7
Yedesaa Wodiyaan S'illo Asaa Woosaa
Biiniyaama Zariyaa Kuuzawaa Daawite, S'oossaakko Zilaaleedda Zilaassaa.
1 Abeet Med'inaa Godaw, ta S'oossaw, taani neekko bak'ataade k'osettay.
Taana yederssiyaa ubbatuwaappe neeni taana ashsha akka.
2 Neeni taana ashshenabaa gidooppe,
Unttunttu taana gaammuwaadan bonk'k'iide,
ooninne ashshenan mentsereetsana.
3-4 Abeet Med'inaa Godaw ta S'oossaw,
Taani asaa naak'k'eeddawaa gidooppe,
Hewenne ta laggiyaw lo"uwaa diraw iitaa zaareeddawaa gidooppenne,
Woy gaasuu bayinnan ta morkkiyaa bonk'k'eeddawaa gidooppe,
Hawaa mala yewotuwaappe ittuwaanne taani ootseeddawaa gidooppe,
5 ta morkkii taana yederssiide oyk'k'o.
Taana sa'aan yed'ereetso;
yaatiide, taana biittaan oli basho.
6 Abeet Med'inaa Godaw, ne hank'k'uwaan dendda ek'k'a;
ta morkkatuwaa ees's'iyaa hank'k'uwaa bolla dendda.
Ta S'oossaw Godaw, beegotta; tumuwaa pirdda.
7 Kawutetsatuwaa shiik'uu ne yuushshuwaan shiik'o;
neeni unttunttuppe bollaanna gidaade haana.
8 Med'inaa Goday kawutetsatuwaa bolla pirddee.
Abeet Med'inaa Godaw, taw ta s'illotetsaadan pirdda;
Abeet Ubbaappe D'ok'k'aw, ta suuretetsaadan pirddaa.
9 K'ofaanne wozanaa biddaade eriyaa s'illo S'oossaw,
iitatuwaa geniyaa neeni d'ayissa.
Shin s'illuwaa sarotan minisa wotsa.
10 Wozanaa s'illuwaa ashshiyaa S'oossay
taw gonddalle.
11 S'oossay s'illuwaa pirddiyaawaa;
I hachchi hachchi hank'k'ettiyaa S'oossaa.
12 Asay bare nagaraa paas'iide simmennaan is's'ooppe,
S'oossay bare mashshaa leefee;
I bare wonddaafiyaa giigissee.
13 I bare wod'iyaa olaa miishshatuwaa giigissee;
Tamaa lac'uwaadan p'ooliyaa bare wonddaafiyaa tooraa giigissee.
14 Iitatetsaa shahaareedda,
geniyaa shahaara shahaareeddawe, wordduwaa yelee.
15 Hara asatoo ollaa bookkeedda asay
bare bookkeedda ollaan barew kunddee.
16 I ahiyaa genii Aa huup'iyaw simmee.
Aa makkalaynne Aa huup'iyaw simmee.
17 Med'inaa Godaa s'illotetsaa diraw,
taani Aa galatana;
K'ay Ubbaappe D'ok'k'iyaa Med'inaa Godaa suntsaw,
taani galataa yes's'ana.