9
Iitaa Bollan Pirddaa
Zammaaretuwaa Kaappoo, «Na'aa Hayk'uwaan» Yes'etteedda, Daawita Mazimuriyaa.
1 Abeet Med'inaa Godaw, taani neena ta kumentsaa wozanaappe galatana;
Neeni ootseedda maalalissiyaa
ne oosuwaa ubbaakka odana.
2 Neenan nashettananne hashshu gaana.
Ubbaappe D'ok'k'iyaa S'oossaw,
taani ne suntsaw galataa yes's'ana.
3 Ta morkketuu guyye simmiyaa wode,
ne sintsappe d'ubetti d'ayana.
4 Neeni taw s'illo pirddaa pirddaadda;
Neeni s'illotetsan pirddaadde,
ne kawutetsaa araatan uttaadda.
5 Neeni kawutetsaa seeraadda;
iitatuwaakka d'ayissaadda.
Neeni unttunttu suntsaa med'i med'inawukka k'uc'c'a diggaadda.
6 Morkketuu med'inaa d'ayuwaa d'ayeeddino;
k'ay unttunttu katamatuwaa ubbaanna d'ok'olla diggaadda.
Unttunttu ubbaanna dogetti atteeddino.
7 Shin Med'inaa Goday med'inaw kaatetiide de'ee;
I bare kawutetsaa araataa pirddaw giigisseedda.
8 Ha sa'aa s'illotetsan pirddana;
asatuwaakka suuretetsaan pirddana.
9 Med'inaa Goday un"etteeddawanttoo bak'ati attiyaawaa;
meto wodiyaankka geli attiyaa geessuwaa.
10 Ne suntsaa eriyaawanttu neenan ammanettiino;
ayaw gooppe, Med'inaa Godaw, neeni neena koyiyaawantta yegga agga beykka.
11 S'iyoone Deriyan kaateti utteedda Med'inaa Godaw galataa yes's'ite.
I ootseedda ubbabaakka asaa ubbaw odite.
12 Ayaw gooppe, suutsaa gussiyaawanttoo
haluwaa kessiyaa S'oossay
naak'etteeddawanttu waasuwaa sheneko geena.
13-14 Abeet Med'inaa Godaw, S'iyoone asaa kariyaan taani ek'k'aade,
Ne galataa odana malanne
hewan ne atotetsaan loytsi nashettana mala,
ta morkketuu taana yederssiyaawaa be'a.
Neeni ne maarotaan, hayk'k'uwaappe taana ashsha.
15 Kawutetsatuu barenttu bookkeedda ollaan barenttoo kunddeeddino.
Unttunttu k'osi wotseedda p'irii unttunttu gediyaa oyk'k'eedda.
16 Med'inaa Goday bare s'illo pirddan barew eretteedda;
iita Asay bare kushiyan ootseedda oosuwaa p'iriyaan oyk'k'etteedda.
17 Iitatuu duufuwaa baana;
S'oossaa dogiyaa kawutetsatuu ubbaykka unttunttudan hanana.
18 Hiyyeesay ubbaa gede dogetti attena;
woy metootanchchay wotseedda hidootay med'inaw d'ayenna.
19 Abeet Med'inaa Godaw, Asay ne bolla denddiide,
bare wolk'k'aan c'eek'ettenna mala, neeni dendda!
Ne sintsan kawutetsatuwaa bolla neeni pirddaa.
20 Abeet Med'inaa Godaw, unttuntta neeni yashissa;
unttunttu asaa gidiyaawaa neeni unttuntta erissa.