Siik'uu Ubbaappe Doorettee
6
(6:1—7:6)
Yerusaalame Wodorotuwaa:
1 Mac'c'a asaa ubbaappe malanchchatee!
Ne laggii hak'a beedee? Nuunikka neenana ittippe koyanaw,
I beedda sa'aa nuw oda yaageeddino.
Wodoratta:
2 Ta siik'uu dorssaa wudiyaa heemmanawunne,
lo"iyaa c'iishshaa shiishshanaw,
shittuwaa sawuwaa maatay de'iyaa ataakilttiyaa giddo wod'd'eedda.
3 Taani ta siik'uwaanno; ta siik'uukka tawaa.
I c'iishshaa giddon wudiyaa heemmee yaagaaddu.
Wodallay:
4 Ta siik'k'atee! Neeni Tirs's'a katamay lo"iyaawaadan lo"aasa;
Yerusaalamedan daro lo"aasa; banddiraa oyk'k'iide,
salppiyaan biyaa olanchchay yashshiyaawaadan yashshaasa.
5 Hayyanaa ne ayifiyaa taappe wora zaaraarikkii,
ayaw gooppe, unttunttu taana waayissiino.
Ne binnaanay Gala'aade Deriyaappe wod'd'iyaa deeshshaa wudiyaa malatee.
6 Ne achchay meec'ettiide kesiyaa, ubbaykka manttiyaa yeliyaa,
unttunttu giddon maynii bayinna dorssaa wudiyaa mala.
7 Ne laa"u gac'otuwaa sharbbiyaa gidduwaana s'eelliyaa wode,
laa"u kesseedda roomaaniyaa teeraa malatiino.
8 Usuppun tammu mac'c'a kaatetuunne usuppun tammu baakkotuu,
k'ay payduu bayinna wodorotuu taw de'iino.
9 Shin ta harap'p'atta, ta tooshii bayinnaana, Aa taw dumma.
Aa bare aatissikka mes's'i ittinno;
izo yeleedda aatakka ayaappenne aatsaade izo siik'aw.
Wodorotuukka izo s'eelliide, Hanna anjjetteedaano yaagiino.
Mac'c'a kaatetuukka baakkotuukka izo sabbiino.
Yerusaalame Wodoratuwaa
10 Hanna wontta s'alk'k'iyaadan doliyaana, aginaadan poo'iyaanna,
awaadan c'addiyaana, banddiraa oyk'k'iide salppiyaan biyaa olanchchaadan,
yashshiyaanna iza oonee? yaagiino.
Wodallay
11 Taani wombban toketteedda mitsatuu lic'uwaa be'anaw,
woyniyaa turay aac'eedenttonne k'ay roomaaniikka c'iisheeddenttonne s'eellanaw,
duge ataakilttiyaa sa'aa wod'd'ay.
12 Taani akeekenan de'ishiina, ta amuu taana afiide,
ta kaatiyaa matan, paraa gaariyan taana utisseedda yaageedda.
Yerusaalame Wodorotuwaa:
13 Neenoo Shulaame biittaappe yeeddawunne, haaya;
haa simma! Neena nu loytsiide s'eelana; haa simma! yaageeddino.
Wodoratta:
Daro asaa sintsan yes's'iyaa asaadan, taakko ayaw s'eelliitee? yaagaaddu.