35
Naak'eteedda Asaa Woosaa
Daawita Mazimuriyaa
1 Abeet Med'inaa Godaw, taananna ek'ettiyaawanttuna neeni ek'etta;
taananna olettiyaawanttuna neeni oletta.
2 Gonddalliyaanne hara olaa miishshaa oyk'k'aade,
taana maaddanaw dendda.
3 Taana yederssiyaawanttu bollan
ne tooraanne mashshaa dentsa.
Taana, «Taani neena ashshiyaawaa» yaaga.
4 Ta shemppuwaa wod'anaw koyiyaawanttu,
yeellatinonne kawushino;
ta bolla iitabaa mak'ettiyaawanttu kawushiide guyye simmino.
5 Med'inaa Godaa kiitanchchay unttuntta yederssiyaa wode,
unttunttu c'arkkuwaa sintsan de'iyaa suullaadan hanino.
6 Med'inaa Goda kiitanchchay,
unttuntta dechchana haniyaa wode,
unttunttu ogii d'umaanne halitsaa gido.
7 C'oo taana oyk'k'anaw barenttu p'iriyaa wotseeddino;
k'aykka c'oo taana kunddisanaw ollaa bookkeeddino.
8 Erennan de'ishiina, unttunttu bollan bashshay puttu go.
Unttunttu wotseedda p'irii unttuntta oyk'k'o;
unttunttu bashshaa ollaan kunddino.
9 He wode taani Med'inaa Godaan nashettana;
I ashsheeda diraw, taani nashshechchaa nooc'u gaana.
10 Ta kumentsaa asatetsay neena,
«Abeet Med'inaa Godaw, ne mali oonee?
Hiyyeesaa wolk'k'aama kushiyaappe wotsa akkaasa.
Hiyyeesaanne metootanchchaa bonk'k'i miyaawanttu kushiyaappe ashshaasa» yaagana.
11 Wordduwaa markkattiyaawanttu ta bolla denddiino.
Taani erennaban taana mootiino.
12 Taani lo"uwaa ootseeddawaa kushiyaa iitaa zaariino;
yaatina, taani taarekka ataad.
13 Shin taani unttunttu harggeedda wode,
maak'aa mayyaad; ta asatetsaa s'oomaan daaburssaad.
Ta woossay zaaruwaa demenan atteedda.
14 Ta huup'iyaa zik'k'i ootsaade, ta dabboo,
woy ta ishaw yeekkiyaawaadan yeekkaad.
Itti Asay bare aattiw kayyottiyaawaadan ta huup'iyaa oyk'k'aade,
yeekkaade hamettaad.
15 Shin unttunttu taani d'ubetteeddawaan nashettiide,
ta bolla shiik'eeddino.
Taani erenna gaasuwaan taana wad'd'iide,
aguwaa is's'eeddino.
16 Iita Asay k'iliic'iyaawaadan unttunttu taana k'iliic'iino;
unttunttu yilotiide, barenttu achchaa garc'c'eeddino.
17 Abeet S'oossaw, neeni awude gakkanaw
c'o"u gaade s'eellay?
Unttunttu iita oosuwaappe taana ashsha;
ha gaammotuwaa mala asatuwaappe ta al"o shemppuwaa ashshaa.
18 He wode gita shiik'uwaan taani new galataa immana;
c'ora asaa shiik'uwaan taani neena sabbana.
19 Gaasuu baynnaan taana morkkiyaawanttu nashettoppino;
taana c'oo is's'iyaawanttu ta bolla sim"etoppino.
20 Unttunttu sarobaa haasayiyaawaa aggiide,
Biittan c'o"u giide de'iyaa asatuwaa bollan
wordduwaa med'd'iide haasayiino.
21 Unttunttu barenttu ins's'arssaa ta bolla k'arayiide,
«Ee, ee, neeni ootseeddawaa
nuuni nu ayifiyaan be'eeddo» yaagiino.
22 Abeet Med'inaa Godaw, neeni hawaa be'aade;
c'o"u gooppa.
Abeet S'oossaw, neeni taappe haakkoppa.
23 Abeet ta Godaw, ta S'oossaw,
Ta diraw dendda; beegota
ta doonaa gidaade mootetta.
24 Abeet Med'inaa Godaw, ta S'oossaw,
ne s'illotetsan taana shatintsaa;
ta morkkatuwaa nashechchoppa.
25 Unttunttu barenttoo, «Hashshu, hashshu,
nuuni nu wozanaan amotteeddawaa gatseeddo.
Nuuni Aa mitteeddo» gaanaadan ootsoppa.
26 Ta waayiyaan nashettiyaawanttu ubbay
yeellatinonne kawushino.
Ta bollan otorettiyaawanttu
yeellaanne kawushshaa mayno.
27 Taani shatimmiyaawaa dosiyaawanttu
nashettiide, «Hashshu!» giino.
Unttunttu ubbaa gede, «Bare k'oomaa sarotetsaan
nashetiyaa Med'inaa Goday gitato» yaagino.
28 Gallassaa kumentsan ta ins's'arssay,
ne s'illotetsaabaanne ne galataabaa odana.