykke.
103 Ne k'aalay ayaa mal"ii!
Eessaa ililuwaappekka aad'd'iide,
ta doonaan mal"ee.
104 Ne wogaappe akeekaa demmaad;
hewaa diraw, taani geella ogiyaa ubbaa is's'ay.
Noon
105 Ne k'aalay ta gediyaw s'omppiyaa,
ta ogiyawukka poo'uwaa.
106 Ne s'illo pirddaadan de'anaw,
taani c'aak'k'eedda c'aak'uwaa mintsana.
107 Taani daro tuggataad;
abeet Med'inaa Godaw, neeni geedda k'aalaadan
taana pas'a wotsa.
108 Abeet Med'inaa Godaw, ta doonaappe kesiyaa galataa, yarshshuwaa akka;
taana pirddaa tamaarissa.
109 Ta shemppu metuwaa bollaa de'inttokka,
taani ne higgiyaa dogikke.
110 Iitatuu taw gitiyaa yeggeeddino;
shin taani ne wogaappe sher"i gabeykke.
111 Neeni odeeddabay med'inaw tawaa;
ee, I ta wozanaw nashshechchaa.
112 Taani med'inaw, wurssetsaa gakkanaw
ne awaayuwaadan ootsanaw k'achchaad.
Samkket
113 Taani laa"u k'ofay de'iyaa asatuwaa is's'ay;
shin ne higgiyaa siik'ay.
114 Neeni taw k'osetta attiyaa saanne
ta gonddalliyaa;
taani ne k'aalan hidootaa ootsay.
115 Taani ta S'oossaa azazuwaa naagana mala,
hinttenoo, iitabaa ootsiyaawanttoo,
taappe haakkite!
116 Neeni geedda k'aalaadan taana minisa;
yaatooppe, taani pas'a de'ana.
Taani hidootan naagiyaaban taana yeellayoppa.
117 Taana zemppissa; yaatooppe,
taani saro de'ana;
taani ubbaa wode ne awaayuwaa hayzzana.
118 Ne awaayuwaappe wora biyaawantta ubbaa neeni akkakka;
unttunttu c'imuu c'oo mela.
119 Sa'aan de'iyaa iitatuwaa ubbaa
neeni pituwaadan paydaasa;
hewaa diraw, taani neeni odeeddabaa siik'ay.
120 Ta bollay new yayyiide kokkoreedda;
taani ne pirddaw yayyay.
Ee
121 Likkebaanne s'illobaa ootsaad;
Taana uk'k'unniyaawanttoo oloppa.
122 Taana ne k'oomaa maaddanaw waase gida;
Taana otoranchchatuwaan uk'k'unnissoppa.
123 Neeni, «neena ashshana»
geedda s'illo k'aalaa polo gaade naagishin,
ta ayifii galjjeedda.
124 Taw, ne k'oomaw, neeni
aggena ne siik'uwaadan ootsa;
ne awaayuwaakka taana tamaarissa.
125 Taani ne k'oomaa;
neeni odiyaabaa taani erana mala,
akeekaa taw imma.
126 Abeet Med'inaa Godaw, asatuu
ne higgiyaa mentseedda diraw,
neeni pirddana wodii ha"a.
127 Taani ne azazuwaa
work'k'aappe aatsaade siik'ay;
Ee, geeshsha work'k'aappekka aatsaade siik'ay.
128 Hewaa diraw, taani
ne wogatuu ubbay giyaawaadan hamettay;
geella ogiyaa ubbaa taani is's'ay.
Pe
129 Neeni odeeddabay malalissiyaabaa;
hewaa diraw, taani aw azazettay.
130 Ne k'aalaa biletsay poo'uwaa immee;
akeekay pac'c'eeddawanttoo akeekaa immee.
131 Taani ne azazoo,
daro saamettaade ta doonaa dooyay.
132 Haa taakko simma;
ne suntsaa siik'iyaawanttu ubbaw
neeni ootsiyaawaadan tawukka k'aretta.
133 Neeni geedda k'aalaadan
ta hemetaa suurissa;
ay nagaraynne taana mooddoppo.
134 Taani ne wogaw azazettanaw,
taana uk'k'unneeddawanttu kushiyaappe woza.
135 Ta bolla, ne k'oomaa bolla,
ne som"uwaa poo'issa;
ne awaayuwaakka tamaarissa.
136 Ne higgiyaw Asay azazettibeena diraw,
ta ayifiyaappe afotsay shaafaadan goggee.
S'aade
137 Abeet Med'inaa Godaw, neeni s'illuwaa;
ne pirddaykka likke.
138 Neeni odeeddabay
s'illuwaanne ubbaa ammanettiyaawaa.
139 Ta morkketuu ne k'aalaa toochcheedda diraw,
ne k'aalaa mishuu ta gomppan ees's'i keseedda.
