Siik'uwaa Sabbiyaa Mas'aafaa
Geluwaa
«Siik'uwaa Sabbiyaa Mas'aafay» siik'uwaa timirttiyaa k'oriide shiishsheeddawaa. Ha gins's'atuwaappe dariyaa baggatuu mazimuriyaa malan s'aafetteeddino; unttunttu attumawe mac'c'aaniw, mac'c'awunna k'ay attumawoo s'aafeeddawantta. Ha mas'aafay itti itti biletsatuwaan «Siik'uwaa Sabaa» woy «Mazamuriyaa Ubbaappe Aad'd'iyaa Mazimuriyaa» geetettiide erettee. Hara biletsatuwaan k'ay «Solomona Mazimuriyaa» geetettiide erettee. Ayaw gooppe, Ibrayiss's'e k'aalan s'aafetteedda mas'aafay Solomon s'aafeedda giide odiyaa diraassa.
Ha mazamurii Kiristtoosappenne woosa golliyaappenne gidduwaan de'iyaa gakkettussaa bessiyaa leemisatwaa oyk'k'eeddawaa. Shin Ayihudatuu, «S'oossaappenne Israa'eeliyaa asaappe gidduwaan de'iyaa gakkettussaa bessiyaa leemisatwaa oyk'k'iyaa mas'aafaa» giino.
Shemppatuwaa Ubbatoo Imetteedda K'antsa K'ofatuwaa
Siik'uu Woynniyaa Eesaappe aad'd'ee 1:1—2:7
Siik'uu Ubbaa Yewuwaa Loytsee 2:8—3:5
Soyzzuwaabaa 3:6—4:5
Soyzzuwaa Ittippetetsaa 4:6—5:16
Siik'uu Ubbaappe Dooretee 6:1—7:6
Taaninne Neeninne S'alalay 7:7—8:4
Siik'uwaa Sabaa 8:5-14
1
Siik'uu Woynniyaa Eesaappe Aad'd'ee
(1:1—2:7)
1 Mazamuriyaa ubbaappe aad'd'iyaa Solomona mazamurii hawaa.
Wodoratta:
2 «Ne siik'uu woyniyaa eessaappe aad'd'i nashechchiyaa diraw,
ne mettershshan zaara zaaraadekka taana yera.
3 Ne okettiyaa shittuu wooti sawii!
Ne suntsay s'eesettiyaa wodekka ayaa nashechchii!
Geelayotuu neena siik'iyaawe hewaassa.
4 Taana neenana akkaade ba. Haaya, ane laa"uu ittippe wos's'oytte!
Ta kaatiyaw, taana ne siiris'aa gelissa» yaagaaddu.
Yerusaalame mac'c'a asatuu:
Aban nuuni ay keeshshaa nashetteeddo!
Nuuni Aa siik'uwaa woyniyaa eessaappekka aatsiide nashetto.
Tumukka mac'c'a Asay ubbay neena siik'anaw bessee yaageeddino.
Wodoratta:
5 Hinttenoo, Yerusaalame mac'c'a asatoo, sisite,
taani karetsa; gidooppenne, malanchcha.
Ta karetsatetsay K'eedaare dunkkaaniyaa mala;
shin ta malay Solomona kaatiyaa golliyaa gaariddotuwaa mala.
6 Ta malaa kares'isseeddawe s'uuggiyaa aawaa;
taani karetsa gideedda diraw, taana kad'oppa.
Ta ishatuu, ta aatti naanatuu taananna walak'ettiide,
taana woyniyaa turaa naaganchcha ootseeddino;
yaatina, taani taana naagabeykke.
7 Ta siik'ow, ane taw oda;
ne dorssaa wudiyaa neeni heemmiyaawe hak'anee?
Gallassi awaappe ne unttuntta shemppisiyaawe hak'anee?
Neena demmanaw ne laggetuwaa wudiyaa kaalaade,
ayaw yuushshanchcha mac'c'a asaa gidoo? yaagaaddu.
Yerusaalame mac'c'a asatuu:
8 Hanne, mac'c'a asaa ubbaappe aad'd'a lo"iyaa malanchchatee!
Sa'aa erana d'ayooppe, dorssay beedda sa'aa kaalaade ba;
ne deeshsha maratuwaakka hentsanchchatuwaa dunkkaaniyaa matan heemma.
Woddallay
9 Ta siik'k'atee!
Gibs'e kaatiyaa paraa gaariyaa goochchiyaa paratuwaa giddon de'iyaa maggaayatiidan lo"aasa.
10 Abeet, ne haytsaan goolakkattiyaa alleek'k'uwaana shiik'iide,
ne gac'uu ayaa lo"ii! Ne ziizziikka ink'k'uwaan alleek'k'etteedawaa.
11 Nuuni new biran alleek'k'etteedda,
work'k'aa alleek'k'uwaa oosissana yaageeddino.
Wodoratta:
12 Kaatii maaddan utti de'ishshin,
ta shittuwaa sawuu golliyaa giddo ubbaan toshukku geedda.
13 Ta siik'uu ta d'antsatuwaappe gidduwaan shemppiyaa wode,
Aa peenuu k'arc'c'iitiyaana de'iyaa kawaraadan sawee.
14 Ta siik'uu Enggaade geetettiyaa woyniyaa sa'aan doleedda,
bazzuwaa c'iishshaa mala yaagaaddu.
Wodallay:
15 Ta siik'k'atee, neeni waata lo"ay! Neeni waata lo"ay!
Ne ayifetuu harap'p'iyaa ayfiyaadan lo"iino yaageedda.
Wodoratta:
16 Ta siik'ow, neeni ayaa lo"ay! Ayaa nashechchay;
nu arssayikka aac'eedda maataadan nashechchiyaawaa.
17 Nu golliyaa zaaruu zigaa; kaaraykka s'iidan dadetteeddawaa yaagaaddu.