51
Maarotetsaa Demanaw Shiik'eedda Woosaa
Zammaaretuwaa Kaappoo Yes'etteedda, Berssaabina sharmus'eedda Hanotaa Timbbitiyaa Odiyaa Naataani Aw odiide Simmina, Daawita Mazamuriyaa
1 Abeet S'oossaw, aggena ne siik'uwaadan taana maara;
ne k'aretaa daruwaadan ta bayzzuwaa k'uc'c'a.
2 Ta iitatetsaappe taana mule meec'c'a;
ta nagaraappe taana geeshsha.
3 Ayaw gooppe, ta bayzzuwaa taani eray;
ta nagaray ubbaa gede ta sintsaana.
4 Taani neena, ne s'alala naak'k'aad;
ne ayifiyaa sintsan iitabaa ootsaad.
Hewaa diraw, haasayaaddekka neeni likke;
pirddaaddekka neeni s'illuwaa.
5 Taani yelettoodeppekka tumu nagaranchcha;
ta aatti uluwaan biro attiyaa wodeppe doommaadekka,
taani nagaranchcha.
6 Hekko neeni wozana giddo tumatetsaa koyaasa;
hewaa diraw, ne aad'd'eeda eratetsaa ta garssan tamaarissa.
7 Hiisoop'p'iyaa giyaa bonc'c'iyaan neeni taana geeshsha;
taani geeyana.
Taana meec'c'a;
taani shachchaappe aad'd'aade boos's'ana.
8 Neeni taana nashshechchaanne
hashshu giyaawaa sisa;
neeni taana mentsereetseeddabaa gidooppekka,
zaaraadde nashshechchaa.
9 Ta nagaraappe ne sintsa wora zaara;
ta iitatetsaa ubbaa k'uc'c'a.
10 Abeet S'oossaw, geeshsha wozanaa ta giddon med'd'a;
minisiyaa ayaanaa ta giddon ooratsa.
11 Taana ne sintsaappe oloppa;
ne Geeshsha Ayaanaa taappe akkoppa.
12 Ne atotetsaa nashshechchaa taw zaaraadde imma;
taani new eeno gaade azazettanaadan,
Taana zemppissa.
13 He wode taani bayzzanchchatuwaa ne ogiyaa tamaarissana;
he nagaranchchatuunne neekko simmana.
14 Abeet S'oossaw, taana ashshiyaa S'oossaw,
suutsaa gusseedda nagaraappe taana ashsha;
He wode ta ins's'arssay ne s'illotetsaabaa yes's'ana.
15 Abeet Godaw, ta doonaa dooyaa;
yaatooppe, ta ins's'arssay ne galataa awaayana.
16 Neeni yarshshuwaan nashetantto ta new shiishshanashin,
neeni yarshshuwaan nashetakka.
17 S'oossaw yarshshiyaa yarshshuu
ashkke ayaanaa; abeet S'oossaw,
«Nagaraa ootsennan aggaarikkitaashaa» giyaa,
me"eedda wozanaa neeni kad'akka.
18 Abeet S'oossaw, ne dosuwaan S'iyooniw keeka;
Yerusaalame gimbbetuwaa gimbba.
19 He wode s'illo yarshshuwaan,
S'uuggiyaa yarshshuwaaninne,
mehiyaa ashuwaa wurssi s'uuggiyaa yarshshuwaan neeni nashettana.
K'ay korumatuu ne yarshshiyaasan yarshshettana.