140 Neeni geedda k'aalay daroppe ammanettiyaawaa;
taani, ne k'oomay Aa siik'ay.
141 Taani guutsanne kad'etteedda asaa;
gidooppenne, taani ne wogaa dogikke.
142 Ne s'illotetsay med'inaw de'ee;
ne higgiikka tuma.
143 Metuunne tuggay taana gakkeedda;
shin ne azazotuu taana nashechchiino.
144 Neeni odeeddabay med'inawukka s'illuwaa;
taani pas'a de'ana mala, akeekaa taw imma.
K'of
145 Abeet Med'inaa Godaw, kumentsaa wozanaappe,
new waassaad; taw alla.
Taanikka ne awaayuwaa azazettana.
146 Taani new waassaad; taana ashsha;
taanikka neeni odeeddabaa ootsana.
147 S'alk'k'ii dolenna guuran denddaade,
«Taana maadda» gaade new waassay.
Neeni taw geedda k'aalan hidootaa ootsay.
148 Ne k'aalaabaa zaara zaaraadde k'oppanaw,
k'amma utta ak'ay.
149 Abeet Med'inaa Godaw,
aggena ne siik'uwaa diraw, tawaa sisa;
ne s'illo pirddaadan taana pas'a wotsa.
150 Iitabaw taana yederssiyaawanttu,
taakko mateeddino;
unttunttu ne higgiyaappe haakkiino.
151 Shin abeet Med'inaa Godaw,
neeni ta matan de'aassa;
ne azazotuu ubbaykka tuma.
152 Taani benippe doommaade,
neeni odeeddabaa tamaaraad;
Aa neeni med'inaw minisa essaadda.
Reesh
153 Ta tuggaa be'aade, taana ashsha;
ayaw gooppe, taani ne higgiyaa dogabeykke.
154 Ta diraw mootettaade taana woza;
neeni geedda k'aalaadan taana pas'a wotsa.
155 Ne awaayuwaa unttunttu akkena diraw,
atotetsay iitatuwaappe haakuwaan de'ee.
156 Abeet Med'inaa Godaw, ne k'aretay dara;
ne s'illo pirddaadan taana pas'a wotsa.
157 Ta morkketuunne taana yederssiyaawanttu dara;
shin taani neeni odeeddawaappe sher"i giikke.
158 Unttunttu ne azazotuwaa naagenna diraw,
taani kaddiyaawantta be'aade shenetaad.
159 Abeet Med'inaa Godaw,
taani ne wogaa siik'iyaa siik'uwaa k'oppa;
aggena ne siik'uwaadan taana pas'a wotsa.
160 Ne k'aalay koyiroppekka tuma;
ne s'illo pirdday ubbaykka med'inaw de'ee.
Shiin
161 Kaappatuu taana c'oo yederssiino;
shin ta wozanay ne k'aalaw yayyee.
162 Darobaa omoodeedda Asay nashettiyaawaadan,
neeni geedda k'aalan taani nashetay.
163 Taani wordduwaa is's'aynne shenetay;
shin ne higgiyaa siik'ay.
164 Ne s'illo pirddaa diraw,
taani neena gallassan laappu gede galatay.
165 Ne higgiyaa siik'iyaawanttoo
kumentsaa sarotetsay de'ee;
unttuntta ubbakka ayaynne d'ubbanaw danddayenna.
166 Abeet Med'inaa Godaw, taani
ne atotetsaa hidootaan naagay;
ne azazotuwaakka ootsay.
167 Taani neeni odeeddabaa naagay;
taani daroppe Aa siik'ay.
168 Taani ne wogawunne
neeni odeeddawoo azazettana;
ayaw gooppe, ta ogiyaa ubbaa neeni be'aasa.
Taw
169 Abeet Med'inaa Godaw, ta waasuu,
ne sintsa gakko;
neeni geedda k'aalaadan taw akeekaa imma.
170 Ta watiwatuu ne sintsa gakko;
neeni geedda k'aalaadan taana ashsha.
171 Neeni ne awaayuwaa
taana tamaarissiyaa diraw,
ta doonaappe galatay pulttana.
172 Ne azazotuu ubbay s'illo gidiyaa diraw,
ta ins's'arssay ne k'aalaabaa yes's'ana.
173 Taani ne wogaa dooreedda diraw,
ne kushii taana maaddanaw giigeeddawaa gido.
174 Abeet Med'inaa Godaw, neeni
taana ashshana mala laamotay;
ne higgiikka taana nashechchee.
175 Taani neena galatana mala,
taana pas'a wotsa;
ne pirddaykka taana maaddo.
176 Taani bayeedda dorssaadan bichchaaray;
taana ne k'oomaa koya;
ayaw gooppe, taani ne azazuwaa dogabeykke.