66
Ittipetetsaa Galataa
Zammaaretuwaa Kaappoo Yes'etteedda Sabaa, mazamuriyaa
1 Sa'aan asaa ubbaw, hintte k'aalaa d'ok'k'issiide,
nashshechchan S'oossaa galatite.
2 «S'oossaa suntsay bonchchetto!» giide yes's'ite;
bonchcho galataa aw immite.
3 S'oossaw hawaadan yaagite;
«Ne oosotuu waan malalissiyaawanttee!
Ne wolk'k'ay dareedda diraw,
ne morkketuu yashshaw ne sintsan kokkoriino.
4 Sa'aan de'iyaa ubbatuu new goyinniino;
neena sabbiino;
ne suntsaw galataa yes's'iino» yaagite.
5 Haayite; S'oossay ootseeddawaa be'ite;
I asaa giddon maalalissiyaa oosuwaa ootseedda.
6 I abbaa haatsaa shaakeedda;
k'ay beni nu aawotuu yorddaanoosa shaafaa,
barenttu gediyaan hamettiide, mela biittaan pinneeddino.
Hewan I ootseeddabaan nuuni nashetteeddo.
7 I bare wolk'k'an med'inaw mooddee.
Kawutetsatuwaa bare ayifiyaan s'eellee;
hewaa diraw, makkaliyaawanttu Aa bolla denddoppino.
8 Asatoo, nu S'oossaa galatite;
hintte Aa galatiyaa galatay sisetto.
9 I nuuna pas'a wotseedda;
nuuni kunddennaadan naageedda.
10 Abeet S'oossaw, neeni nuuna paac'c'aadda;
biraa geeshshanaw taman paac'iyaawaadan,
nuuna geeshshaadda.
11 Neeni nuuna p'iriyaan gelissaadda.
Nu zokkuwaankka dees'obaa toossaadda.
12 Morkketuu nu huup'iyaan togganaadan ootsaadda.
Nuuni haatsaa gidduwaananne tamaa gidduwaana aad'd'eedo;
shin ha"i nuuna ishaliyaa sa'aa ahaadda.
13 Taani s'uuggiyaa yarshshuwaanna ne golliyaa gelaade,
ta k'anggiyaa new gatsana.
14 Taani metooteedda wode,
ta doonaan shiik'etteedda k'anggiyaa,
ta ins's'arssaappe keseeddawaa, taani gatsana.
15 Taani new s'uuggiide yarshshiyaa,
dorssaa orggetuwaa shiishshana.
Koruma booratuwaanne deeshsha orggetuwaa new yarshshana;
he yarshshotuwaa c'uway saluwaa gakkana.
16 Hinttenoo, S'oossaw yayyiyaawanttoo,
ubbatuu haa yiide, sisite.
S'oossay taw ootseeddawaa taani hinttew odana.
17 Ta k'aalaa d'ok'k'u ootsaade taani S'oossaa woossaad;
ta ins's'arssan aw galataa shiishshaad.
18 Taani ta wozanaan nagaraa gentseeddentto,
Goday taana sisenna.
19 Shin S'oossay tumuwaappe taana siseedda;
ta woosaakka hayzzeedda.
20 S'oossay ta woosaa is's'ibeenna diraw,
k'ay aggena bare siik'uwaa taw diggibeenna diraw, galateetto.