139
Ubbaa Eriyaa S'oossaa
Zammaaretuwaa Kaappoo Yes'etteedda, Daawite s'aafeedda mazamuriyaa
1 Abeet Med'inaa Godaw, neeni taana biddaade eraadda.
2 Taani awude uttinttonne
awude ek'k'intto, neeni eraasa;
neeni ta k'ofaa ubbaa haakuwaan eraasa.
3 Taani biyaasaanne,
shemppiyaa sa'aa s'omoosaasa;
ta ogetuwaa ubbaa neeni eraasa.
4 Abeet Med'inaa Godaw, taani ta ins's'arssan
itti k'aalaa haasayanaappe kasetaade,
neeni ta k'ofaa ubbaa eraasa.
5 Neeni ta yuushshuwaan de'aassa;
ne kushiyan taana naagaasa.
6 Ne eray taana loytsi malalissee;
taani akeekanaw danddayiyaasaappe d'ok'k'a.
7 Taani ne Ayaanappe hak'a baanaw danddayayitaa?
Woy ne sintsaappe hak'a bak'atanaw danddayayitaa?
8 Pude saluwaa kesooppe,
neeni yaan de'aassa!
Duge Si'ooliyaa wod'd'inttokka,
neeni yaan de'aassa.
9 Away mokkiyaasaa bagga paallaade booppe,
woy away wulliyaasaa baggan haakkaade de'ooppe,
10 he saankka ne kushii taana kaaletsee;
ne ushechcha kushii taana zemppissee.
11 Taani, «D'umaw, taana gentsaa;
poo'uwaa, k'ammaw laametta» yaaginttokka,
12 d'umaa daruu new d'umenna;
k'ammay gallassaadan poo'ee;
ayaw gooppe, new d'umay poo'uwaa mala.
13 Neeni ta giddo asatetsaa ubbaa med'd'aadda;
ta aatti uluwaan taana neeni waas'a med'aadda.
14 Neeni taana malalissiyaabaanne ooratsabaa ootsaade med'd'eedda diraw,
taani neena galatay.
Ne oosotuu malalissiyaawantta!
Taani k'ay hewaa wurssaade eray.
15 Taani geema sa'aan med'ettiyaa wode,
ta mek'etsatuu neeppe geemmibeyikkino.
Ta bollay ta aatti uluwaa c'iimmaa giddon
hiillan alleek'k'ettiide oosettiyaa wode,
16 yelettibeenna ta asatetsaa ne ayifii be'eedda.
Biro ittuunne doomettennan de'ishshin,
taw neeni giigiseedda gallassatuu ubbatuu
ne mazggobiyaan s'aafetteeddino.
17 Abeet S'oossaw,
ne k'ofatuu ayaa c'oratteeddinoo!
Unttuntta eranawe ayaa waayissii!
18 Taani unttuntta paydintto,
unttunttu shafiyaappe darana shin.
Taani beegottiyaa wode,
ha"ikka neenana de'ay.
19 Abeet S'oossaw, neeni iitatuwaa wod'aaddintto ayee de'ii!
Suutsaa gussiyaa asatuu taappe haakkino!
20 Unttunttu ne bolla iitabaa haasayiino;
ne morkketuu ne suntsaa bayzziino.
21 Abeet Med'inaa Godaw, neena is's'iyaawantta
taani is's'ikkitaa?
Ne bolla denddiyaawantta
taani shenetikkitaa?
22 Taani unttuntta ubbaa is's'ay;
unttuntta taani ta morkkatuwaadan payday.
23 Abeet S'oossaw,
taana biddaade, ta wozanaa era;
taana paac'c'aade, ta un"etiyaa k'ofaa era.
24 Ane taanan iitabay de'ooppe s'eella;
med'inaa ogiyaan taana kaaletsa.