22
S'illo Asaa Metuwaanne Hidootaa
Zammaaretuwaa Kaappoo Yes'etteedda, Daawita Mazimuriyaa. Wontta Guuraa «Gen"iyaa» Yetsaadaan Yes'etteedda Daawita Mazimuriyaa
1 Ta S'oossaw, ta S'oossaw, taana ayaw aggaadii?
Taana maadda gaade taani new watiwatiyaa wode,
ayaw taappe haakkay?
2 Abeet ta S'oossaw, gallassan ubbaan taani new waassay;
shin neeni taw allakka.
K'amman ubbankka new waassay,
shin woppaa demmikke.
3 Gidooppenne, neeni geeshsha.
Israa'eeliyaa galatay ne araataa yuushshuwaan de'ee.
4 Kase nu aawotuu neenan ammanetteedino;
neenan ammanettina, neeni unttuntta ashshaada.
5 New waassiide atteeddino;
neenan ammanettiide yeellatibeykkino.
6 Shin taani asaa gidikke; taani gus'uniyaa.
Taani asan kad'etteeddawaanne k'iliic'etteeddawaa.
7 Taana be'iyaa ubbatuu k'id'iino;
unttunttu taana s'iti s'eelliinonne barenttu huup'iyaa k'aatsiino.
8 Yaatooppe, «I Med'inaa Godaan ammanetteedda;
ayaw Aa ashshennee?
Med'inaa Goday Aa dosooppe,
ane Aa ashsho» yaagiino.
9 Gidooppenne, taana ta aatti uluwaappe suure yeliseeddawe neena;
ta aatti d'antsaa d'ammiyaa wodekka taani ammanettanaadan ootsaadda.
10 Taani yelettoodeppe doommaade neenan dic'c'aad;
ta aatti uluwaappe doommaadekka, neeni ta S'oossaa.
11 Metuu taakko matiyaa dirawunne
taana maaddiyaawe bayinna diraw,
Ha"i neeni taappe haakkoppa.
12 Daro morkketuu koruma booratuwaadan taana dooddiino;
k'ayc'c'iyaa Baasaane biittaa booratuwaadan taana dooddiino.
13 Mentsereetsiyaanne gudiyaa gaammuwaadan
barenttu doonaa ta bolla hanggiino.
14 Taani haatsaadan goggaad;
ta mek'etsatuu barenttu kuushshaappe koletteeddino.
Ta wozanay eessaa muk'aaddaa mala,
ta giddon seeri wuree.
15 Ta k'ood'ii kon"aadan melee;
ta ins's'arssay kookkiyaana oyk'k'ettee.
Neeni taana hayk'k'eedda asaadan baanan yeggaadda.
16 Kanatuu taana te"eeddino;
iita asatuu ta yuushshuwaan dooddeeddino.
Ta kushetuwaanne ta gedetuwaa c'addiino.
17 Ta mek'etsatuwaa ubbaa taan payday.
Ta morkketuu taana s'eelliinonne derek'k'iino.
18 Ta mayuwaa shaakki akkiino;
ta adussa mayuwaan saamaa yeggiino.
19 Abeet Med'inaa Godaw, neeni taappe haakkoppa.
Abeet ta wolk'k'aw, taana maaddanaw ellekka haaya.
20 Taana mashshaappe ashsha;
ta uushshuwan de'iyaa kanatuwaa wolk'k'aappe ashsha.
21 Gaammotuwaa doonaappe taana ashsha;
k'ayc'c'iyaa bazzuwaa booratuwaa kac'iyaappe taana naaga.
22 Taani ne suntsaa ta ishatoo odana;
maabaraa shiik'uwaankka neena galatana.
23 Hinttenoo, Med'inaa Godaw yayyiyaawanttoo, Aa galatite.
Hinttenoo, Yaak'ooba zeretsatoo,
ubbaykka Aa bonchchite.
Hinttenoo, Israa'eeliyaa zeretsatoo,
ubbatuukka bonchchuwaan aw yayyite.
24 I naak'etteeddawantta kad'enna;
unttuntta gakkeedda k'ohuwaa taw ay metee geena.
Bare som"uwaa unttunttuppe gentsenna;
shin unttunttu maadoo aakko waassiyaa wodiyaan,
unttunttu waasuwaa sisee.
25 Taani neeni ootseedda lo"o oosuwaa diraw,
kuntseedda shiik'uwaan galatana.
Taani shiik'etteeddawaa new yayyiyaa asaa sintsan gatsana.
26 Hiyyeesatuu miide kallana.
Med'inaa Godaa koyiyaawanttu Aa galatana.
Unttunttu med'inaw de'ana.
27 Sa'aa gas'aa gakkanaw Asay ubbay
hassayiide, Med'inaa Godaakko simmana.
Asaa zare ubbay aw goyinnana.
28 Ayaw gooppe, kaatetiyaa maatay Med'inaa Godaawaa;
kawutetsatuwaa I mooddee.
29 Sa'aan de'iyaa dure asatuu ubbay
aw goyinnana.
Barentta hayk'k'uwaappe ashshanaw danddayennawanttunne
baanaw laamettiyaawanttu ubbatuu aw gulbbatana.
30 Yiyaa zeretsay aw kiitettana;
asay Godaa oosuwaa yiyaa yeletaw odana.
31 Biro yelettibeenna asaykka Aa s'illotetsaa odana.
«S'oossay bare asaa ashsheedda» yaagiyaawe odettana.